Siraka 35

₁Munhu loyi a hlayisaka nawu

wa Xikwembu, ú humesa magandzelo layo tala,

loyi a yingisaka swileriso swa xona ú humesa gandzelo ra xinakulobye.

₂Loyi a tlheriselaka hi tintswalo ú fana ni loyi a humesaka mapa lamanene,

kutani loyi a nyikaka swisiwana ú fana ni loyi a humesaka magandzelo ya ku nkhensa.

₃Ku tshika vuhunguki swi tsakisa HOSI Xikwembu,

kutani ku fularhela ku homboloka swi susa swidyoho.

₄U nga yi emahlweni ka Xikwembu u nga khomanga nchumu,

₅hikuva hinkwaswo leswi swi endliwa hi ku landzelela milawu ya Xikwembu.

₆Loko munhu wo lulama a humesa gandzelo, kutani mafurha ya rona ma tshonela alitarini,

ku nun'hwela ka rona ku tlhandlukela eka Loyi a nga henhla-henhla.

₇HOSI Xikwembu xi amukela magandzelo ya munhu wo lulama,

naswona xi nga ka xi nga ma rivali.

₈Dzunisa HOSI Xikwembu hi mbilu ya wena hinkwayo,

naswona u nga xi tsoni leswi u nga rhanga u swi tshovela.

₉Komba ntsako minkarhi hinkwayo,

loko u hanana ni loko u humesa vukhume bya wena.

₁₀Nyikela hi ku hanana eka HOSI Xikwembu

tanihi laha xi ku nyikeke hakona.

₁₁Hikuva hi xona HOSI Xikwembu lexi hakelaka minkarhi hinkwayo,

kutani xi ta ku tlherisela ka 7.

₁₂Kambe u nga xi sindzisi hi tinyiko, hikuva a xi nga ti amukeli,

naswona u nga tshembi magandzelo lama nga lulamangiki.

HOSI Xikwembu i muavanyisi wo lulama,

xi nga ka xi nga yi hi nghohe.

₁₃A xi tshiki vapfumari,

kambe xi yingisa xikhongelo xa loyi a xanisiwaka.

₁₄Xi nga ka xi nga honisi swirilo swa noni

ni swa n'wana loyi a nga feriwa hi vatswari.

₁₅Xana noni a yi rili,

loko yi ri karhi yi rhuketela loyi a yi xanisaka?

₁₆Loyi ntirho wa yena wu xi tsakisaka, HOSI Xikwembu xi ta n'wi amukela,

swikhongelo swa yena swa yingisiwa.

₁₇Swikhongelo swa munhu loyi a titsongahataka swi kongoma etilweni,

kutani a nge chaveleriwi swi kondza swi fika eka HOSI Xikwembu.

Munhu wo tano a nga tshiki ku khongela ku ko a hlamuriwa hi Loyi a nga henhla-henhla,

hikuva ú nga ta avanyisa lavanene hi ku lulama, a ba ni vahomboloki.

₁₈HOSI Xikwembu xi nga ka xi nga hlweli.

A xi lehiseli vahomboloki mbilu,

kambe xi ta fayetela marhambu ya lava pfumalaka tintswalo,

ni ku tirihisela eka vamatiko.

Xi ta dlayetela hinkwavo lava rhukaniweke,

ni ku herisa matimba ya tihosi leto homboloka.

₁₉Xi ta hakela vanhu ku ya hi miehleketo

ni swiendlo swa vona.

Xi ta tsakisa vanhu va xona

hi ku va avanyisa hi tintswalo.

₂₀Hi nkarhi wa mahlomulo tintswalo ta xona ti ta amukeriwa

tanihi mpfula leyi nelaka tiko ra dyandza.