Elija o bolela leuba
1Mme Elija wa Motišebe, yo o neng e le wa banni ba Gileate, a raya Ahabe a re: “Jaaka Jehofa, Modimo wa Iseraele, a tshedile yo ke emang fa pele ga gagwe, ga go ketla go na monyo le fa e le pula ka dinyaga tseno fa e se ka fa lefokong la me.”
2Lefoko la ga Jehofa la tla kwa go ene la re: 3“Tloga mono, o menogele ntlheng ya botlhabatsatsi, o ye o iphitlhe fa molatswaneng wa Kerithe, o o lebaganyeng le Joretane. 4Go tlaa dirala go re o tlaa nwa mo molatswaneng oo, mme ke laotse mahukubu gore a go otlele gone.”
5A ya a dira ka fa lefokong la ga Jehofa: gonne a ya a nna fa molatswaneng wa Kerithe, o o lebaganyeng le Joretane. 6Mme mahukubu a mo leretse senkgwe le nama go le ka moso le senkgwe le nama go le maitsebowa; mme a nwa mo molatswaneng oo. 7Ga dirala ya re lobakanyana lo sena go feta molatswana wa a tšha, ka go ne go se na pula mo lefatsheng.
Elija le motlholagadi wa Sarefathe
8Lefoko la ga Jehofa la tla mo go ene la re: 9“Nanoga, o ye kwa Sarefathe, o e leng motse wa Sitone, o nne gone; bona ke laotse mosadi mongwe wa motlholagadi, gore a go otle.” 10A nanoga a ya Sarefathe; ya re a fitlha fa kgorong ya motse, bonang, ga bo go le mosadi mongwe wa motlholagadi gone, a sela dikgonnyana. A mmitsa a re: “Ke a go rapela, a ko o ye go ntshiela metsinyana ka segwana, gore ke nwe.” 11Ya re a ya go a tsaya, a mmitsa, a re: “Ke a go rapela, o tle o ntlele le senkgwenyana.”
12Mme a re: “Jaaka Jehofa Modimo wa gago a tshedile, ga ke na senkgwe, fa e se boupenyana mo nkgwaneng bo lekanye seatla fela, le lookwanenyane mo kurwaneng; mme bona, ke sela dikgonnyana di le pedi, ke re ke tsena ke ya go bo ipaakanyetsa le morwaake, gore re bo je, mme re itse go swa.”
13Elija a mo raya a re: “O se ka wa boifa; ya o dire jaaka o buile; mme o ntirele senkgwenyana ka jone pele, o se ntlele kwano ntle, morago ga moo o itirele le morwao. 14Gonne Jehofa, Modimo wa Iseraele o bua jaana a re: ‘Boupe mo nkgwaneng ga bo ketla bo ngotlega, le lookwane mo kurwaneng ga lo ketla lo fela go tsamaya letsatsi le tla, le Jehofa o tlaa nesang pula ka lone mo lefatsheng.’ ”
15A ya a dira jaaka polelo ya ga Elija; ene mosadi, le ene Elija le ba ntlo ya mosadi, ba ja ka malatsi a le mantsi. 16Boupe ga bo a ka jwa ngotlega mo nkgwaneng, lookwane mo kurwaneng ga lo a ka lwa fela, jaaka lefoko la ga Jehofa le o le buileng ka Elija.
17Ga dirala ya re morago ga dilo tse, morwa mosadi yoo, mong wa ntlo, a tsogelwa ke bolwetse; mme bolwetse jwa gagwe jwa befa thata, mowa wa ba wa se ka wa sala mo go ene. 18Mosadi a raya Elija a re: “Ke dirang ka wena, wena motho wa Modimo? A o tsile mo go nna go tla go nkgakolola boleo jwa me, le go bolaya morwaake?”
19A mo raya a re: “Nneela morwao.” Mme a mo tsaya mo sehubeng sa mosadi, a mo isa mo ntlwaneng e e godimo, kwa o ne a nna gone, a mmaya mo bolaong jwa gagwe. 20A goela kwa go Jehofa, a re: “Jehofa Modimo wa me, a o bile o lerile bosula mo motlholagading yo ke jakileng mo go ene, ka go bolaya morwawe?” 21A ikotlololela mo ngwaneng gararo, a goela kwa go Jehofa a re: “Jehofa Modimo wa me, ke a go rapela, a ko o mme mowa wa ngwana yo o boele mo go ene.” 22Jehofa a reetsa lentswe la ga Elija; mme mowa wa ngwana wa boela mo go ene, mme a rulwa.
23Elija a tsaya ngwana, a mo folosa kwa ntlwaneng a mo lere mo ntlong, a mo neela mmaagwe; mme Elija a re: “Bona, morwao o tshedile.”
24Mosadi a raya Elija a re: “Jaanong ke a itse fa o le motho wa Modimo, le gore lefoko la ga Jehofa mo molomong wa gago ke boammaaruri.”
