1 DITIRAFALO 11

₁Foo Baiseraele botlhe ba phuthegela kwa go Dafite kwa Heberone, ba re: “Bona, re lesapo la gago le nama ya gago. ₂E rile mo metlheng e e fetileng, e bong ka Saule a sa ntse a le kgosi, ya bo e le wena yo o bolotsang o ba o gorosa Baiseraele; mme Jehofa Modimo wa gago a go raya a re: ‘O tlaa otla batho ba me Baiseraele, o tlaa nna kgosana ya batho ba me Baiseraele.’ ” ₃Jalo bagolwane botlhe ba Iseraele ba ya kgosing kwa Heberone; mme Dafite a dira kgolagano nabo mo Heberone fa pele ga Jehofa; mme ba tlotsa Dafite, gore a nne kgosi ya Iseraele, ka fa lefokong la ga Jehofa ka Samuele.

₄Dafite le Baiseraele botlhe ba ya Jerusalema (ke one Jebuse); mme Bajebuse, banni ba lefatshe, ba bo ba le gone. ₅Banni ba Jebuse ba raya Dafite ba re: “Ga o ketla o tsena mono.” Le fa go ntse jalo Dafite a gapa kago e e thata ya phemelo ya Sione; ke one motse wa ga Dafite. ₆Dafite a re: “Le fa e le mang yo o bolayang Bajebuse pele o tlaa nna mogolo le molaodi.” Joabe morwa Seruia a palama pele, a dirwa mogolo. ₇Dafite a aga mo kagong e e thata ya phemelo; ke gone ka moo ba go bitsa ba re: Motse wa ga Dafite. ₈A aga motse mo tikologong, go tswa Milo go ya fela tikologong. Joabe a tsosolosa motse ntlheng e e setseng. ₉Dafite a nna a kokotlegelela pele fela; gonne Jehofa wa masomosome a na nae.

₁₀Jaana ba ke bone bagolo ba diganka tse Dafite o ne a na natso, ba ba itshupileng bathata ntlheng ya gagwe mo bogosing jwa gagwe, ba na le Baiseraele botlhe, go tla ba mo dira kgosi, ka fa lefokong la ga Jehofa ka ga Baiseraele.

₁₁E ke palo ya diganka tse Dafite o ne a na natso: Jašobeame, morwa motho mongwe wa Mohakemone, tlhogo ya ba bararo, o ne a ekela batho ba ba 300 a ba bolaya ka lerumo la gagwe, ka lobaka lo le longwe fela. ₁₂Morago ga gagwe ga bo go le Eleasare, morwa Doto, wa Moahoha, yo e ne e le mongwe wa diganka tse tharo. ₁₃Ene o ne a na le Dafite kwa Pasetamime, mme Bafilisitia ba ne ba phuthegetse tlhabano gone, kwa go ne go na le sebata teng se se emeng barele thata; mme batho ba bo ba tshaba fa pele ga Bafilisitia. ₁₄Ba ema mo gare ga sebata seo, ba se tlhabanela, ba bolaya Bafilisitia; mme Jehofa a ba golola ka phenyo e kgolo.

₁₅Batho ba le bararo mo bagolong ba ba 30 ba ya lefikeng kwa go Dafite, mo logageng lwa Atulame; mme ntwa ya Bafilisitia e ne e thibeletse mo molapong wa Refaime. ₁₆Dafite a bo a le mo kagong ya phemelo, ka lobaka loo, mme setlhopha sa masole a Bafilisitia se le mo Bethelehema. ₁₇Dafite a tlhologelelwa, a re: “Ke eletsa jang mongwe a ka nnosa metsi a sediba sa Bethelehema se se fa kgorong!” ₁₈Mme ba bararo ba thobeselela ntwa ya Bafilisitia, ba ga metsi mo sedibeng sa Bethelehema se se fa kgorong, ba a tsaya ba a isa kwa go Dafite; Dafite a gana go a nwa, a a tshololela Jehofa. ₁₉A re: “A Modimo wa me o go nkiletse, gore ke se ka ka dira selo se; a ke tlaa nwa madi a banna ba, ba ba beileng botshelo jwa bone mo bothateng? Gonne ba a lerile ka go tsenya botshelo jwa bone mo bothateng.” Ke gone ka moo a gana go a nwa. Diganka tse tharo tseo tsa dira dilo tse.

₂₀Abišai monnaa Joabe, e ne e le ene mogolo wa ba bararo gonne o na a ekela batho ba ba 300 lerumo la gagwe, a ba bolaya, mme a nna le leina mo go ba bararo. ₂₁Mo go ba bararo o na a le tlotlego bogolo go ba babedi, mme a dirwa molaodi wa bone; le fa go ntse jalo ga a ka a fitlha mo borarong jwa ntlha.

₂₂Benaia morwa Joiata, morwa monna mongwe wa seganka wa Kabeseele yo o ne a dirile ditiro tsa boganka, a bolaya bomorwa Ariele wa Moabe ba le babedi; le gone a ya a bolaya tau mo gare ga mokole mo lobakeng lwa kapoko. ₂₃A bolaya motho mongwe wa Moegepeto, e le monna yo o godileng thata, yo o boleele bo mabogo matlhano. Moegepeto o ne a tshotse lerumo le le tshwanang le mosipuri wa monyedi; a ya kwa go ene a tshotse thobane fela, a ya a phamola lerumo mo seatleng sa Moegepeto a mmolaya ka lerumo la gagwe. ₂₄Benaia morwa Joiata a dira dilo tse, a nna le leina mo digankeng tse tharo. ₂₅Bonang, o ne a le tlotlego bogolo go ba ba 30, a se ka a fitlha mo borarong jwa ntlha; Dafite a mo dira molaodi wa mophato wa gagwe o o mo dibelang.

₂₆Diganka tsa dintwa ke tse: Asahele monnaa Joabe, Elehanane morwa Doto wa Bethelehema; ₂₇Shamothe wa Moharore, Helese wa Mopelone; ₂₈Ire morwa Ikeše wa Motekowa, Abiesere wa Moanathothe; ₂₉Sibekai wa Mohušathe, Ilai wa Moahoha; ₃₀Maharai wa Monetofathe, Helete morwa Baana wa Monetofathe; ₃₁Ithai morwa Ribai wa Gibea wa bana ba Benjamine, Benaia wa Mopirathone; ₃₂Hurai wa melatswana ya Gaaše, Abiele wa Moarabathe; ₃₃Asemafethe wa Mobaharahume, Eliabe wa Mošaalabone; ₃₄bomorwa Hašeme wa Mogisone, Jonathane morwa Shage wa Moharara, ₃₅Ahiame morwa Sakare wa Moharara, Eliafale morwa Ure; ₃₆Hefere wa Momekerathe, Ahija wa Mopelone; ₃₇Hesero wa Mokaremele, Naarai morwa Esebai; ₃₈Joele morwa rraagwe Nathane, Mibehare morwa Hageri; ₃₉Seleke wa Moamone, Naharai wa Moberothe motshola dibolao wa ga Joabe morwa Seruia; ₄₀Ira wa Moithere, Garebe wa Moithere; ₄₁Uria wa Mohite, Sabate morwa Ahalai; ₄₂Adine morwa Shise wa Morubene; mogolo mongwe mo go Barubene, a na le batho ba le 30; ₄₃Hanane morwa Maaka, le Jehošafate wa Momithene; ₄₄Usia wa Moašeterathe, Shame le Jeiele bomorwa Hothame wa Moaroere; ₄₅Jediaele morwa Shimeri le Jobe monnawe, wa Motise; ₄₆Eliele wa Momahafa, le Jeribai le Jošafa bomorwa Elenaame, le Ithema wa Momoabe, ₄₇Eliele, le Obete, le Jaasiele wa Momesoba.