1Vanhu vo tala va dyohile ku kuma rifuwo,
kutani loyi a lavaka ku fuwa, a nga na mhaka ni leswi humelelaka.
2Ku herisa ku xisana eku xaveni ni le ku xaviseni,
swi nonon'hwa ku fana ni ku humesa mhingu leyi beleriweke exikarhi ka maribye.
3Loko munhu a nga tiyanga ni ku hisekela ku chava Xikwembu,
muti wa yena wu ta hatla wu hangalasiwa.
Ku vulavula ku hlavutela ku titwa loku hetisekeke ka mbilu
4Rihlelo ri hambanyisa mavele ni mungu,
ku vulavula na kona ku komba vunene ni vubihi bya munhu.
5Tanihi swibya swa muvumbi leswi kamberiwaka exitikweni,
munhu ú kamberiwa hi marito ya yena.
6Mihandzu ya murhi yi komba hilaha wu hlayisiweke hakona,
kutani ku vulavula ka munhu ku hlavutela leswi nga kona embilwini ya yena.
7U nga tshuki u dzunisa munhu u nga si n'wi twa a vulavula,
hikuva munhu ú tikomba hi ku vulavula ka yena.
Ta vutshembeki
8Loko u landzelela leswo lulama, u ta swi kuma,
kutani u swi ambala tanihi xiambalo xo saseka ngopfu.
9Tinyanyana ta tinsiva to fana ti haha swin'we,
kutani vutshembeki byi le ka lava va titoloveteke byona.
10Tanihi nghala yi tumbelelaka swihari,
xidyoho na xona xi tumbelela lavo homboloka.
Ta ku vulavula ka vuphukuphuku
11Vakhongeri va vulavula hi vutlhari minkarhi hinkwayo,
kambe swiphukuphuku eku vulavuleni ka swona swi hundzuka tanihi n'weti.
12Loko u ri exikarhi ka swiphukuphuku, lava ndlela ya ku hambana na swona,
kambe loko u ri ni vanhu va miehleketo tshama na vona nkarhi wo leha.
13Ku vulavula ka swiphukuphuku ka nyenyetsa,
swidyoho leswikulu i mafenya eka swona.
14Ku vulavula ka vanhu va ndzhukano ku yimisa misisi ya lava va va yingisaka.
Loko vanhu vo tano va holova, van'wana va pfala tindleve.
15Swa vavisa ku twa ku rhuketelana ka lava tikurisaka,
ku holova ka vona ku pfuxa madzolonga.
Ta ku paluxa swihundla
16Munhu loyi a paluxaka swihundla, ú onha ku tshembana,
kutani a nga ka a nga kumi munghana wo tshembeka.
17Rhandza munghana wa wena ni ku n'wi tshemba,
kambe loko u paluxa swihundla swa yena, hambana na yena.
18Tanihi loyi a dlayaka nala wa yena,
na wena u herisile xinakulobye xa wena ni munhukuloni.
19Tanihi nyanyana leyi u yi tshikeke yi haha,
ni munghana wa wena loyi u hambaneke na yena, u nga ka u nga ha tlheli u n'wi kuma.
20U nga ha n'wi landzeleli, hikuva ú le kule na wena,
ú balekile tanihi mhunti entlhan'wini.
21Mbanga yi nga boheleriwa, ni ku rivalelana ku va kona endzhaku ka ndzhukano,
kambe loko u paluxa swihundla, u dlaya vunghana.
Ta ku xisetela
22Loyi a tshunyetaka mahlo, ú le ku lukeni ka mano layo biha,
kutani ku hava leswi swi nga n'wi sivelaka ku swi endla.
23Loko a ri na wena, ú vulavula leswinene, naswona ú nkhensa marito ya wena.
Kambe endzhaku ú ta hundzuluxa ku vulavula ka yena, a ku phasa hi marito ya wena.
24Ndzi vengile swilo swo tala, kambe ku hava leswi ndzi swi vengaka ku tlula munhu wo tano.
Hambi xi ri Xikwembu xa n'wi venga.
25Loyi a hoxelaka ribye ehenhla, ri ta wela enhlokweni ya yena,
kutani ku biwa u nga swi langutelanga ku vanga timbanga.
26La celaka rindzi, ú ta wela eka rona,
la rhiyaka ntlhamu, wu ta n'wi phasa.
27La endlaka swo biha swi ta vuya hi yena,
kutani a nga ka a nga tivi laha swi humaka kona.
28Lava tikurisaka va sandza ni ku rhukana van'wana,
kambe ku rihisela ku va yimelerile tanihi nghala.
29Lava tsakisiwaka hi ku hambuka ka mukhongeri, va ta phasiwa hi xirimbana,
kutani va ta xaniseka swinene va nga si fa.
Ta ku nyenya
30Vukari ni ku hlundzuka i swilo swa manyala,
kambe vadyohi va na swona.
