Ta mahlomulo ya vutomi bya vanhu
1Munhu un'wana ni un'wana ú nyikiwile mintirho yo tala,
vana hinkwavo va Adamu va rhwexiwe joko ro tika,
ku sungula siku ra ku velekiwa ka vona
ku ya fika siku leri va tlhelelaka emisaveni, leyi nga mana wa vona.
2Va tisohasoha ni ku chava
ni ku kanakana loko va ri karhi va ehleketa siku ra ku fa ka vona.
3Hambi tihosi leti tshamaka eswitulwini swa tona leswo saseka ngopfu,
kumbe swisiwana leswi tshamaka entshurini ni le nkumeni,
4kumbe lava ambalaka swiambalo swa xivunguvungu ni tiharhi,
kumbe lava ambalaka leswo khwaxa,
5evutomini bya vona va kuma hinkwavo vukari, ni mavondzo, ni mikitsikitsi,
ni mpfilumpfilu, ni rivengo, ni madzolonga, ni ku chava ku fa.
Nivusiku loko va etlele,
va tsandzeka ku wisisa byongo.
6Vusiku byin'wana va etlela katsongo, byin'wanyana a va etleli nanchumu,
va karhatiwa hi miehleketo ya vona tanihi ninhlekanhi.
Va vumbuluka-vumbuluka, vurhonga byi ko byi tshwuka.
Va lorha va ri karhi va baleka enyimpini,
7kambe loko va lava ku khomiwa, va pfuka,
kutani va tsaka hikuva ku chava ka vona a ku nga ri ka nchumu.
8-9Rifu, ni ku dlayiwa, ni madzolonga, ni banga,
ni makhombo, ni tindlala, ni ku xaniseka, ni mintungu,
swi humelela eka swivumbiwa hinkwaswo, hambi swi ri swifuwo kumbe vanhu,
kambe eka lavo homboloka swi humelela ka 7.
10Hinkwaswo swi tumbuluxeriwile lavo homboloka,
kutani ndhambi ya mati yi vangiwile hi vona.
11Hinkwaswo leswi humesiwaka emisaveni swi tlhelela eka yona,
tanihi mati hinkwawo lama khulukelaka elwandle.
Ta hakelo ya vubihi
12Ku sindzisa munhu hi tinyiko ni leswo homboloka swi ta nyamalala,
kambe ku tshembeka ku ta va kona hilaha ku nga heriki.
13Rifuwo ra muhomboloki ri fana ni xinambyana lexi hatlaka xi oma,
ri hatla ri nyamalala tanihi mpfumawulo wa ku duma ka tilo.
14Munhu wo hanana ú ta tsakisiwa,
kambe vadyohi va ta herisiwa makumu.
15Vana va vahomboloki va nge veleki vana vo tala,
va fana ni swimilana leswi timitsu ta swona ti milaka emaribyeni,
16va kotisa mahlanga lama milaka ematlhelweni ya nkova,
ma tsuvuriwa ku nga si tsuvuriwa byanyi.
17Musa ni ku nyika swisiwana
swi ta va kona hilaha ku nga heriki.
Ta ntsako wa vutomi
18Ku tirhela van'wana ni ku titirhela swi tsakisa vanhu,
kambe ku kuma xuma swi tsakisa ku tlula
swiendlo leswi swimbirhi.
19Ku kuma vana ni ku aka muti swi endla leswaku munhu a ta tsundzukiwa,
[kambe swa antswa ku kuma vutlhari.
Ku fuwa tihomu ni mintanga swi endla leswaku munhu a tiviwa swinene]
kambe swa antswa ku va ni nsati loyi a n'wi rhandzaka.
20Vhinyo ni vuyimbeleri swi tsakisa timbilu ta vanhu,
kambe vukati bya ntsako bya antswa, byi tlula swona.
21Ku chaya switiringo ni tiharipa swi tsokombela swinene,
kambe swi tluriwa hi ku yimbelela loku tsakisaka.
22Ku saseka ni vumbhurhi swi tsakisa mahlo ya vanhu,
kambe swimilana swa rihlaza swi tsakisa ku tlula leswi swimbirhi.
23Vanghana ni vanakulobye lavanene a va karhati nikutsongo,
kambe wansati wa vutlhari wa antswa, ú tlula vona.
24Vamakwavo ni vapfuni va pfuniwa enkarhini wa khombo,
kambe ku nyika swisiwana swi pfuna ku tlula vona.
25Nsuku ni silivhere swi hlayisa vanhu,
kambe ku tshemba switsundzuxo leswinene ku tlula swona.
26Rifuwo ni matimba swa tiyisa,
kambe ku chava Xikwembu ka tiyisa, ku tlula swona.
Loko munhu a chava Xikwembu a nga pfumali nchumu,
a nga faneriwi ku pfuniwa hi swin'wana.
27Ku chava Xikwembu ku fana ni ntanga lowu katekisiweke,
ku sirhelela munhu ku tlula ku dzuneka kun'wana ni kun'wana.
Ta ku kombela
28N'wananga, u nga hanyi tanihi mukomberi,
swa antswa ku fa ku tlula ku kombela minkarhi hinkwayo.
29Ku langutela swakudya eka van'wana minkarhi hinkwayo,
a hi vutomi.
Ku nyikiwa swakudya hi van'wana swa nyamisa.
Ku kombela minkarhi hinkwayo swi vavisa mbilu ya munhu wa miehleketo.
30Ku kombela swa nandziha enon'weni wa mukomberi wo homboloka,
kambe swa n'wi vavisa swinene endzeni.
