Go sekisanya ga badumedi
1A e ntse jaana, fa mongwe mo go lona a na le kgang le wa ga gabo, a se ke a boife go ya go seka fa pele ga ba ba sa siamang, a sa ye fa pele ga baitshepi bogolo? 2Kgotsa a ga lo itse fa baitshepi ba tlaa atlhola lefatshe? Fa lefatshe le atlholwa ke lona, a lo a bo lo sa tshwanela go atlhola mo dilong tse dipotlana jaana? 3A ga lo itse fa re tlaa atlhola baengele? Bogolo jang dilo tse e leng tsa botshelo jono? 4Ke gone, fa lo na le go atlhola mo dilong tse e leng tsa botshelo jono, emisang batho ba ba sa kaiweng sepe mo phuthegong, gore ba atlhole. 5Ke bua jaana, gore ke lo tlhabise ditlhong. A ruri ga go ka ke ga fitlhelwa motho mongwe mo go lona yo o botlhale, yo o nonofileng go atlhola mo gare ga bakaulengwe ba gagwe? 6Mme mokaulengwe a ye go seka le mokaulengwe, e bile e le fa pele ga ba ba sa dumeleng?
7Nnyaa, e setse e le molato fela mo go lona, ka lo na le ditshekisanyo. Ga lo itshokeleleng tshiamololo bogolo? Ga lo iteseleletseng go patikwa bogolo? 8Nnyaa, ke lona ba lo dirang tshiamololo ka losi, ke lona ba lo patikang batho, e bile e le bakaulengwe ba lona. 9Kgotsa a ga lo itse fa ba ba sa siamang ba se ketla ba rua bogosi jwa Modimo? Lo se ka lwa tsietsega; go le baakafadi, go le baobamedi ba medimo ya disetwa, go le ba bonyatsi, go le baithati, go le basotoma, 10go le magodu, go le ba ba bohula, go le matagwa, go le bakgadi, go le baikgagapeledi, ga ba ketla ba rua bogosi jwa Modimo. 11Bangwe ba lona ba kile ba ne ba ntse jalo; mme lwa tlhapisiwa, lwa itshepisiwa, lwa siamisiwa mo ineng la Morena Jesu Keresete, le mo Moweng wa Modimo wa rona.
Mebele ya rona ke ya ga Keresete
12Mo go nna dilo tsotlhe di letlelesegile, mme dilo tsotlhe ga di molemo go dirwa. Mo go nna dilo tsotlhe di letlelesegile; mme ke gana go laolawa ke sepe. 13Dijo ke tsa mpa, le mpa ke ya dijo; mme Modimo o tlaa nyeletsa yone le tsone. Mmele ga o a direlwa boaka, mme ke wa Morena; mme Morena ke wa mmele. 14Go le Morena, Modimo o mo tsositse, le rona o tlaa re tsosa ka nonofo ya one.
15A ga lo itse fa mebele ya lona e le ditokololo tsa ga Keresete? Mme a ke ka tlosa ditokololo tsa ga Keresete, ka di ntsha ditokololo tsa seaka? A go se nne jalo. 16Kgotsa a ga lo itse fa yo o ikopantseng le seaka a le mmele mongwe fela naso? Gonne a re: “Bobedi bo tlaa nna nama e le nngwe fela.” 17Mme yo o ikopantseng le Morena o mowa mongwe fela.
18Tshabang boaka. Boleo jotlhe jo motho o bo dirang bo kwa ntle ga mmele; yo o dirang boaka o leofela mmele wa gagwe. 19Kgotsa a ga lo itse fa mmele wa lona e le tempele ya Mowa o o Boitshepo o o mo go lona, o lo o bonyeng mo Modimong? Mme ga lo ba lona; 20gonne lo rekilwe ka tlhwatlhwa, ke gone galaletsang Modimo mo mmeleng wa lona.
