Pisalema ya 84

₁We HOSI ya matimba hinkwawo,

swi tsakisa ngopfu ku va eTempeleni ya wena;

₂ndzi navela hi mbilu ya mina hinkwayo

ku fika exivaveni xa yindlu ya wena.

Hi miri ni moya, ndzi huwelela hi ku tsaka

eka wena Xikwembu lexi hanyaka.

₃We HOSI ya matimba hinkwawo,

u mufumi wa mina ni Xikwembu xanga!

Hambi swi ri swindzingiri swi kuma vutshamo eTempeleni,

na tona timbewulani ti aka swisaka kusuhi ni tialitari ta wena,

ti akela mavondlo ya tona.

₄Va katekile ngopfu lava tshamaka eTempeleni ya wena,

va ku dzunisa minkarhi hinkwayo.

₅Ku katekile vanhu lava kumaka matimba eka wena,

lava khomaka ndlela yo ya eYerusalema va tsakile.

₆Hambiloko va hundza enkoveni lowu omeke lowu vuriwaka Nkova wa Baka,

va wu kuma wu ri ni swihlovo,

naswona wu katekisiwile hi timpfula leto sungula.

₇Loko va famba, va engeteleriwa matimba masiku hinkwawo,

va ko va fika emahlweni ka wena eSiyoni, we Xikwembu.

₈We HOSI Xikwembu xa matimba hinkwawo, yingisa xikhongelo xa mina,

rhiya ndleve we Xikwembu xa va ka Yakobo.

₉Languta ni xitlhangu xa hina yi nga hosi ya tiko, wena Xikwembu,

u yi amukela hi tintswalo, yona muhlawuriwa wa wena.

₁₀Hakunene ku tshama siku rin'we ntsena eTempeleni ya wena,

swi tlula ku tshama masiku ya khume ra madzana kun'wana.

Ndzi ngo tsakela ku yima kunene enyangweni ya Tempele, we Xikwembu xanga,

ku ri na ku tshama ni lava va nga ku khongeriki.

₁₁HOSI Xikwembu i khokholo ni xitlhangu,

xi avela vanhu tintswalo ni ku dzuneka;

lava hanyaka hi ndlela leyi nkhensekaka,

HOSI Xikwembu xi va nyika minkateko.

₁₂We HOSI ya matimba hinkwawo,

ku katekile munhu loyi a ku tshembaka.