Siraka 25

₁Ndzi tsakisiwa hi swilo swinharhu leswi landzelaka,

leswi swi sasekeke emahlweni ka Xikwembu ni vanhu:

ntwanano exikarhi ka vamakwavo, ni xinakulobye exikarhi ka vaakelani,

ni nuna ni nsati lava va hanyaka hi ku rhula.

₂Ndzi venga vanhu vanharhu lava landzelaka,

mahanyelo ya vona ma ndzi vavisa swinene:

xisiwana xa manyunyu, ni mufuwi wa mavunwa,

ni mukhalabye wa vuphukuphuku la oswaka.

₃Loko u nga dyondzi vutlhari evuhlangini bya wena,

u ta byi kuma eku dyuhaleni ka wena ke?

₄Ku avanyisa lokunene, ni switsundzuxo leswinene,

ni lavakulu lava baseke tinhloko, swa fambelana.

₅Vutlhari, ni ku twisisa, ni switsundzuxo leswi hetisekeke,

swi fambelana ni lava dyuhaleke ni lava chavisekaka.

₆Xidlodlo xa lava dyuhaleke i vutlhari lebyi enteke,

va tikurisa hi ku chava Xikwembu ntsena.

₇Ndzi ta ku boxela timhaka ta vanhu va 10 lava ndzi tsakeke ku va tiva,

ngopfu-ngopfu ndzi tsaka ku tiva loyi wa vu-10 exikarhi ka vona.

Ku ni munhu loyi a tsakisiwaka hi vana va yena,

ni un'wana loyi a langutelaka ku wa ka valala va yena.

₈Ku katekile ni loyi a nga ni nsati wo tlhariha,

[ni nuna ni nsati lava rhandzanaka,]

ni loyi a nga dyohangiki ni siku ni rin'we hi ku vulavula ka yena,

ni loyi a nga tirhelangiki munhu loyi wo pfumala vutivi.

₉Ku katekile ni loyi a nga ni munghana wa xiviri,

ni loyi vanhu va tsakaka ku n'wi yingisa.

₁₀Loyi a kumeke vutlhari i nkulukumba swinene!

Kambe ku hava na un'we loyi a tlulaka loyi a chavaka Xikwembu.

₁₁Ku chava Xikwembu ku tlula hinkwaswo,

loyi a xi chavaka a nga ringanisiwa na mani ke?

₁₂[Ku chava Xikwembu i masungulo ya ku xi rhandza,

ku pfumela eka xona i masungulo ya ku xi namarhela.]

₁₃A ku na xilondza xo vava ku fana ni rirhandzu leri vavisekeke,

ku hava maxangu yo ringana ni lawa ma vangiwaka hi vavasati.

₁₄Ku hava ku xaniseka loku tlulaka mahlomulo lama vangiwaka hi rivengo,

a ku na ku rihisela loku tlulaka ku rihisela ka valala.

₁₅Ku hava vuxungu byo tlula bya nyoka,

a ku na ku hlundzuka loku tlulaka ku hlundzuka ka wansati.

₁₆Swa antswa ndzi tshama ni nghala kumbe ni dragona,

ku ri ni ku tshama ni wansati wo biha.

₁₇Vubihi bya wansati byi dzwiharisa nghohe ya yena,

a fana ni bere yo leva.

₁₈Nuna wa yena ú fanele ku ya dya eka vaakelani,

laha a phofulaka ku vilela ka yena kona hi xiviti.

₁₉Vubihi byin'wana ni byin'wana a hi nchumu loko byi pimanisiwa ni vuntswaka bya wansati.

Khombo ra mudyohi a ri wele wansati loyi!

₂₀Wanuna wo rhula loyi a tshamaka ni nsati wo kariha,

ú fana ni mukhalabye loyi a khandziyaka xintshabyana xa sava.

₂₁U nga tshuki u phasiwa hi vumbhurhi bya wansati,

u nga naveli wansati [hikwalaho ka rifuwo ra yena.]

₂₂Emutini lowu nuna a hlayisiwaka hi nsati,

ku ni ku hlundzuka, ni ku tikurisa, ni tingana.

₂₃Wansati wa vuntswaka ú vavisa miehleketo ya nuna wa yena,

wa n'wi khunguvanyisa ni ku n'wi tlhava mbilu.

Wansati loyi a nga tsakisiki nuna wa yena,

ú n'wi endla wanuna wo pfumala mongo, wa matsolo yo gudlagudla.

₂₄Ku dyoha ku nghenile emisaveni hikwalaho ka wansati,

kutani hikwalaho ka yena hinkwerhu hi fanele ku fa.

₂₅U nga pfumeleli wansati wo homboloka ku endla ku rhandza ka yena,

tanihi leswi u nga pfumeleriki mati ku pfuta.

₂₆Loko a ala ku endla leswi u n'wi lerisaka swona,

hambana na yena!