1Ga dirala, e rile a sena go khutla go bua le Saule, mowa wa ga Jonathane wa logakana le mowa wa ga Dafite, Jonathane a mo rata jaaka a ithata. 2Saule a mo tsaya ka tsatsi leo, mme a se ka a tlhola a mo leseletsa go ya ga gabo kwa ntlong ya ga rraagwe. 3Foo Jonathane le Dafite ba dira kgolagano ka a mo rata jaaka a ithata. 4Jonathane a ikapola kobo e e mo go ene, a e naya Dafite, le diaparo tsa gagwe, le e leng yone tšhaka ya gagwe, le bora jwa gagwe, le moitlamo wa gagwe. 5Dafite a nna a ya gongwe le gongwe kwa Saule o mo romang gone, a dira ka tlhaloganyo; Saule a mo laodisa banna ba ntwa, mme ga nna molemo mo matlhong a batho botlhe, le mo matlhong a batlhanka ba ga Saule.
Saule o hufegela Dafite
6Ya re ba tla, ka Dafite a boa kwa go bolayeng Mofilisitia, basadi ba tswa mo metseng yotlhe ya Iseraele, ba duduetsa, ba bina, ka boitumelo ba tla go kgatlhantsha kgosi Saule ka meropana le ka diletso. 7Basadi ya re ba letsa ba fetolana ka dipina ba re:
“Saule o bolaile
ba makgolo a masome ba gagwe,
mme Dafite o bolaile
ba makgolo a makgolo ba gagwe.”
8Saule a nna bogale thata, polelo eo ya mo itumolola; mme a re: “Ba neile Dafite ba makgolo a makgolo, nna ba nnaya ba makgolo a masome fela; mme o ka ba a bonang gape fa e se bogosi fela?” 9Saule a dilola Dafite ka matlho go simolola ka tsatsi leo go ya kwa pele.
10Ga dirala ya re ka moso, mowa mongwe o o busula o o tswang Modimong wa tla ka thata mo go Saule, a phokelela mo teng ga ntlo; Dafite a letsa ka letsogo jaaka a tle a dire ka malatsi otlhe, Saule a bo a tshotse lerumo la gagwe. 11Saule a mo konopa ka lerumo; gonne a re: “Dafite ke tlaa mo phololeletsa fela fa lomoteng.” Dafite a tila a tswa fa pele ga gagwe gabedi.
12Saule a boifa Dafite, ka Jehofa a ne a nna nae, mme mo go Saule Jehofa a tlogile. 13Ka ntlha ya gone moo Saule a mo tlosa fa go ene, a mo dira kgosana ya gagwe, a laola ba makgolo a some; a nna a tswa a tsena fa pele ga batho. 14Dafite a dira ka tlhaloganyo mo ditseleng tsa gagwe tsotlhe fela; Jehofa a nna nae. 15E rile Saule a bona fa a dira ka tlhaloganyo e kgolo fela, a mmoifa a tlhabegile. 16Botlhe ba Iseraele le Juta ba bo ba rata Dafite; gonne a nna a tswa a tsena fa pele ga bone.
Dafite o nyala morwadia Saule
17Saule a raya Dafite a re: “Bona, morwadiake yo mogolo Merabe, ke tlaa mo go naya go nna mosadi wa gago; o nne pelokgale fela ntlheng ya me go tlhabana ditlhabano tsa ga Jehofa.” Gonne Saule a ithaya, a re: “A seatla sa me ke se ka ka se baya mo go ene, mme a seatla sa Bafilisitia se nne mo go ene.”
18Dafite a raya Saule, a re: “Ke mang, le botshelo jwa me ke eng, kgotsa losika lwa ga rre mo Iseraele, fa e ka bo ne ne fano ke ka nna mogwe wa kgosi?” 19Mme e rile ka lobaka lo Merabe morwadia Saule o ka bong a neilwe Dafite ka lone, a newa Ateriele wa Momehola go nna mosadi.
20Mikale morwadia Saule a bo a rata Dafite; mme ba bolelela Saule, mme selo seo sa mo kgatlha. 21Saule a re: “Ke tlaa mo mo naya, gore a tle a nne serai mo go ene, le gore, seatla sa Bafilisitia se tlhabane nae.” Ke gone ka moo Saule a raya Dafite a re: “Gompieno o tlaa nna mogwe wa me lwa bobedi.” 22Saule a laola batlhanka ba gagwe a re: “Sebetsang Dafite lo re: ‘Bona, kgosi e kgatlhega mo go wena le batlhanka ba gagwe botlhe ba a go rata; mme ra re o nne mogwe wa kgosi.’ ”
23Batlhanka ba ga Saule ba sebela Dafite mafoko a. Dafite a re: “Mo matlhong a lona a ke sengwe se se motlhofo go nna mogwe wa kgosi, ka ke le motho wa sehumanegi, mme ke kaiwa selo fela?”
24Batlhanka ba ga Saule ba mmolelela ba re: “Dafite o ne a bua ka go re, ka go re.” 25Saule a re: “Lo reye Dafite jaana lo re: ‘Kgosi ga e batle bogadi fa e se nama ya ditlhong ya Bafilisitia ba le lekgolo fela, go tla a itefetsa mo babeng ba kgosi.’ ” Saule a bo a gopotse go bolaya Dafite ka diatla tsa Bafilisitia. 26E rile batlhanka ba gagwe ba bolelela Dafite mafoko ao, ga kgatlha Dafite thata go nna mogwe wa kgosi. Mme malatsi a bo a ise a fele, 27Dafite a tloga a tsamaya, ene le banna ba gagwe, mme ba bolaya Bafilisitia e le banna ba le 200; Dafite a lere nama ya bone ya ditlhong, ba di naya kgosi ka palo e e tletseng, gore a tle a nne mogwe wa kgosi. Saule a mo naya Mikale morwadie go nna mosadi wa gagwe.
28Saule a bona a ba a itse fa Jehofa a nna le Dafite; Mikale morwadia Saule a mo rata. 29Saule a fela a boifa Dafite bogolo; Saule a nna mmaba wa ga Dafita ka metlha yotlhe.
30Foo dikgosana tsa Bafilisitia tsa bolola; mme gongwe le gongwe fa di bolola, Dafita a dire ka tlhaloganyo bogolo go batlhanka botlhe ba ga Saule; leina la gagwe la ba la tla la tlotlwa thata.
