1 DIKGOSI 20

₁Benehatate kgosi ya Siria a phutha ntwa yotlhe ya gagwe; mme o ne a na le dikgosi di le 32, le dipitse le dikara; a ya a tlhasela Samaria, a tlhabana nao. ₂A roma batho ba ya kwa go Ahabe kgosi ya Iseraele, mo motseng, ba mo raya ba re: “Benehatate o bua jaana, a re: ₃‘Selefera sa gago ke sa me, le gouta ya gago; le bone basadi ba gago le bana ba gago, e bong bone ba bantle bogolo, ke ba me.’ ”

₄Kgosi ya Iseraele ya mo fetola ya re: “Go ntse jaaka polelo ya gago morena wa me, wena kgosi; ke wa gago le tsotlhe tse ke nang natso.”

₅Barongwa ba tla gape ba re: “Benehatate a bua jaana, a re: ‘Le gale nkile ka roma kwa go wena ka re: O nneye selefera sa gago le gouta ya gago, basadi ba gago le bana ba gago. ₆Mme ke tlaa tsoga ke roma batlhanka ba me kwa go wena ka moso go re jaana, ba tlaa kheleisa ntlo ya gago, le matlo a batlhanka ba gago; mme go tlaa dirala go re sengwe le sengwe se se kgatlhang mo matlhong a gago, ba tlaa se tsaya, ba tsamaya ka sone.’ ”

₇Foo kgosi ya Iseraele ya bitsa bagolwane botlhe ba lefatshe, ya re: “Ke a lo rapela, a ko lo eleng tlhoko, lo bone jaaka monna yo, a tsosa ntwa: gonne o ne a romile kwa go nna go tla a tsaya basadi ba me le bana ba me, le selefera sa me le gouta ya me, mme ga ke a ka ka mo latolela.”

₈Bagolwane botlhe le batho botlhe ba mo raya ba re: “O se ka wa mo reetsa le fa e le go mo dumela.”

₉Ke gone ka moo a raya barongwa ba ga Benehatate a re: “Rayang kgosi morena wa me lo re: ‘Gotlhe mo o go rometseng kwa motlhankeng wa gago pele ke tlaa go dira; mme se, ke selo se ke sa kakeng ka se dira.’ ” Barongwa ba tsamaya ba isa lefoko kwa go ene. ₁₀Benehatate a roma kwa go ene, a re: “A medimo e ntirele jalo, e be e go fetise, fa lorole lwa Samaria lo tlaa lekana batho botlhe ba ba ntshetseng morago fa mongwe a lo ba tabolela ka seatla.”

₁₁Kgosi ya Iseraele ya fetola ya re: “Lo mo reye lo re, ga twe: ‘Yo o aparang moitshomelo wa tlhabano a se ipelafatse jaaka yo o o apolang.’ ”

₁₂Ga dirala ya re Benehatate a ultwa lefoko le, ka a nwa mo diobong, ene le dikgosi, a raya batlhanka ba gagwe a re: “Abang.” Mme ba ikabela motse.

₁₃Mme bonang, moperofeti mongwe a atamela kwa go Ahabe kgosi ya Iseraele, a re: “Jehofa o bua jaana a re: ‘A o bonye bontsi jo bogolo jo, jotlhe? Bona, ke tlaa bo tsenya mo seatleng sa gago gompieno; mme o tlaa itse fa ke le Jehofa.’ ”

₁₄Ahabe a re: “Ka mang?” Mme a re: “Jehofa o bua jaana, a re: Ka makau a dikgosana tsa dikgaolo tsa mafatshe.” Foo a re: “E mang yo o tlaa simololang tlhabano?” A mo fetola a re: “Ke wena.”

₁₅Foo a phutha makau a dikgaolo tsa mafatshe, ba bo ba le 232; morago ga bone a phutha batho botlhe, e bong bana botlhe ba Iseraele, ba le 7 000.

₁₆Ba bolola go le motshegare; Benehatate a bo a nwa a itagisa mo diobong, ene le dikgosi, dikgosi tse di 32 tse di mo thusang. ₁₇Makau a dikgosana tsa dikgaolo tsa mafatshe a bolola pele; Benehatate a roma, mme ba mmolelela, ba re: “Go dule banna bangwe mo Samaria.” ₁₈A re: “Le fa ba tsile go lopa kagiso, ba tshwareng ba tshedile; gongwe le fa ba tsile go tlhabana, ba tshwareng fela ba tshedile.”

₁₉Jalo bao ba bolola mo motseng, makau a dikgosana tsa dikgaolo tsa mafatshe le ntwa e e ba setseng morago. ₂₀Mongwe le mongwe a ipolaela monna mongwe; mme Basiria ba tshaba, Baiseraele ba ba konatelela; mme Benehatate kgosi ya Siria a falola a palame pitse a na le bapalama dipitse. ₂₁Kgosi ya Iseraele ya ba tshologela, ya kgemetha dipitse le dikara, ya gaila Basiria ka polao e kgolo.

₂₂Moperofeti a atamela kgosi ya Iseraele, a e raya a re: “Ya o ithatafatse, mme o ele tlhoko, o bone se o se dirang; gonne e tlaa re mo tshokologong ya ngwaga, kgosi ya Siria e tlaa go bololela.”

₂₃Batlhanka ba kgosi ya Siria ba e raya ba re: “Modimo wa bone ke modimo wa dithaba; ke gone ka fa ba neng ba le thata bogolo go rona ka gone; a re tlhabaneleng nabo mo lobaleng, mme ruri re tlaa nna thata bogolo go bone. ₂₄Mme o dire selo se; o tlose dikgosi, nngwe le nngwe mo bonnong jwa yone, o beye balaodi mo boemong jwa tsone. ₂₅O ipalele ntwa e e tshwanang le ntwa e e go latlhegetseng, pitse boemong jwa pitse, kara boemoeng jwa kara. Re tlaa tlhabanela nabo mo lobaleng, mme ruri re tlaa nna thata bogolo go bone.” Mme a reetsa lentswe la bone, a dira jalo. ₂₆Ga dirala ya re mo tshokologong ya ngwaga, Benehatate a phutha Basiria, a ya kwa Afeka, a ya go tlhabana le Baiseraele. ₂₇Bana ba Iseraele ba ne ba phuthilwe, ba neilwe mefago, mme ba ba bololela; bana ba Iseraele ba thibelela fa pele ga bone ba ntse jaaka matsomanyane a le mabedi a dipotsane fela; Basiria bone ba bo ba tletse ka lefatshe.

₂₈Motho mongwe wa Modimo a atamela, a bua le kgosi ya Iseraele, a re: “Jehofa o bua jaana, a re: ‘E re ka Basiria ba rile Jehofa ke modimo fela wa dithaba, ga se modimo wa melapo; ke gone ke tlaa tsenyang bontsi jo bogolo jo jotlhe mo seatleng sa gago, mme lo tlaa itse fa ke le Jehofa.’ ”

₂₉Ba thibelela ba lebaganye ka malatsi a supa. Ga dirala ya re ka tsatsi la bosupa dintwa tsa tshwaragana; bana ba Iseraele ba bolaya Basiria ba le 100 000, e le ba dinao, ka tsatsi le le lengwe fela. ₃₀Mme ba bangwe ba tshabela kwa Afeke, mo motseng; mme lorako lwa wela banna ba le 27 000 ba ba neng ba setse. Benehatate a tshaba a tsena mo motseng, mo ntlwaneng nngwe e e kwa teng. ₃₁Batlhanka ba gagwe ba mo raya ba re: “A ko o bone, re utlwile fa dikgosi tsa ntlo ya Iseraele e le dikgosi tse di kutlwelobotlhoko; re a go rapela, a ko o mme re ipeye letsela la kgetsi mo dithekeng, le dikgole mo ditlhogong, re tswele kgosing ya Iseraele; e tlaa re gongwe a rekegele botshelo jwa gago.” ₃₂Jalo ba itlama ka letsela la kgetse mo dithekeng, ba ipaya dikgole mo ditlhogong, ba tla kgosing ya Iseraele, ba re: “Motlhanka wa gago Benehatate, a re: ‘Ke a go rapela, a ko o mme ke tshele.’ ” Mme a re: “A o sa tshela? Aitse ke ngwana wa ga rre.”

₃₃Jaana banna ba bo ba etse tlhoko thata, ba tsitsibogela lefoko go lemoga bo a ke boikutlo jwa gagwe; mme ba re: “Ngwana wa ga rraago Benehatate.” Foo a re: “Tsamayang lo ye go mo lere.” Foo Benehatate a tswela kwa go ene; mme a mo palamisa mo kareng. ₃₄Benehatate a mo raya a re: “Metse e rre o ne a e tsaya mo go rraago ke tlaa e bosa; o tlaa itirela mebila mo Damaseko, jaaka rre a dirile mo Samaria.” “Le nna,” go bua Ahabe: “ke tlaa go lesa o tsamaya ka kgolagano e.” Jalo a dira kgolagano nae, a mo lesa a tsamaya.

₃₅Monna mongwe wa bomorwa baperofeti a raya monkana wa gagwe ka lefoko la ga Jehofa a re: “Ke a go rapela, a ko o ntiteye.” Mme motho yoo a gana go mo itaya. ₃₆Foo a mo raya a re: “E re ka o se ka wa utlwa lefoko la ga Jehofa, bona, e tlaa re o sa ntse o tloga fa go nna, tau e tlaa go bolaya.” Mme ya re a tloga fa go ene tau ya rakana nae, ya mmolaya.

₃₇Foo a fitlhela motho yo mongwe, mme a re: “Ke a go rapela, a ko o ntiteye.” Monna yoo a mo itaya, a mo itaya a ba a mo ntsha dintho. ₃₈Moperofeti a tsamaya, a nnela kgosi mo tseleng, a ikgakisa ka go rwala sefapatlhogo mo matlhong. ₃₉Ya re kgosi e feta, a goelela kgosi, a re: “Motlhanka wa gago o ne a tswa a ya a tsena kwa bogareng ga tlhabano; mme bona, monna mongwe a fapoga a lere motho mongwe kwa go nna, a re: ‘Tshegetsa monna yo; fa a ka tlhokafala ka mokgwa mongwe, foo botshelo jwa gago bo tlaa emela botshelo jwa gagwe, mme fa go sa nne jalo o tlaa duela ka talenta ya selefera.’ ₄₀Ya re motlhanka wa gago a ntse a tshwerwe ke tiro kwano le kwa, a bo a bile a ngwegile.” Mme kgosi ya Iseraele ya mo raya ya re: “Katlholo ya gago e tlaa nna fela jalo; aitse wena o go atlhotse ka wesi.”

₄₁Mme a akofa a itlosa sefapatlhogo mo matlhong. Kgosi ya Iseraele ya mo lemoga fa e le wa baperofeti. ₄₂Mme a mo raya a re: “Jehofa o bua jaana, a re: ‘E re ka o lesitse monna yole a tswa mo seatleng sa gago, yo ke ne ke mo neeletse tshenyego, ka re, botshelo jwa gago bo tlaa emela botshelo jwa gagwe, le batho ba gago ba tlaa emela batho ba gagwe.’ ”

₄₃Kgosi ya Iseraele ya ya kwa ntlong ya yone e khutlogile, e itumologile, mme ya tla kwa Samaria.