Ta vuvabyi ni murhi
1Fundzha tin'anga hilaha ti faneleke hakona,
hikuva Xikwembu xi ti nyikile ntirho wa tona.
2Vutshila bya tona byi huma eka Loyi a nga henhla-henhla,
kutani tihosi ta tiko ti ti nkhensa hi tinyiko.
3Vutivi bya tona bya ti kurisa,
kutani vakulukumba va ti xixima.
4HOSI Xikwembu xi tumbuluxile mirhi,
kutani vanhu lavo tlhariha a va yi sandzi.
5Xana mati lama dzungaka a ma hundzuluxiwanga lama nwekaka hi ximudyana,
leswaku matimba ya xona ma tiveka ke?
6Xikwembu xi nyikile vanhu vutivi bya ku hanyisa van'wana,
leswaku hi xi dzunisa hikwalaho ka mahlori lama xi ma endlaka.
7N'anga yi hanyisa ni ku horisa vanhu hi mirhi,
8n'wamirhi ú yi hlanganisa, a endla ha yona marhingo ya yena.
Mintirho ya Xikwembu a yi nga heli,
kutani xi hanyisa vanhu hinkwavo.
9N'wananga, loko u vabya, u nga swi honisi,
kambe khongela Xikwembu, kutani xi ta ku hanyisa.
10Tisole ni ku tshika swidyoho swa wena hinkwaswo,
kutani u tiboha ku hanya hi ku lulama minkarhi hinkwayo.
11Humesela Xikwembu mirhi ya risuna ni mhamba ya mapa lamanene,
[chela mafurha layo tala hilaha u swi kotaka hakona ehenhla ka magandzelo ya wena.]
12Vita n'anga leyi tumbuluxiweke hi Xikwembu
leswaku yi ta ka wena,
u nga pfumeli leswaku yi ku tshika, hikuva u fanele ku pfuniwa hi yona.
13Nkarhi wun'wana u ta hanyisiwa hi n'anga ntsena,
14kutani yi ta khongela Xikwembu
leswaku xi yi nyika matimba ya ku hanyisa
ni ku horisa lava vabyaka.
15Kambe loyi a dyohelaka Xikwembu,
ú fanele ku vabya.
Ta ku rilela lava feke
16N'wananga, loko munhu a nga ha ri kona, u fanele ku ba nkosi.
Rila swinene ku komba leswaku mbilu ya wena yi vavisekile ngopfu.
Vuyetela ntsumbu wa yena hi ndlela leyi fanelaka,
kutani famba u ya n'wi lahla.
17Rila hi mbitsi, u ba nkosi ku tlula mpimo,
n'wi rilele masiku lama fanelaka.
N'wi rilele siku rin'we kumbe masiku mambirhi leswaku van'wana va nga ku veki nandzu,
kutani u tikhoma ni ku tichavelela.
18Gome ri nga ta ku vabyisa
ni ku ku lovisa.
19Gome ri tshama ni lava feriweke,
kambe a hi vutlhari ku ri pfumelela ku ku endla mupfumari.
20U nga pfumeli leswaku gome ri ku hlula,
kambe ri hlule, u tsundzuka leswaku hinkwerhu hi fanele ku fa.
21U nga rivali leswaku ku hava ni ndlela yo humesa mufi ematimbeni ya rifu,
gome ra wena a ri n'wi pfuni nikutsongo, kambe ra ku vavisa.
22Na wena u ta fa ku fana na yena.
Namuntlha ku file yena, mundzuku ku ta fa wena.
23Loko vafi va lahliwile, u nga va khumbuli nkarhi wo leha,
va fambile, kutani tichavelele.
Ta ku dyondza ni mintirho ya mavoko
24Mudyondzi ú fanele ku va ni nkarhi wa ku dyondza loko a lava ku tlhariha,
ú fanele ku ntshunxiwa eka tifanelo tin'wana.
25Xana murimi ú ta kuma vutivi hi ndlela yihi,
loko hinkwaswo leswi a swi navelaka ku ri ku kuma nhonga yo khayima swifuwo,
ni ku pana tihavi, ni ku ti fambisa entirhweni wa tona,
ni ku vulavula hi ta tinkuzi ke?
26Ú tikarhata swinene ku rima masimu ya yena,
ú tirha nivusiku ku nyika marhole ya yena mahlanga.
27Swi tano ni vavatli ni vatirhi van'wana lava tivaka ntirho wa vona swinene,
lava tirhaka vusiku ni nhlekanhi.
Va kovotla maribye ya nkoka,
va endla hi vukheta swikombiso leswo tala swo hambana-hambana.
Va tikarhata ku endla swikombiso leswi ringanaka swilo leswi nga kona,
kutani va tirha nivusiku ku heta ntirho wa vona.
28Swi tano ni vafuri va tinsimbhi lava tshamaka eka xigalanyundzu,
lava tikarhataka ku tirhisa tinsimbhi ta kona.
Ndzilo wu hisa xikandza xa vona,
va dzuka swinene kusuhi ni khele ra ndzilo.
Va twa minkarhi hinkwayo ku ba ka nyundzu,
va xiyaxiya hi mahlo lexi va karhi va xi endlaka.
Va tikarhata ngopfu ku heta ntirho wa vona,
kutani va tirha nivusiku ku kovotla hi ku hetiseka swifaniso swa kona.
29Swi tano ni muvumbi wa timbita entirhweni wa yena wa ku vumba.
Ú kiringisa vhilwa ra yena hi milenge ya yena.
Ú xiyaxiya ntirho wa mavoko ya yena,
a tikarhata ku hlaya swibya leswi a swi vumbeke.
30Ú pfuva vumba hi milenge ya yena,
kutani a vumba swibya hi mavoko ya yena.
Ú tikarhata ku swi phatimisa swinene,
a tirha nivusiku ku basisa khele ra ndzilo.
31Vanhu lava hinkwavo va tirha hi vutshila hi mavoko ya vona,
va tiva swinene mintirho ya vona.
32Loko va nga ri kona miti a yi akiwi,
kutani a ku na munhu loyi a yi endzelaka ni ku hanya eka yona.
33Vanhu lava a va hlawuriwi ku va swirho swa huvo ya vakulukumba va tiko,
a va tlakusiwi eka xiyimo xa le henhla.
A va vekiwi ku va vaavanyisi,
timhaka leti tsemiwaka ehubyeni a va ti twisisi.
A va tiviwi hi vutivi kumbe hi vutlhari bya vona,
ku vula swivuriso a va swi lavi.
34Kambe va tiyisa matshamele ya vanhu hinkwavo hi mintirho ya vona,
kutani loko va khongela, va khongelela mintirho ya vona.
