Siraka 6

₁Vito lero biha ri vanga tingana ni ku soriwa,

swi tano ni le ka mudyohi wa milomu mimbirhi.

₂U nga tshuki u tikurisa hi miehleketo ya wena,

hikuva moya wa wena wu nga handzuriwa tanihi xitlakati.

₃U ta sala u ri tanihi murhi lowu feke,

lowu nga hava matluka ni mihandzu.

₄Ku navela loko biha ku ta ku herisa,

ku ku hundzula xihlekiso eka valala va wena.

₅Ku hlamula lokunene ku andzisa vanghana,

nomu wa tintswalo wa engetela ku fundzhana.

₆Twanana ni lavo tala,

kambe amukela switsundzuxo swa munhu un'we exikarhi ka vanhu va gidi.

₇Kuma munghana hi ku rhanga u n'wi xiyaxiya,

u nga hatlisi ku n'wi tshemba.

₈Van'wana va va vanghana va wena loko va vuyeriwa,

kambe loko u ri ekhombyeni va ta ku tshika.

₉Ku ni vanghana lava hundzukaka valala,

kutani va ku khomisa tingana hi ku paluxa timholovo ta n'wina eka van'wana.

₁₀Vanghana van'wana vo dya na wena,

kambe loko u ri ekhombyeni a va ha ku pfuni.

₁₁Loko swa ha ku fambela kahle va ta ku namarhela tanihi ndzhuti,

va va ni rito ni le ka malandza ya wena.

₁₂Kambe loko swi ku helela, va ku hundzukela,

va nga ha lavi ni ku ku vona.

₁₃Hambana ni valala va wena,

u tivonela eka vanghana va wena.

₁₄Munghana wo tshembeka i xisirhelelo lexi tiyeke,

loyi a n'wi kumeke ú kumile xa nkoka.

₁₅Ku hava nchumu wa nkoka lowu tlulaka munghana lowo tshembeka,

ku hetiseka ka yena a ku pimiwi.

₁₆Ú fana ni murhi lowu hanyisaka vanhu,

ú kumiwa ntsena hi lava chavaka HOSI Xikwembu.

₁₇Loyi a chavaka Xikwembu ú ni vanghana va xiviri,

hikuva ú va tirhela kukota loko a titirhela.

₁₈N'wananga, tilavele vutlhari ku sukela evuhlangini bya wena,

leswaku ni loko u kurile u ta byi kuma.

₁₉Byi lave tanihi loyi a rimaka masimu ya yena ni ku byala swimilana eka wona,

yimela ntshovelo lowu byi nga ta ku nyika wona.

U fanele ku byi tirhela nkarhinyana,

kutani ku nga ri khale u ta dya mihandzu ya byona.

₂₀Byi kumeka byi tika eka lava nga kotiki ku tikhoma,

lava kalaka mano va nga ka va nga tshami na byona.

₂₁Byi va tikela tanihi ribye lerikulu,

va hatla va byi cukumeta.

₂₂Ku tlhariha i ku tilaya,

kutani lava va swi kumaka sweswo, a va talanga.

₂₃N'wananga, ndzi yingise,

u nga tshiki switsundzuxo swa mina.

₂₄Tsimba milenge ya wena hi tinsimbhi ta vutlhari,

rhwala joko ra byona enhan'wini ya wena.

₂₅Byi rhwale emakatleni ya wena,

u nga byi nyenyi loko byi ku boha.

₂₆Byi rhandze hi moya wa wena hinkwawo,

landza swileriso swa byona hi mbilu ya wena hinkwayo.

₂₇Byi lave hi matimba ya wena hinkwawo, kutani byi ta tihlavutela eka wena.

Loko u byi kumile, u nga byi tshiki.

₂₈Eku heteleleni u ta kuma ku rhula eka byona,

kutani byi ta ku tsakisa.

₂₉Tinsimbhi ta byona ti ta hundzuka swisirhelelo eka wena,

joko enhan'wini ya wena ri ta hundzuka vuhlalu bya nkoka.

₃₀Joko ra byona ri ta va vuhlalu bya nsuku,

tinsimbhi ta byona ti ta va tingoti ta xivunguvungu.

₃₁U ta ambala vutlhari tanihi xiambalo xa vuhosi,

u ta byi tlhandleka enhlokweni ya wena kukotisa harhi leyi tsakisaka.

₃₂N'wananga, loko u swi lava u ta dyondza.

Loko u chivirikela vutlhari, u ta va la tlhariheke.

₃₃Loko u rhandza ku yingisa, u ta kuma vutivi ni vutlhari.

₃₄Famba enhlengeletanweni ya vakulukumba.

Loko ku ri ni munhu wa vutlhari exikarhi ka vona, n'wi namarhele.

₃₅Yingisa vanhu lava vulavulaka hi ta Xikwembu,

u nga pfumeli leswaku swivuriso swa vutlhari swi ku chupukela.

₃₆Loko u kuma munhu wo twisisa, n'wi endzele nimpundzu,

hlakata swikhandziyo swa yindlu ya yena hi milenge ya wena.

₃₇Dyondza nawu wa HOSI Xikwembu,

wu anakanye vusiku ni nhlekanhi.

HOSI Xikwembu xi ta ku nyika ku twisisa

ni vutlhari lebyi u byi navelaka.