2 DITIRAFALO 34

₁E rile Josia a simolola go busa a bo a le dinyaga di 8; mme a busa ka dinyaga di le 31 mo Jerusalema. ₂A dira se se siameng mo matlhong a ga Jehofa, a sepela mo ditseleng tsa ga Dafite rraagwe, a se ka a fapogela ka fa go le legolo kgotsa go la molema.

₃Gonne ya re ka ngwaga o o ferang e le mebedi wa puso ya gagwe, a sa ntse a le monana, a simolola go batla Modimo wa ga Dafite rraagwe; ya re ka ngwaga wa 12 a simolola go tlhapisa Juta le Jerusalema, a tlosa mafelo a a tlotlometseng, le Medimako, le ditshwantsho tse di setilweng, le ditshwantsho tse di thetsweng. ₄Mme ba rutlolola dibeso tsa boBaale mo ponong ya gagwe; le ditshwantsho tsa letsatsi, tse di ne di le kwa godimo, godimo ga bone, a di remela fa fatshe; le Medimako le ditshwantsho tse di setilweng, le ditshwantsho tse di thetsweng, a di thubaganya, a di dira lorole, a lo gasetsa mo diphupung tsa ba ba kileng ba di isetsa ditlhabelo. ₅A fisetsa marapo a baperesiti mo dibesong tsa bone, a tlhapisa Juta le Jerusalema. ₆A dira jalo mo metseng ya Bamanase, le ya Baeferaime, le ya Basimeone, go ya fela kwa Nafetali, mo matlotleng a bone mo tikologong. ₇A rutlolola dibeso, a thuga Medimako le ditshwantsho tse di setilweng, tsa nna leupa, a remela fa fatshe ditshwantsho tsa letsatsi mo lefatsheng lotlhe la Iseraele, a itse go ba a boela kwa Jerusalema.

₈Jaana e rile ka ngwaga wa 18 wa puso ya gagwe a sena go tlhapisa lefatshe le ntlo, a roma Shafane morwa Asalia, le Maaseia molaodi wa motse, le Joa morwa Joahase mokwadi wa ditirafalo, ba ya go mamatlela ntlo ya ga Jehofa Modimo wa gagwe. ₉Ba ya kwa go Hilekia moperesiti yo mogolo, ba mo neela madi a a ne a lerilwe mo ntlong ya Modimo, a Balefi, balebedi ba kgoro, ba ne ba a phuthile mo go Bamanase le Baeferaime, le mo go masalela otlhe a Baiseraele, le mo go Bajuta botlhe le Babenjamine, le mo banning ba Jerusalema. ₁₀Ba a neela badiri ba ba nang le tebelo ya ntlo ya ga Jehofa; badiri ba ba dirang mo ntlong ya ga Jehofa, ba a ba naya go siamisa le go mamatlela ntlo; ₁₁ba a naya babetli ba dikgong le baagi, go tla ba reka maje a a betlilweng, le dikgong tse di tshwaraganyang, le go dira mesipuri ya matlo a dikgosi tsa Juta di a sentseng. ₁₂Banna bao ba dira tiro ka boikanngo; balebedi ba bone e ne e le Jahathe le Obadia, e le ba Balefi ba bomorwa Merari; le Sekaria le Mešulame, ba bomorwa Bakohathe, go tswedisetsa tiro kwa pele; le ba bangwe ba Balefi, botlhe ba ba ditswerere go letsa diletso tsa kopelo. ₁₃Gape ba ne ba laola barwadi ba merwalo, ba tswedisetsa kwa pele botlhe ba ba dirang tiro mo tirelong nngwe le nngwe; mme mo go Balefi go ne go le bakwadi, balaodisiwa, le balebedi ba kgoro.

₁₄Ya re ba ntsha madi a a ne a isitswe mo ntlong ya ga Jehofa, Hilekia moperesiti a fitlhela lokwalo lwa molao wa ga Jehofa o o beilweng ke Moše. ₁₅Hilekia a bua, a raya Shafane mokwadi a re: “Ke bonye lokwalo lwa molao mo ntlong ya ga Jehofa.” Hilekia a neela Shafane lokwalo. ₁₆Shafane a isa lokwalo kwa kgosing, gape a isa lefoko kwa kgosing, a re: “Gotlhe mo go neetsweng batlhanka ba gago ba a go dira. ₁₇Ba ntshitse madi a a fitlhetsweng mo ntlong ya ga Jehofa, ba a tsentse mo seatleng sa balebalebedi, le mo seatleng sa badiri.” ₁₈Mme Shafane mokwadi a bolelela kgosi a re: “Hilekia moperesiti o nneetse lokwalo.” Mme Shafane a balela kgosi mo go lone.

₁₉Ga dirala ya re kgosi e sena go utlwa mafoko a molao, ya ikgagola diaparo. ₂₀Kgosi ya laola Hilekia le Ahikame morwa Shafane, le Abatone morwa Mika, le Shafane mokwadi, le Asaia motlhanka wa kgosi, a re: ₂₁“Yang lo mpoletse mo go Jehofa, lo bo lo boletse le bone ba ba setseng mo Iseraele le mo Juta, ka ga mafoko a lokwalo lo lo bonyweng, gonne bogale jwa ga Jehofa jo bo goromeditsweng mo go rona bo bogolo, gonne borraetsho ga ba a tshegetsa lefoko la ga Jehofa, go dira jaaka tsotlhe tse di kwadilweng mo lokwalong lo.”

₂₂Hilekia, le ba kgosi e ba laotseng, ba ya kwa go Huleta moperofeti wa sesadi, mosadi wa ga Shalume morwa Tokathe, morwa Hasera, mmoloki wa diaparo; (jaana mosadi yoo a bo a agile mo Jerusalema mo kgaolong ya bobedi); mme ba bua le ene jalo. ₂₃Mosadi a ba raya a re: “Jehofa Modimo wa Iseraele o bua jaana, a re: ‘Rayang monna yo o lo romileng kwano go nna, lo re: ₂₄Jehofa o bua jaana a re: Ke tlaa lere bosula mo felong fa, le mo banning ba gone, e bong diphutso tsotlhe tse di kwadilweng mo lokwalong lo ba lo badileng fa pele ga kgosi ya Juta. ₂₅Gonne ba ntatlhile, ba fiseditse medimo e sele maswalo, go tla ba ntlhotlheletsa bogaleng ka ditiro tsotlhe tsa diatla tsa bone; ke gone ka moo bogale jwa me bo goromeditsweng mo felong fa, mme ga bo ketla bo tingwa.’ ₂₆Mme kgosi ya Juta e e lo romileng, lo tla go botsa mo go Jehofa, lo mo reye lo re: Jehofa Modimo wa Iseraele a re: ‘Ka ga mafoko a o a utlwileng, ₂₇e re ka pelo ya gago e ne e le tshisimogo, mme wa ikokobetsa fa pele ga Modimo, jale ka o utlwa mafoko a one ka ga felo fa, le ka ga banni ba gone, mme o ikokobeditse fa pele ga me, o ikgagotse diaparo, wa lela fa pele ga me; le nna ke go utlwile. Go bua Jehofa. ₂₈Bona, ke tlaa go phuthela kwa go borraeno, mme o tlaa phuthelwa mo phupung ya gago ka kagiso, le gone matlho a gago ga a ketla a bona bosula jotlhe jo ke tlaa bo lereng mo felong fa, le mo banning ba teng.’ ” Mme ba busetsa phetolo kwa kgosing.

₂₉Foo kgosi ya roma, ya phutha bagolwane botlhe ba Juta le ba Jerusalema. ₃₀Kgosi ya tlhatlogela kwa ntlong ya ga Jehofa, e na le banna botlhe ba Juta, le banni ba Jerusalema, le baperesiti, le Balefi le batho botlhe, bagolo le bannye; mme a balela mo ditsebeng tsa bone mafoko otlhe a lokwalo lwa kgolagano, lo lo bonyweng mo ntlong ya ga Jehofa. ₃₁Mme kgosi ya ema mo bonnong jwa yone, ya dira kgolagano fa pele ga Jehofa, ya re, e tlaa sala Jehofa morago, e tshegetsa ditaolo tsa gagwe, le ditshupo tsa gagwe, le ditao tsa gagwe, ka pelo yotlhe ya yone le ka mowa otlhe wa yone, go dirafatsa mafoko a kgolagano a a kwadilweng mo lokwalong lo. ₃₂Botlhe ba ba fitlhetsweng mo Jerusalema le mo Benjamine, a ba laola gore ba eme mo kgolaganong eo. Banni ba Jerusalema ba dira ka fa kgolaganong ya Modimo, Modimo wa borraabo. ₃₃Josia a tlosa dilo tsotlhe tse di makgapha mo mafatsheng otlhe a e leng a bana ba Iseraele, mme botlhe ba ba fitlhelwang mo Iseraele a ba dirisa, e bong go direla Jehofa Modimo wa bone. Metlheng yotlhe ya gagwe ga ba a ka ba kgaogana le go sala Jehofa Modimo wa borraabo morago.