Vutlhari 4

₁Ku tenga ku tlula ku veleka vana.

Munhu wo tenga ú tiviwa hi vanhu ni Xikwembu,

kutani ú ta tsundzukiwa hilaha ku nga heriki.

₂Vanhu va n'wi encisa loko a ri kona;

loko a nga ha ri kona, va n'wi rila.

Ú famba a ambele harhi ya muhluri minkarhi hinkwayo,

eku lweni ka yena a khana, a kuma hakelo leyi nga nyamisekiki.

₃Vana va vanhu lava fularhelaka Xikwembu,

hambi va tele, a va nga pfuni nchumu.

I vana va vuoswi, va pfumala timitsu, a va tiyi.

₄Va fana ni mirhi leyi tswalaka matluka nkarhinyana,

kambe a yi tiyanga, yi tsekatsekisiwa hi mheho, xidzedze xi yi simula.

₅Marhavi ya yona ma phatluriwa ma nga si kula,

mihandzu ya yona a yi vupfi, a yi pfuni nchumu.

₆Vana va vuoswi va ta va timbhoni ta swidyoho swa vatswari va vona,

siku leri Xikwembu xi nga ta va avanyisa.

₇Kasi lavo lulama, hambiloko va fa va nga si dyuhala,

va ta kuma ku wisa.

₈Vukulukumba a byi ti

hi ku dyuhala ntsena,

₉kambe byi tisiwa hi vutlhari ni ku lulama

leswi kombisaka ku kula loku hetisekeke.

₁₀A ku ri ni munhu un'wana la vuriwaka Enoko, loyi a a tsakisa Xikwembu, a rhandziwa hi xona.

Loko a ha hanya exikarhi ka vadyohi, Xikwembu xi n'wi tekile,

₁₁leswaku vubihi byi nga tshuki byi onha ku twisisa ka yena,

kumbe a nga tshuki a kanganyisiwa,

₁₂hikuva ku navela leswo homboloka swi tlunya vunene,

mianakanyo yo tenga yi onhiwa hi ku yingayinga.

₁₃Enoko ú hetisekile hi nkarhinyana,

onge a swi dyondzile malembe layo tala.

₁₄Xikwembu xi tsakisiwile hi vutomi bya yena,

kutani xi hatla xi n'wi susa emisaveni ya lavo homboloka.

Vanhu va swi vonile, kambe a va swi twisisanga.

A va kotanga ku dyondza

₁₅leswaku Xikwembu xi twela vanhu va xona vusiwana ni ku va komba musa,

xi sirhelela ni vahlawuriwa va xona.

₁₆Lavo lulama lava feke, va veka lavo homboloka lava va ha hanyaka enandzu.

Eku dyuhaleni ka vona vahomboloki va ta khomisiwa tingana hi lavantshwa lava hetisekeke.

₁₇Va ta vona rifu ra munhu wa vutlhari,

kambe va nge twisisi leswaku leyi i ndlela leyi Xikwembu xi n'wi ponisaka ha yona.

₁₈Va ta sola rifu ra munhu loyi wa vutlhari,

kambe va ta hlekuriwa hi Xikwembu.

Siku va faka, mintsumbu ya vona yi ta cukumetiwa ehandle.

Vafi na vona va ta va sandza ni ku va sola hilaha ku nga heriki.

₁₉Xikwembu xi ta va phyandlasa, va ri hava xo xi vula.

Tanihi tindlu leti tsekatsekisiweke emasungulweni ya tona, va ta hundzuka marhumbi.

Va ta nghenisiwa eku xanisekeni lokukulu,

va nga ha tsundzukiwi hi munhu.

₂₀Lavo homboloka va ta khomiwa hi ku chava siku leri swidyoho swa vona swi nga ta avanyisiwa ha rona.

Swiendlo swa vona leswo biha swi ta va avanyisa.