Pisalema ya 73

₁Xikwembu xi komba Vaisraele vunene bya xona lebyikulu,

xi komba ni hinkwavo va timbilu leto tenga.

₂Kambe mina ndzi lavile ku hambuka endleleni,

eku fambeni ka mina ndzi lo pona ku rheta ndzi wa,

₃hikuva ndzi naverile swa lavo homboloka,

lava humelelaka hambileswi va tikurisaka ngopfu.

₄Vanhu lava a va karhatiwi hi nchumu, va dya va xurha

va kondza va ya esirheni.

₅A va weli emakhombyeni kukota vanhu van'wana,

a va vonisiwi maxangu ku fana ni vanhu-kulobye.

₆Hikokwalaho ku tikurisa i vuhlalu bya vona bya le nhan'wini,

tihanyi i xiambalo xa vona.

₇Mahlo ya vona ma nyupela emafurheni ma nga ha vonaki.

kambe makungu ya vona ya le mbilwini ma tikomba swinene.

₈Va sandza van'wana, va vulavula leswo biha,

va kanela makungu yo xanisa lava nga hansi ka vona.

₉Va rhuketela Xikwembu xa le matilweni,

ni laha misaveni tindzimi ta vona a ti tsetseleli munhu.

₁₀Hikokwalaho, ni vanhu va Xikwembu va va namarhela,

va va dzunisa va nga voni xo biha eka vona.

₁₁Va vulavula va ku: “Xikwembu a xi tivi nchumu!

Xana loyi a nga henhla-henhla a nga vona yini xana?”

₁₂Lavo homboloka i vanhu vo tano;

minkarhi hinkwayo va le ku tiphineni, rifuwo ra vona ri ya ri andza.

₁₃Ku hanya eku lulameni ni ku chava ku endla xidyoho,

a swi ndzi pfunanga nchumu,

₁₄hikuva ndzi biwa hi makhombo siku rin'wana ni rin'wana,

mixo wun'wana ni wun'wana, ndzi le ku tshinyiweni.

₁₅Kambe loko onge ndzi vulavurile ku fana na vona,

a ndzi ta va ndzi dyohele vanhu va wena.

₁₆Mhaka leyi yi ndzi tikele ngopfu

loko ndzi yi anakanya,

₁₇ndzi kondza ndzi ya nghena exivandleni xa wena lexo hlawuleka we Xikwembu,

kutani hi kona ndzi twisiseke mahelele ya lavo homboloka.

₁₈We Xikwembu, u va veka laha ku rhetaka,

u va wisela entlhan'wini wa vuxisi bya vona.

₁₉Hi ku copeta ka tihlo,

va khomiwa hi ku chava va herisiwa, va kukuriwa va nyamalala.

₂₀Loko u fika, we N'wini wa hinkwaswo, va lahlekeriwa hi ndzhuti,

va hangalaka kukota norho nimixo.

₂₁Loko ndza ha khunguvanyekile emoyeni,

ni loko mbilu ya mina ya ha twa ku vava,

₂₂a ndzi hundzukile ntlunya, ndzi nga twisisi nchumu,

ndzi fana ni xiharhi emahlweni ka wena.

₂₃Hambiswiritano, a ndzi tshiki ku va na wena;

u ndzi khoma hi voko ra xinene,

₂₄u ndzi fambisa hi swiletelo swa wena,

kutani eku heteleleni, u ta ndzi amukela eku dzunekeni ka wena.

₂₅Xana ndzi nga va na mani ematilweni loko ku nga ri wena,

ni kwala misaveni ndzi nga ha navela yini, leswi ndzi nga na wena ke?

₂₆Emirini ni le moyeni ndzi nga hela matimba,

kambe Xikwembu hi xona xi ndzi tiyisaka xi ndzi katekisa.

₂₇Lava hambanaka na wena va nge poni, va ta lova,

hinkwavo lava va ku tshikaka, lava lwaka na wena, u ta va pfala milomo.

₂₈Loko ndzi ri mina, ndzi tsakela ku va kusuhi na wena we Xikwembu,

we HOSI N'wini wanga, ndzi kumile khokholo eka wena,

kutani ndzi ta twarisa hinkwaswo leswi u swi endleke.