Siraka 21

₁N'wananga, xana u dyohile ke? U nga tshuki u dyoha nakambe,

kambe khongela leswaku swidyoho leswi u swi endleke swi ta rivaleriwa.

₂Baleka xidyoho tanihi nyoka.

Loko u xi tshinelela, xidyoho xi ta ku luma.

Meno ya xona ma fana ni meno ya nghala,

ma dlaya mimoya wa vanhu.

₃Vuhomboloki hinkwabyo byi kariha kukota tlhari leri lotiweke matlhelo mambirhi,

swilondza swa byona swi tsandza vatshunguri.

₄Ku rhukana ni ku tiarisa swi hangalasa rifuwo;

kutani yindlu ya loyi a tikurisaka yi ta mbundzumuxiwa.

₅Xikwembu xi yingisa swikombelo swa swisiwana,

xi hatlisa ku swi hlamula.

₆Loyi a vengaka ku tshinyiwa, wa dyoha,

kambe la chavaka Xikwembu, ú tisola hi mbilu ya yena hinkwayo.

₇Xivulavuri lexikulu xi duma ekule;

kambe la twisisaka, wa swi tiva loko a rheta ririmi.

₈Loyi a akaka yindlu ya yena hi mali leyi lombiweke,

ú fana ni loyi a hlengeletaka maribye ematshan'wini ya ku rhotela tihunyi ta vuxika.

₉Nhlengeletano ya vahomboloki yi fana ni xikatsa xa mavivi,

va ta tshwa hi ndzilo.

₁₀Ndlela ya vadyohi yi andlariwile hi maribye yo rhetela,

kambe yi yisa exivandleni xa vafi.

₁₁Loyi a hlayisaka nawu, wa tikhoma emiehleketweni ya yena,

loyi a chavaka HOSI Xikwembu hi ku hetiseka, ú ta kuma vutlhari.

₁₂La nga ehleketiki swinene, a nga dyondziseki,

kambe ku ni vutivi byin'wana lebyi vangaka mbitsi.

₁₃Vutivi bya munhu wo tlhariha byi fana ni ndhambi,

switsundzuxo swa yena swi kota xihlovo lexi mati ya xona ma nga phyiki.

₁₄Mianakanyo ya xiphukuphuku yi fana ni khuwana ro fayeka,

yi nga ka yi nga hlayisi vutivi.

₁₅Loko munhu wo twisisa a twa xivuriso,

ú ta xi dzunisa ni ku xi engetela.

Loko munhu wa vusopfa a xi twa, wa xi nyenya,

kutani a hatlisa ku xi rivala.

₁₆Ku yingisa xiphukuphuku swi fana ni ku khoma riendzo u rhwale ndzhwalo lowukulu,

kambe marito ya munhu wa vutlhari ma tsakisa.

₁₇Ku vulavula ka loyi a tlhariheke ka yingisiwa enhlengeletanweni,

kutani vanhu va kona va anakanya marito ya yena etimbilwini ta vona.

₁₈Vutlhari eka munhu wo kala mano a byi pfuni nchumu, byi fana ni yindlu leyi hindzimuxiweke,

kutani vutivi bya xiphunta i bulu ra hava.

₁₉Eka munhu wo pfumala miehleketo, switsundzuxo swi kotisa tinketani emilengeni ya yena,

swi fana ni tinsimbhi evokweni ra yena ra xinene.

₂₀Xiphukuphuku xi hleka swinene,

kambe la tlhariheke ú n'wayitela ntsena.

₂₁Eka munhu wa miehleketo, switsundzuxo swi fana ni swikhaviso swa nsuku,

swi kotisa masindza evokweni ra xinene.

₂₂Xiphukuphuku xi hatla xi nghena endlwini,

kambe munhu wa vutivi ú rindzela ehandle hi xichavo.

₂₃Xiphunta xi hlometela endlwini hi le nyangweni,

kambe munhu wa ndzhuti ú yima ehandle.

₂₄I mukhuva lowo biha ku yingisela hi le nyangweni,

swi khomisa munhu wa miehleketo tingana.

₂₅Vahlevi va jakatseka ntsena hi timhaka ta van'wana,

kambe lavo tlhariha va pima marito ya vona.

₂₆Swiphukuphuku swi hatlisa swi vulavula swi nga anakanyi nchumu,

kambe lavo tlhariha va xiyaxiya leswi va lavaka ku vulavula swona.

₂₇Loko muhomboloki a rhuketela nala wa yena, wa tirhuketela.

₂₈Loyi a hlevaka, wa tinyamisa,

kutani vaakelani va yena hinkwavo va n'wi venga.