1 DIKGOSI 9

₁Ga dirala e rile Solomone a sena go wetsa kago ya ntlo ya ga Jehofa, le ntlo ya kgosi, le keletso yotlhe ya ga Solomone e o ne a kgatlhwa ke go e dira, ₂Jehofa a bonalela Solomone lwa bobedi, jaaka a kile a mmonalela kwa Gibeone. ₃Jehofa a mo raya a re: “Ke utlwile morapelo le mokokotlelo wa gago, o o o dirileng fa pele ga me; ke itshepisitse ntlo e, e o e agileng, go tla ke baya leina la me gone ka bosakhutleng; matlho a me a tlaa nna gone, le pelo ya me, ka metlha yotlhe. ₄Ka ga gago, fa o sepela fa pele ga me, jaaka Dafite rraago a ne a sepela, mo boitekanelong jwa pelo le mo thokgamong, go dira ka fa go tsotlhe tse ke di go laoletseng, fa o tshegetsa melao ya me le dikatlholo tsa me; ₅foo ke tlaa tlhomamisa setulo sa gago sa bogosi mo go Baiseraele ka bosakhutleng; jaaka ke solofeditse Dafite rraago, ka re: ‘Ga go ketla go go tlhokafalela monna mo setulong sa bogosi sa Iseraele.’ ₆Mme fa lo fapoga mo go ntshaleng morago, lona le fa e le bana ba lona, lo sa tshegetse ditaolo tsa me, le melao ya me, e ke e beileng fa pele ga lona, lo ya lo direla medimo e sele, lo e obamela; ₇foo ke tlaa tlosa Baiseraele mo lefatsheng le ke le ba neileng; le ntlo e, e ke e itshepiseditseng leina la me, ke tlaa e latlha e tswa mo ponong ya me; mme Baiseraele ba tlaa nna seane le lefoko la tshotlo mo ditšhabeng tsotlhe; ₈le fa ntlo e, e godile jaana, le fa go ntse jalo mongwe le mongwe yo o tlang ka yone o tlaa gakgamala a ba a otsa; ba tlaa re: Ana Jehofa o diretse lefatshe le, le ntlo e jaana, ka ntlha yang? ₉Ba tlaa fetola ba re: ‘Ke ka ntlha ya gonne ba ne ba latlha Jehofa Modimo wa bone yo o ne a ntshitse borraabo mo lefatsheng la Egepeto, ba tshwara medimo e sele, ba e obamela, ba e direla; ke gone ka fa Jehofa o lerileng bosula jotlhe jo, mo go bone ka gone.’ ”

₁₀Jaana ga dirala e rile go sena go feta dinyaga di le 20 tse Solomone o ne a aga matlo a mabedi ka tsone, ntlo ya ga Jehofa le ntlo ya kgosi, ₁₁(aitse Hirame kgosi ya Ture o ne a thusitse Solomone ka ditlhare tsa masetara le tsa mafira le ka gouta, ka fa keletsong yotlhe ya gagwe), foo kgosi Solomone a naya Hirame metse e le 20 mo lefatsheng la Galilea. ₁₂Mme Hirame a tswa kwa Ture a tla go bona metse e Solomone o e mo neileng, mme ya se ka ya mo kgatlha. ₁₃Mme a re: “Ana ngwana a rra, metse e o e nneileng ke e e ntseng jang?” A e raya leina a re, Lefatshe le Kabule, le gompieno. ₁₄Hirame a isa dikilokerame tse di fetang 4 000 tsa gouta kwa kgosing.

₁₅Mo ke gone ka fa kgosi Solomone o ne a kgetha batho ka gone; e bong go aga ntlo ya ga Jehofa, le ntlo ya gagwe tota, le Milo, le lorako lwa Jerusalema, le Hasore, le Megito, le Gesere. ₁₆Faro kgosi ya Egepeto o ne a ile a gapa Gesere, a o fisa ka molelo, a bolaya Bakanana ba ba agileng mo motseng, a o abela morwadie, e bong mosadi wa ga Solomone. ₁₇Solomone a aga Gesere, le Bethehorone wa tlase, ₁₈le Baalathe, le Tamare mo nageng, mo lefatsheng, ₁₉le metse yotlhe ya mabolokelo e Solomone o ne a na nayo, le metse ya dikara tsa gagwe, le metse ya bapalama dipitse ba gagwe, le se Solomone o ne a eletsa go se aga mo Jerusalema, go ikgatlha fela, le kwa Lebanone, le mo lefatsheng lotlhe la puso ya gagwe. ₂₀Ka ga batho botlhe ba ba setseng ba Baamore, le Bahite, le Baperise, le Bahife, le Bajebuse, ba e seng ba bana ba Iseraele; ₂₁bana ba bone ba ba tlogetsweng morago ga bone mo lefatsheng, ba bana ba Iseraele ba ne ba sa nonofa go ba senyetsa ruri, Solomone a kgetha batlhanka mo go bone le gompieno. ₂₂Mme bana ba Iseraele Solomone ga a ka a ba ntsha batlhanka ba ba ruiwang ka gope; bone e ne e le banna ba ntwa, le batlhanka ba gagwe, le dikgosana tsa gagwe, le beng ba mephato, le balaodi ba dikara tsa gagwe le ba bapalama dipitse ba gagwe.

₂₃Bao e ne e le balaodi ba bagolo ba tiro ya ga Solomone, ba le 550, ba ba neng ba laola batho ba ba dirang tiro.

₂₄Morwadia Faro a tlhatloga kwa motseng wa ga Dafite a tla mo ntlong ya gagwe e Solomone o ne a e mo agetse; e dira gone o agang Milo.

₂₅Solomone a isa ditshupelo tse di fisiwang, le ditshupelo tsa kagiso, gararo ka ngwaga mo sebesong se o se agetseng Jehofa, a fisa maswalo natso mo sebesong se se fa pele ga Jehofa. Mme a fetsa ntlo jalo.

₂₆Kgosi Solomone a dira lesomo la dikepe mo Esione-gebere, o o bapileng le Elothe, fa losing lwa Lewatle le Lehibidu, mo lefatsheng la Etome. ₂₇Hirame a tsenya batlhanka ba gagwe mo lesomong la dikepe, e le batho ba dikepe ba ba nang le kitso ka ga lewatle gale, ba patagana le batlhanka ba ga Solomone. ₂₈Ba tla mo Ofire, ba tsaya gone gouta e le dikilokerame di le 14 000, ba e isa kwa go kgosi Solomone.