Pisalema ya 97

₁HOSI Xikwembu xa fuma, yimbelela we misava,

na n'wina matiko ya le kule, tsakani!

₂HOSI Xikwembu xi rhendzeriwe hi mapapa ya ntima ni munyama,

masungulo ya vuhosi bya xona i nawu ni ku lulama.

₃Ndzilo wu xi rhangela emahlweni,

wu herisa valala va xona matlhelo hinkwavo.

₄Xi voninga misava hi rihati ra xona,

matiko ma swi vona ma rhurhumela.

₅Tintshava ta n'oka kukota mafurha emahlweni ka HOSI Xikwembu,

xona N'wini wa misava hinkwayo.

₆Matilo ma twarisa ku lulama ka Xikwembu,

vanhu hinkwavo va hlalela ku kwetsima ka xona.

₇Hinkwavo lava khongelaka swikwembu swa swifaniso, va ta khomiwa hi tingana,

hikuva va tinyungubyisa hi leswi nga pfuniki nchumu.

Swikwembu leswi hinkwaswo a swi nkhinsamele HOSI Xikwembu!

₈We HOSI, va le Siyoni va swi twile, kutani va tsaka,

miti ya le Yuda yi ba nkulungwana hikwalaho ka maavanyisele ya wena.

₉We HOSI, u Xikwembu lexi nga henhla-henhla lexi fumaka misava hinkwayo,

swikwembu hinkwaswo swi le hansi ka wena.

₁₀N'wina mi rhandzaka HOSI Xikwembu, vengani leswo homboloka!

HOSI Xikwembu xi sirhelela vutomi bya malandza ya xona,

xi ma kutsula emavokweni ya lavo biha.

₁₁Lavo lulama va tlhavela hi ku vonakala,

lava nga ni timbilu to basa va kuma ku tsaka.

₁₂Titsakeleni eHosini n'wina lavo lulama,

mi twarisa vito ra yona lero hlawuleka.