Vutlhari 1

₁Rhandzani ku lulama, n'wina tihosi ta misava,

anakanyani HOSI Xikwembu hi moya lowunene,

mi xi lava hi timbilu ta n'wina hinkwato.

₂Xikwembu xi kumiwa hi lava va nga xi ringiki,

xi tikomba eka lava va xi tshembaka.

₃Miehleketo yo homboloka yi hambanyisa vanhu ni Xikwembu,

loko vanhu vo kala mano va xi ringa, matimba ya xona ma va khomisa tingana.

₄Vutlhari byi nge kumeki eka muhomboloki,

byi nga ka byi nga tshami eka munhu loyi a nga hlonga ra xidyoho.

₅Vahlawuriwa hinkwavo va Xikwembu va fambela ekule ni vukanganyisi,

miehleketo ya vuphukuphuku va hambana na yona,

va khomiwa hi tingana loko ku endliwa leswo homboloka.

₆Vutlhari i moya lowu tsakisaka vanhu,

a byi nga rivaleli lava sandzaka Xikwembu,

hikuva Xikwembu xi tiva leswi nga timbilwini ta vona ni mianakanyo ya vona,

marito ya vona hinkwawo xa ma twa.

₇Moya wa HOSI Xikwembu wu tata misava hinkwayo,

vutlhari lebyi hlanganisaka hinkwaswo hi fanelo, byi tiva ni marito hinkwawo ya vanhu.

₈A ku nga poni na un'we loyi a vulavulaka leswo homboloka,

ku nga ri khale ú ta biwa hilaha swi fanelaka hakona.

₉Makungu ya vahomboloki ma ta kambisisiwa,

marito ya vona ma ta tisiwa eka HOSI Xikwembu,

kutani va ta biwa hi ndlela leyi fanelaka ku homboloka ka vona.

₁₀Xikwembu xi ni ndleve ya rilaveta, xi twa hinkwaswo,

xi twa ni ku dzumadzuma hinkwako.

₁₁Ku n'unun'uta a swi pfuni nchumu, swi tshikeni!

Bohani ririmi, mi nga sandzi van'wana,

hikuva ku hava rito ra le xihundleni leri nga vangiki swin'wana.

Vunwa byi dlaya moya wa munhu.

₁₂U nga tilaveli rifu hi swidyoho swa wena,

hi swiendlo swa wena u nga tivangeli ku herisiwa.

₁₃Xikwembu a xi tumbuluxanga rifu,

a xi tsakeri rifu ra leswi hanyaka.

₁₄Xi tumbuluxile swilo hinkwaswo leswaku swi va kona,

swivumbiwa hinkwaswo swa xona swi lulamile ni ku hetiseka,

a ku na vuxungu lebyi dlayaka eka swona.

E-e, rifu a ri fumi misava,

₁₅hikuva ku lulama ka Xikwembu a ku na ku hela.

₁₆Lavo homboloka va tivangele rifu hi marito ni swiendlo swa vona leswo biha,

va ri naverile tanihi murhandziwa,

va endlile ntwanano na rona.

Hikokwalaho swa va boha ku va vanhu va rona.