Susana 1

₁A ku ri ni wanuna loyi a a tshama eBabilona. Vito ra yena a a ri Yoyakimi. ₂A a tekile Susana n'wana Hilkiya, wansati wo saseka swinene, loyi a a chava Xikwembu. ₃Vatswari va Susana a va lulamile, kutani a va dyondzisile n'wana wa vona wa xisati ku hanya hi nawu wa Muxe. ₄Loko a ri yena Yoyakimi a a fumile ngopfu. A a ri ni ntanga lowukulu lowu a wu khomane ni yindlu ya yena; kutani Vayuda a va hamba va ta eka yena, hikuva a a fundzhiwa ku tlula hinkwavo. ₅Hi lembe rero ku hlawuriwile vakulukumba vambirhi ku va vaavanyisi. Mayelana na vona HOSI Xikwembu xi te: “Ku homboloka ku nghenile eBabilona hi vakulukumba lava a va fanele ku fambisa vanhu hi nawu.” ₆Vavanuna lava a va tala ku kumeka emutini wa Yoyakimi, kutani hinkwavo lava a va ri ni timhaka a va ya ka vona ku ya avanyiseriwa tona.

₇Loko vanhu va hangalakile ninhlekanhi, Susana a a tolovele ku famba-famba a tiolola entangeni wa nuna wa yena. ₈Masiku hinkwawo vakulukumba lava vambirhi a va n'wi vona a ri karhi a nghena ni ku famba-famba kwale entangeni, kutani va sungula ku n'wi navela. ₉Va sungula ku taleriwa hi ku n'wi navela lero va kala va lahlekeriwa hi vukhongeri ni ku rivala ntirho wa vona wa vuavanyisi. ₁₀Hi vumbirhi bya vona a va taleriwe hi ku n'wi navela, kambe a va nga byelani leswi a va titwisa xiswona, ₁₁hikuva a swi va khomisa tingana ku tipaluxa, va kombana ku navela ka vona ku etlela na Susana. ₁₂Kutani a va hisekela ku n'wi vona masiku hinkwawo.

₁₃Siku rin'wana ninhlekanhi va byelana va ku: “A hi muke hikuva i nkarhi wa ku dya.” ₁₄Hi loko va huma va hambana; kambe hi vumbirhi bya vona va ya tlhela endleleni, kutani va ta va ta hlangana. Loko va konanisanile lexi xi va tlheriseke, va boxelana ku navela ka vona. Kutani hi vumbirhi bya vona va kungahata nkarhi lowu va nga kumaka Susana ha wona a ri yexe.

₁₅Kuteloko va ha rindzele nkarhi lowu, Susana a nghena entangeni ku kota masiku hinkwawo a ri ni malandza ya xisati mambirhi ntsena, a navela ku titimula, hikuva a ku hisa ngopfu. ₁₆A ku nga ri na munhu entangeni handle ka vakulumba lavambirhi lava a va tumberile va ri karhi va n'wi languta. ₁₇Susana a ku ka malandza ya yena ya xisati: “Ndzi tiseleni mafurha ni switolwa, kutani mi pfala tinyangwa ta ntanga leswaku ndzi ta hlamba.” ₁₈Ma endla hilaha a vuleke hakona: ma pfala tinyangwa ta ntanga, kutani ma huma hi nyangwa ya le tlhelweni ku ya n'wi tisela leswi a ma leriseke swona. A ma vonanga vakulukumba lavayani, hikuva a va tumberile.

₁₉Loko malandza ya xisati ma humile, vakulumba lava va humelela, va tsutsumela eka Susana va ku: ₂₀“Vona, tinyangwa ta ntanga ti pfariwile, a ku na munhu la hi vonaka; ha ku rhandza, kutani pfumela ku etlela na hina. ₂₁Loko u ala, hi ta ku lumbeta, hi vula leswaku hi ku kumile u ri ni jaha rin'wana, kutani leswi hi swona swi endleke leswaku u humesa malandza ya wena ya xisati entangeni.”

₂₂Susana a hefemulela henhla, kutani a ku: “A ku na ndlela yin'wana. Loko ndzo endla leswi mi swi lavaka i rifu eka mina; naswona loko ndzi ala, ndzi nga ka ndzi nga poni emavokweni ya n'wina. ₂₃Kambe ndzi hlawula ku mi alela, hambileswi ndzi nga ta ka ndzi nga poni eka n'wina, ku ri ni ku dyohela Xikwembu.” ₂₄Hiloko Susana a huwelela, vakulukumba lavambirhi va ri karhi va huwelela na vona, va n'wi lumbeta. ₂₅Kutani un'wana wa vona a tsutsuma a ya pfula tinyangwa ta ntanga.

₂₆Loko malandza ya muti ma twa ku huwelela entangeni, ma huma hi ku tsutsuma ma ya nghena hi nyangwa ya le tlhelo, ma lava ku vona leswaku Susana ú humeleriwile hi yini. ₂₇Kuteloko vakulukumba va hlamuserile mhaka ya vona, malandza ma khomiwa hi tingana ngopfu, hikuva a ku nga si tshama ku vuriwa swo tano hi Susana.

₂₈Hi siku leri tlhandlamaka, loko vanhu va hlengeletanile emutini wa Yoyakimi nuna wa Susana, vakulukumba lavambirhi na vona va ta va tiyimiserile ku dlayisa Susana hi ku n'wi lumbeta. ₂₉Emahlweni ka ntshungu va ku: “A ku landziwe Susana, n'wana Hilkiya, nsati wa Yoyakimi.” ₃₀Kunene Susana a landziwa, a ta ni vatswari va yena, ni vana va yena, ni maxaka ya yena hinkwawo. ₃₁Susana a a vumbekile swinene, a a ri mbhurhi. ₃₂Leswi a a funengetiwile xikandza, vavanuna lava vo homboloka va lerisa leswaku a fununguriwa, leswaku va ta titlonya hi vumbhurhi bya yena. ₃₃Kambe va ndyangu wa yena, vanghana ni hinkwavo lava n'wi voneke, va rila.

₃₄Kutani vakulukumba lavambirhi va suka va yima emahlweni ka ntshungu, va tlhandleka mavoko ya vona enhlokweni ya Susana. ₃₅Loko a ri yena a a languta ehenhla etilweni a ri karhi a rila, hikuva mbilu ya yena a yi tshemba HOSI Xikwembu. ₃₆Vakulukumba lavambirhi va ku: “Loko hi ri karhi hi tifambela entangeni, wansati loyi ú nghenile kona ni malandza mambirhi ya xisati, a pfala tinyangwa, kutani a ma humesa hi leya le tlhelo. ₃₇Hiloko jaha rin'wana leri a ri tumberile, ri ta eka yena, kutani va etlela swin'we. ₃₈Hina a hi ri etlhelweni rin'wana ra ntanga, kutani loko hi vona vubihi lebyi, hi tsutsuma hi ya eka vona. ₃₉Hi va vonile va singarhelana, kambe a hi kotanga ku khoma wanuna loyi, hikuva a a hi tlula hi matimba, kutani ú pfurile tinyangwa a baleka. ₄₀Hiloko hi khoma wansati loyi hi n'wi vutisa leswaku jaha leri i mani, kambe a nga hi byelanga. Vumbhoni bya hina hi byona lebyi.” ₄₁Ntshungu wu tshemba vumbhoni lebyi, hikuva a byi huma eka vakulukumba lava a va ri vaavanyisi va vona; loko a ri Susana, va n'wi avanyisela rifu.

₄₂Kutani Susana a khongela hi rito leri tlakukeke a ku: “We Xikwembu xa minkarhi hinkwayo, wena Mupaluxi wa swihundla, la tivaka swilo hinkwaswo swi nga si humelela, ₄₃wa swi tiva leswaku vavanuna lava va ndzi hehla hi vumbhoni byo hemba. Kutani sweswi ndzi fanele ku fa! Kambe a ndzi endlanga nchumu xa leswi va ndzi lumbetaka ha swona.”

₄₄Xikwembu xi twa xirilo xa Susana. ₄₅Loko a ri karhi a yisiwa eku dlaweni, Xikwembu xi pfuxa Moya lowo Kwetsima eka jaha leri a ri vuriwa Daniele; ₄₆kutani a huwelela a ku: “A ndzi na nandzu wa rifu ra wansati loyi!”

₄₇Vanhu hinkwavo va hundzulukela eka yena va ku: “U ri yini?” ₄₈Daniele a ku tsetserhele exikarhi ka vona a ku: “Mo va swiphukuphuku xana, n'wina Vaisraele? Xana manana loyi wa Muisraele, mi n'wi avanyisela rifu handle ka ku rhanga mi kambisisa ni ku lavisisa timhaka ta kona ke? ₄₉Tlhelelani ehubyeni, hikuva vavanuna lava va n'wi hehlile hi vumbhoni byo hemba.”

₅₀Vanhu hinkwavo va hatlisa va tlhelela ehubyeni. Kutani vakulukumba va tiko va ku ka Daniele: “Tana, u ta tshama na hina u hi hlamusela timhaka, hikuva Xikwembu xi ku nyikile vutlhari byo fana ni bya hina.”

₅₁Hiloko Daniele a ku ka vona: “Hambanisani vaavanyisi lava vambirhi, kutani ndzi ta va vutisisa.” ₅₂Loko vaavanyisi lava vambirhi va hambanyisiwile, Daniele a vitana un'we wa vona a ku ka yena: “Wena mukhalabye wa lunya, vubihi lebyi u byi endleke ku sukela khale byi humerile erivaleni namuntlha. ₅₃A wu nga avanyisi vanhu hi ndlela yo lulama; a wu boha lava nga riki na nandzu, u ntshunxa lava nga ni nandzu. Kasi HOSI Xikwembu xi te: ‘U nga tshuki u dlaya loyi a nga riki na nandzu kumbe loyi a lulameke.’ ₅₄Sweswi ke, loko hakunene u vonile jaha leri, ndzi byele leswi: xana a va ri hansi ka murhi wihi loko u va vona va etlele swin'we?” Yena a hlamula a ku: “A va ri ehansi ka murhi wa ximapana.”

₅₅Kutani Daniele a ku: “Hi swona! Vunwa bya wena byi ku petile nhloko, hikuva Xikwembu xi lerisile ntsumi ya xona ku ku pandza hi le xikarhi sweswi.”

₅₆Kutani Daniele a n'wi yimisa etlhelo, a va lerisa leswaku va tisa lo un'wana. Daniele a ku ka yena: “Wena wo hanya hi mikhuva ya Vakanana, hambiloko u ri Muyuda, vumbhurhi byi ku xisile ni ku navela ku thyakisile mbilu ya wena. ₅₇Leswi hi swona leswi n'wina vambirhi a mi endla vanhwana va Israele, va sindziseka ku etlela na n'wina hi ku chava; kambe nhwana loyi wa Muyuda a nga byi tiyiselanga vubihi bya n'wina. ₅₈Hiswona ke, ndzi byele: xana a va ri hansi ka murhi wihi loko u va kuma va etlele swin'we?” Yena a hlamula a ku: “A va ri ehansi ka nkuhlu wa rihlaza.”

₅₉Kutani Daniele a ku ka yena: “Hi swona, na wena vunwa bya wena byi ku petile nhloko, hikuva ntsumi ya Xikwembu yi yimile ni banga ra yona ku ku pulukanyisa hi le xikarhi, leswaku yi mi herisa hi vumbirhi bya n'wina.”

₆₀Kavaloko ntshungu hinkwawo wu huwelela hi matimba wu dzunisa Xikwembu lexi ponisaka lava va xi tshembaka. ₆₁Kutani va pfukela vakulukumba lavambirhi, hikuva Daniele a a va bohile hi ku vulavula ka vona loko va humesa vumbhoni byo hemba. ₆₂Hiloko va va endla hi ku biha loku a va kungele ku endla warikwavo: hi ku landza nawu wa Muxe, va va dlaya. Kutani siku rolero ku ponisiwa eku feni munhu loyi a nga riki na nandzu. ₆₃Kavaloko Hilkiya ni nsati wa yena xikan'we na Yoyakimi nuna wa Susana ni maxaka ya vona hinkwawo va dzunisa Xikwembu, hikuva Susana ú kumekile a ri hava xisandzu. ₆₄Kutani ku sukela siku rero, Daniele a va ni ndhuma leyikulu exikarhi ka varikwavo.