1 DITIRAFALO 12

₁Ba ke bone ba ba ileng kwa go Dafite kwa Sikelage, ka a sa ntse a iphitlhile ka ntlha ya ga Saule morwa Kiše; e le ba ba diganka, bathusi ba gagwe mo ntweng. ₂Ba ne ba tlhometse mara, ba itse go konopa ka maje, le go hula metswi ka bora ka letsogo le legolo le ka la molema; e le ba bomorwa rraagwe Saule boo rra Benjamine. ₃Yo mogolo e le Ahiesere, gape Joaše, bomorwa Shemaa wa Mogibeathe; le Jesiele, le Pelete bomorwa Asemafethe, le Beraka le Jehu wa Moanathothe, ₄le Išemaia wa Mogibeone, seganka mo go ba ba 30, a le molaodi wa ba ba masome mararo; le Jeremia, Jahasiele, Johanane le Josabate wa Mogeterathe; ₅Elusai, Jerimothe, Bealia, Shemaria le Shefatia wa Moharufa; ₆Elekana le Isešia, Asarele, Joesere le Jašobeame, e le Bakora, ₇le Joela le Sebadia bomorwa Jerohame wa Getore.

₈Ba Bagate ga itomololela kwa go Dafite kwa kagong ya phemelo mo nageng, diganka tse di pelokgale, e le banna ba ba rutilweng ntwa, ba ba itseng go hema ka thebe le lerumo, ba difatlhogo tsa bone di ne di tshwana jaaka tsa ditau, ba le lobelo jaaka mafele mo dithabeng, ₉yo mogolo e le Esere, wa bobedi Obadia, wa boraro Eliabe, ₁₀wa bone Mišemana wa botlhano Jeremia, ₁₁wa borataro Atai, wa bosupa Eliele, ₁₂wa bo 8 Johanane, wa bo 9 Elesabate, ₁₃wa lesome Jeremia, wa 11 Makebanai.

₁₄Bao ba bana ba ga Gate e ne e le balaodi ba ntwa; yo mmotlana mo go bone a le kana ka batho ba le lekgolo, yo mogolo a le kana ka ba le sekete. ₁₅Bao ke bone ba ba kgabagantseng noka ya Joretane ka kgwedi ya ntlha, noka e tletse letsitla; ba leleka batho botlhe ba melapo, ntlheng ya botlhabatsatsi, le ntlheng ya bophirimatsatsi.

₁₆Ga tla bangwe ba bana ba Benjamine le ba Juta kwa go Dafite mo kagong ya phemelo. ₁₇Mme Dafite a tswela go ba kgatlhantsha, a ba raya a re: “Fa lo tsile ka kagiso mo go nna go tlaa lo nthusa, pelo ya me e tlaa gokagana le lona; mme fa lo tsile go nkoka go ntsenya mo seatleng sa baba ba me, ka go se na tshiamololo mo diatleng tsa me, a Modimo wa borraetsho o go lebe o go kgalemele.”

₁₈Foo mowa wa tla mo go Amasai, yo e ne e le mogolo mo go ba ba 30, a re: “Re ba gago Dafite, re ntlheng ya gago wena morwa Jese; kagiso, kagiso e nne le wena, kagiso e nne le bathusi ba gago; gonne Modimo wa gago o a go thusa.” Foo Dafite a ba amogela, a ba dira balaodi ba lesomo.

₁₉Mo go ba Manase le bone ga wela bangwe kwa go Dafite, jale ka a tla le Bafilisitia, ba tla go tlhabana le Saule, mme ba se ka ba ba thusa; gonne e rile barena ba Bafilisitia ba sena go gakololana ba mo naya tsela, ba re: “O tlaa wela kwa go Saule mong wa gagwe, ditlhogo tsa rona di ka tla tsa nna mo bothateng.” ₂₀Ya re a ya kwa Sikelage, ga wela kwa go ene boo rra Manase, e bong Atena, le Josabate, le Jediaele, le Mikaele, le Josabate, le Elihu le Silethai, balaodi ba makgolokgolo a boora Manase. ₂₁Ba thusa Dafite go tlhabana le lesomo la manokwane; gonne botlhe e le diganka tse di pelokgale, e bile e le balaodi ba ntwa. ₂₂Gonne ga nna ga tla batho kwa go Dafite ka malatsi otlhe go tla go mo thusa, ga tsamaya ya nna ntwa e e lesomosomo le legolo, jaaka lesomosomo la Modimo.

₂₃E ke yone palo ya ditlhogo tsa bone ba ba neng ba tlohomeletse ntwa, ba ba tsileng kwa go Dafite, kwa Heberone, go pitikololela bogosi jwa ga Saule kwa go Dafite, ka fa lefokong la ga Jehofa. ₂₄Bana ba Juta ba ba itseng go tshola thebe le lerumo ba le 6 800, ba ba tlhomeletseng ntwa. ₂₅Ba bana ba Simeone, diganka tse di pelokgale tsa ntwa, go no go le ba le 7 100. ₂₆Ba bana ba Lefi 4 600. ₂₇Joiata e ne e le moeteledipele wa ba ntlo ya ga Arone, a na le batho ba le 3 700. ₂₈Le Satoke, lekau le le seganka se se pelokgale, a na le ba ntlo ya ga rraagwe, ba le balaodi ba le 22. ₂₉Ba bana ba Benjamine, bomorwa rraagwe Saule, ba ne ba le 3 000, gonne go tla mo lobakeng loo, bontsi jwa bone ba bo ba ntse ba ngaparetse ntlo ya ga Saule. ₃₀Le ba bana ba Eferaime ba le 20 800, diganka tse di pelokgale, banna ba ba itsegeng mo makgotleng a borraabo. ₃₁Ba ntlhanngwe ya lotso lwa Manase ba le 18 000, ba ba neng ba kaiwa ka leina, gore ba tle go dira Dafite kgosi. ₃₂Mme ga bana ba Isakare, batho ba ba nang le tlhaloganyo ya metlha, go itse se Baiseraele ba tshwanetseng go se dira; ditlhogo tsa bone di le 200; bana ba borraabo botlhe ba le mo taolong ya bone. ₃₃Ba Sebulone ba ba nonofileng go bolola ntwa, ba ba nonofileng go rulaganya ntwa, ba na le dilo dingwe le dingwe tsa ntwa, ba bo ba le 50 000; e le ba ba nonofileng go aba ntwa, ba se pelo e e akabalang. ₃₄Le ba Nafetali go no go le balaodi ba le 1 000, ba na le batho ba le 37 000, ba ba tshotseng thebe le lerumo. ₃₅Le boo rra Dane ba ba nonofileng go aba ntwa, batho ba le 28 600. ₃₆Le Baašere ba ba nonofileng go ya le ntwa, ba nonofile go aba ntwa, ba le 40 000. ₃₇Kwa moseja ga Joretane boora Rubene, le boo rra Gate, le ba ntlhanngwe ya lotso lwa Manase, ba na le dilo dingwe le dingwe tsa ntwa tsa go tlhabana, ba bo ba le 120 000.

₃₈Banna ba, e le banna ba ntwa, ba ba nonofileng go aba ntwa, ba tla ka pelo e e itekanetseng kwa Heberone, go dira Dafite kgosi ya Baiseraele botlhe; le botlhe ba ba setseng ba Iseraele, ba le pelo nngwe fela ya go dira Dafite kgosi. ₃₉Mme ba nna gone le Dafite ka malatsi a le mararo, ba ja ba nwa; gonne ba ga bone ba ne ba ba etleeleditse. ₄₀Gape le ba ba gaufi nabo, e bong go ya go fitlha kwa goora Isakare, le kwa goo rra Sebulone, le kwa goo rra Nafetali, ba tla ba belesitse dijo ka diesele, le ka dikamela, le ka dimmoulo le ka dikgomo; dijo tsa boupe, le mengoloi ya difeige, le marose a ditshwabi tsa mefine, le bojalwa jwa mofine, le lookwane, le dikgomo le dinku ka letlotlo; gonne go no go na le boitumelo mo Iseraele.