Vutlhari 8

₁Matimba ya vutlhari ma fika emakun'wini ya misava,

byi lulamisa swilo hinkwaswo.

₂Ndzi rhandzile vutlhari, ndzi byi lavile ku sukela evuhlangini bya mina,

ndzi navela ku byi endla nsati wa mina,

ku saseka ka byona ku koka mahlo ya mina.

₃Byi kurisa ku velekiwa ka byona ka vuhosi hi ku hanya ni Xikwembu,

kutani N'wini wa hinkwaswo wa byi rhandza.

₄Vutlhari byi averiwile vutivi bya Xikwembu,

byi xi pfuna emintirhweni ya xona.

₅Leswi rifuwo ri tsakisaka vanhu evutomini bya vona,

xana ku nga va ni xuma lexi tlulaka vutlhari, byi nga byona byi hetisaka hinkwaswo ke?

₆Naswona leswi ku twisisa ku pfunaka swinene,

xana i mani la nga lunghisaka leswi nga kona ku tlula vutlhari?

₇Eka loyi a rhandzaka ku lulama,

mintirho ya byona hi leyinene.

Tidyondzo ta byona i ku tikhoma ni ku ehleketa,

ku lulama ni vunhenha.

Ku hava leswi pfunaka vanhu ku tlula byona.

₈Loko ku ri na loyi a navelaka vutivi bya swilo leswo tala,

vutlhari byi tiva swa khale ni leswi swi nga ta humelela, bya swi bvumba.

Byi twisisa hinkwaswo leswi vanhu va swi vulavulaka, byi hlamusela ni mitshayito,

mahlori ni swihlamariso byi swi tiva swi nga si humelela,

byi bvumba ni makumu ya tinguva ni minkarhi.

₉Hikokwalaho ndzi tibohile ku teka vutlhari byi hanya na mina,

hi ku tiva leswaku byi ta ndzi nyika switsundzuxo leswinene,

ni ku ndzi tiyisa nhlana eku karhatekeni ni le mahlomulweni.

₁₀Hikwalaho ka byona, ndzi ta dzunisiwa exikarhi ka mintshungu,

hambiloko ndza ha ri lontshwa, vakulukumba va tiko va ta ndzi fundzha.

₁₁Ndzi ta avanyisa hi vutivi lebyi enteke,

vafumi van'wana va ta ndzi hlamala va navela.

₁₂Ndzi nga si vula nchumu, va ta ndzi langutela,

va ta rhiya ndleve loko ndzi ri karhi ndzi vulavula.

Hambiloko ndzi nga lehisa ku vulavula ka mina,

va ta pfala milomu, va miyela.

₁₃Hikwalaho ka byona ndzi ta kuma vutomi lebyi nga heriki,

lava nga ta hanya endzhaku ka mina a va nga ndzi rivali ni siku ni rin'we.

₁₄Ndzi ta fuma vanhu,

matiko ma ta ndzi yingisa.

₁₅Tihosi ta tihanyi ti ta ndzi chava loko ti twa ta mina,

ndzi ta va hosi leyinene eka vanhu va mina, enyimpini ndzi ta lwa hi vunhenha.

₁₆Loko ndzi nghena emutini wa mina, ndzi ta kuma ku wisa ndzi ri ni vutlhari,

hikuva ku va ni vunghana na byona, a ku vangi swivilelo,

ku hanya na byona a ku tisi ku vava, kambe ku nyika ntsako lowukulu.

₁₇Ndzi xiyaxiyile timhaka leti embilwini ya mina,

ndzi swi anakanyile emiehleketweni ya mina.

Kutani ndzi kumile leswaku vutomi lebyi nga heriki byi kumeka loko munhu a boha vuxaka ni vutlhari,

₁₈ni leswaku vunghana na byona swi tsakisa swinene.

Migingiriko ya byona yi hlengeleta rifuwo leri nga heriki.

Ku tshama na byona ku nyika ku twisisa,

ni ndhumo wu kumiwa eku vulavuleni na byona.

Kutani ndzi ringetile ku byi lava hi tindlela leto tala.

₁₉Ndzi katekisiwile ndza ha ri xihlangi,

ndzi nyikiwa moya lowunene,

₂₀ndzi nga ku, ndzi vile lonene,

kutani ndzi ve ni miri lowu tengeke.

₂₁Kambe ndzi vonile leswaku ndzi nga ka ndzi nga kumi vutlhari handle ka loko ndzi nyikiwa byona hi Xikwembu.

Kutani ndzi twisisile leswaku i Xikwembu ntsena lexi xi nga ndzi nyikaka byona.

Hiloko ndzi khongela ni ku kombela Xikwembu,

hi mbilu ya mina hinkwayo ndzi vula ndzi ku: