Pisalema ya 64

₁We Xikwembu, amukela xirilo xa mina;

ndzi lamulele eka valala va mina, hikuva ndza va chava.

₂Ndzi ponise emakungwini lama bohiweke exihundleni hi vanhu lavo homboloka,

u ndzi phonyokisa eka wona,

₃hikuva ku vulavula ka vona ka tlhava kukota tlhari leri lotiweke,

marito ya vona ma dlaya, onge i miseve leyi nga ni vuxungu.

₄Va tumbelela vanhu lava nga riki na nandzu,

va hatla va va copa va nga kanakani.

₅Makungu ya vona layo biha a va hambani na wona,

loko va ri exihundleni, va luka mano va ku: “Hi ta vona hi mani xana?”

₆Va boha makungu walawo, kutani va ku:

“Hinkwaswo swi hetisekile, hi endlile hi vutlhari lebyikulu!”

Leswi nga miehleketweni ya munhu

a hi ku enta ka swona!

₇Kambe hi nkarhinyana, Xikwembu xi ta va copa hi nseve,

kutani va ta vaviseka.

₈Va ta tiphasa hi ku vulavula ka vona,

kutani vanhu lava va nga ta va vona, va ta hlakahla tinhloko;

₉hinkwavo va ta chava;

va ta anakanya hinkwaswo leswi Xikwembu xi swi endleke,

kutani va ta tivisa van'wana.

₁₀Lavo lulama a va titsakele eka HOSI Xikwembu, va tumbela eka xona;

hinkwavo lava lulameke a va xi dzunise.