Ta ku dzuneka ka Xikwembu etimhakeni ta vatatana
1Sweswi a hi dzuniseni vavanuna lava tivekaka swinene,
lava nga vatata wa hina va khale.
2HOSI Xikwembu xi va averile ku dzuneka lokukulu
ni matimba ya xona ka ha ri eku sunguleni.
3Van'wana a va ri tihosi,
van'wana a va tiviwa hikwalaho ka matimba ya vona.
Van'wana a va ri vatsundzuxi va vutlhari,
van'wana a va nyikiwile ku profeta.
4Van'wana a va ri varhangeri lava kanelaka timhaka ta vanhu,
van'wana a va ri vafumi lava vekaka milawu ematikweni.
Van'wana a va ri vanhu va vutivi lava vulavulaka hi vutlhari,
[van'wana a va ri vanhu lava vulavulaka swivuriso leswi faneleke.]
5Van'wana a va ri vaphati,
van'wana a va ri vasumi va tinsimu.
6Van'wana a va ri vafuwi
lava hanyaka hi ku rhula emakaya ya vona.
7Hinkwavo vanhu lava a va ri lava tivekaka loko va ha hanya,
va fundzhiwa hi lava hanyeke enkarhini wa vona.
8Van'wana va siyile vito lerinene,
kutani va ha dzunisiwa ninamuntlha.
9Van'wana a va ha tsundzukiwi,
va nyamalarile onge a va kalanga va hanya,
va file kutani va rivariwile.
Swi tano ni vana va vona.
10Kambe hina hi dzunisa vavanuna lavanene lava.
Swiendlo swa vona leswo lulama swi nga ka swi nga rivariwi ni siku ni rin'we.
11Mavito lamanene ya vona ma ta tsundzukiwa hi vatukulu va vona,
ma ta va ndzhaka eka vona.
12Hikwalaho ka leswi vatata wa vona va endleke swona,
vatukulu va vona va ta hlayisa ntwanano wa HOSI Xikwembu minkarhi hinkwayo.
13Va ta va kona hilaha ku nga heriki,
mavito ya vona ma nga ka ma nga nyamalali.
14Mintsumbu ya vona yi lahliwile hi ku rhula,
kutani mavito ya vona ma tsundzukiwa hilaha ku nga heriki.
15Vanhu vambe va ta twarisa vutlhari bya vona,
vanhu va HOSI Xikwembu va va dzunisa.
Ta Enoko
16Enoko a a tsakisile HOSI Xikwembu, kutani ú tlakuriwile a ya ehenhla.
Ú vile xikombiso xa ku tisola eka vanhu va minkarhi hinkwayo.
Ta Nowa
17Nowa a a ri munhu wo lulama, loyi a tsakisaka Xikwembu ku tlula vanhu hinkwavo.
Loko vanhu va herisiwile hi ndhambi ya mati, hi yena la sunguleke rixaka ra vanhu nakambe.
Loko ndhambi ya mati yi hela,
vanhu va ve kona emisaveni hikwalaho ka yena.
18HOSI Xikwembu xi endlile ntwanano lowu nga heriki na yena,
xi n'wi tshembisile leswaku ni siku ni rin'we swivumbiwa swi nge he pfuki swi herisiwile hi ndhambi ya mati.
Ta Abrahama
19Abrahama ú vile tata wa vanhu va matiko layo tala,
vito ra yena ri hava xivati.
20Ú hlayisile nawu wa Loyi a nga henhla-henhla,
loyi a endleke ntwanano na yena,
lowu kombisiwaka emirini wa yena hi ku yimbisiwa.
Kutani siku a ringiweke, ú kumiwile a ri loyi a tshembekeke.
21Kutani HOSI Xikwembu xi n'wi tshembisile hi ku hlambanya xi ku:
“Ndzi katekisa tinxaka hinkwato ta misava hikwalaho ka vatukulu va wena.
Va ta tsandza vahlayi ku fana ni ntshuri wa misava,
va ta fundzhiwa ku tlula vanhu hinkwavo.
Ndzi ta va nyika tiko leri navaka ku sukela lwandle rin'wana, ri ya fika eka lerin'wana,
ri sukela nambu wa Yufrata, ri ya fika emakun'wini ya misava.”
Ta Isaka na Yakobo
22HOSI Xikwembu xi endlile ntwanano lowu ni le ka Isaka,
hikwalaho ka Abrahama, tata wa yena.
23Xi tlhela xi wu endla na Yakobo ni ku n'wi tshemba
leswaku xi ta katekisa tinxaka hinkwato ta misava hikwalaho ka vatukulu va yena.
Xi n'wi hlambanyile leswaku xi ta n'wi katekisa,
xi n'wi nyika tiko ra Israele leri nga ta va ndzhaka ya yena,
kutani xi avanyisile tiko leri hi miganga
leyi ringanaka tinyimba ta 12 ta Vaisraele.
