2 DITIRAFALO 6

₁Foo Solomone a bua a re: “Jehofa o rile o tlaa aga mo lefifing le lentsho. ₂Mme ke go agetse ntlo ya bonno, le felo ga gago go aga gone ka bosakhutleng.”

₃Kgosi ya retologa, ya segofatsa phuthego yotlhe ya Iseraele, mme phuthego yotlhe ya Iseraele ya ema ka dinao. ₄Kgosi ya re: “A go bakwe Jehofa Modimo wa Iseraele, yo o ne a bua ka molomo le rre Dafite, o bile a diraditse ka diatla, a re: ₅‘E sa le ka ke ntsha batho ba me mo lefatsheng la Egepeto ga ise nke ke itshenkele motse ope mo ditsong tsotlhe tsa Iseraele go tla ke aga ntlo mo go one, gore leina la me le nne gone; le gone ga ise nke ke itshenkele motho ope go tla a nna kgosana ya batho ba me Baiseraele. ₆Mme ke itshenketse Jerusalema, gore leina la me le nne gone; ke bile ke itshenketse Dafite, gore a buse batho ba me Baiseraele.’

₇“Go ne go le mo pelong ya ga rre Dafite go agela leina la ga Jehofa Modimo wa Iseraele ntlo. ₈Mme Jehofa a raya rre Dafite a re: ‘E re ka go no go le mo pelong ya gago go agela leina la me ntlo, o dirile sentle, ka go ne go le mo pelong ya gago. ₉Le fa go ntse jalo ga o ketla o aga ntlo eo; mme morwao yo o tlaa tswang mo mmeleng wa gago, ke ene o tlaa agelang leina la me ntlo.’

₁₀“Jehofa o dirafaditse lefoko la gagwe le o ne a le bua, gonne nna ke tsogile mo boemong jwa ga Dafite rre, ke dutse mo setulong sa bogosi sa Iseraele, jaaka Jehofa a na a re solofeditse, mme ke agetse leina la ga Jehofa Modimo wa Iseraele ntlo. ₁₁Ke beile letlole gone, le kgolagano ya ga Jehofa e mo go lone e o ne a e dira le bana ba Iseraele.”

₁₂Kgosi ya ema fa pele ga sebeso sa ga Jehofa mo ponong ya phuthego yotlhe ya Baiseraele, a otlolola mabogo. ₁₃(Gonne Solomone o ne a dirile maemo a kgotlho, boleele jwa one bo le dimetara di le 2,2, boatlhamo jwa one bo le dimetara di le 2,2, le bogodimo jwa one bo le dimetara di le 1,3, a a tlhomile fa gare ga lolwapa. Mme a ema mo go one, a khubama ka mangole fa pele ga phuthego yotlhe ya Baiseraele, a otlololela mabogo kwa legodimong), ₁₄mme a re: “Jehofa Modimo wa Iseraele, ga go na Modimo ope o o tshwanang nao, kwa legodimong le fa e le mo lefatsheng; yo o tshegeletsang batlhanka ba gago kgolagano le boutlwelo botlhoko, e bong ba ba sepelang fa pele ga gago ka pelo yotlhe ya bone; ₁₅yo o tshegeleditseng motlhanka wa gago Dafite rre se o ne o se mo solofeditse; ee, o ne wa bua ka molomo, mme o se dirafaditse ka seatla sa gago, jaaka go ntse gompieno. ₁₆Ke gone, jaana, Jehofa Modimo wa Iseraele, tshegeletsa motlhanka wa gago Dafite rre se o ne wa se mo solofetsa wa re: ‘Ga go ketla go go tlhokafalela monna mo ponong ya me wa go dula mo setulong sa bogosi sa Iseraele; ke raya fa bana ba gago ba tlhokomela tsela ya bone go sepela mo molaong wa me jaaka o sepetse fa pele ga me.’ ₁₇Ke gone jaana, Jehofa Modimo wa Iseraele, a lefoko la gago le ke le rurifadiwe le o ne wa le bua le motlhanka wa gago Dafite.

₁₈“A ruri Modimo o ka aga le batho mo lefatsheng? Bona, legodimo, le legodimo la magodimo, ga le a go lekana; bogolo jang ntlo e ke e agileng! ₁₉Le fa go ntse jalo a ko o ngoke morapelo wa motlhanka wa gago, le mokokotlelo wa gagwe, Jehofa Modimo wa me, go reetsa pitso le morapelo o motlhanka wa gago o o rapelang fa pele ga gago. ₂₀Gore matlho a gago a budulogele ntlo e, motshegare le bosigo, e bong felo fa o buileng ka ga gone wa re, o tlaa baya leina la gago gone; go tla o reetsa morapelo o motlhanka wa gago o tlaa o rapelang a lebile felo fa. ₂₁O reetse mekokotlelo ya motlhanka wa gago, le ya batho ba gago Baiseraele, mogang ba rapelang ba lebile felo fa, ee, utlwa o le bonnong jwa gago, e bong kwa legodimong, mme o re o utlwa, o itshwarele.

₂₂“E re fa motho a leofela wa ga gabo, mme ikano e beilwe mo go ene e e mo ikanisang, mme fa a tla go ikana fa pele ga sebeso sa gago mo ntlong e, ₂₃foo o utlwe o le kwa legodimong, mme o dire, o atlhole batlhanka ba gago, ka go lefisa moikepi, go tla o busetsa tsela ya gagwe mo tlhogong ya gagwe; o siamisetse mosiami, go tla o mo naya ka fa tshiamong ya gagwe.

₂₄“E re fa batho ba gago Baiseraele ba kgemethwa fa pele ga baba ba bone ka gobo ba go leofetse; mme fa ba sokologa, ba ipolela leina la gago, ba rapela ba kokotlela fa pele ga gago mo ntlong e, ₂₅foo o utlwe o le kwa legodimong, mme o itshwarele boleo jwa batho ba gago Baiseraele, o ba busetse mo lefatsheng le o le neileng bone le borraabo.

₂₆“Mogang legodimo le tswalegang, mme go se na pula, ka gobo ba go leofetse; fa ba rapela ba lebile felo fa, mme ba ipolela leina la gago, fa ba tlogela boleo jwa bone, mogang o ba utlwisang botlhoko, ₂₇foo o utlwe o le kwa legodimong, o itshwarele boleo jwa batlhanka ba gago, le jwa batho ba gago Baiseraele, ka o ba ruta tsela e e molemo e ba tshwanetseng go sepela mo go yone; mme o nese pula mo lefatsheng la gago, le o le neileng batho ba gago go nna boswa.

₂₈“E re fa go le leuba mo lefatsheng, fa go le kgogodi, fa go le tshubego, kgotsa mapote, tsie kgotsa seboko; fa baba ba bone ba ba tlhasela mo lefatsheng la metse ya bone; le fa go ka bo go le petso efe, le fa go ka bo go le botlhoko bofe; ₂₉le fa e ka bo e le morapelo le mokokotlelo ofe o o dirwang ke motho mongwe, kgotsa ke batho botlhe ba Iseraele, ba mongwe le mongwe wa bone o tlaa itseng petso ya gagwe tota, le bohutsana jwa gagwe tota, mme fa a ntsha mabogo a gagwe a lebile ntlo e, ₃₀foo o utlwe o le kwa legodimong bonnong jwa gago, o itshwarele, o direle motho mongwe le mongwe ka fa ditseleng tsotlhe tsa gagwe, yo pelo ya gagwe o e itseng; (gonne wena, e bong wena wesi, o itse dipelo tsa bana ba batho); ₃₁gore ba tle ba go boife, go tla ba sepela mo ditseleng tsa gago, ka metlha yotlhe e ba tshelang ka yone mo lefatsheng le o le neileng borraetsho.

₃₂“Gape, ka ga moeng yo e seng wa batho ba gago Baiseraele, e tlaa re fa a tswa lefatsheng le le kgakala ka ntlha ya leina la gago le legolo, le ka ntlha ya seatla sa gago sa bonatla, le letsogo la gago le le otlologileng, fa a tla, mme a rapela a lebile ntlo e, ₃₃foo o utlwe o le kwa legodimong, e bong bonnong jwa gago, mme o dire ka fa go tsotlhe tse moeng o biletsang koo go wena ka ga tsone; gore ditšhaba tsotlhe tsa lefatshe di itse leina la gago, di go boife, jaaka batho ba gago Baiseraele, le gore ba itse fa ntlo e ke e agileng e bidiwa ka leina la gago.

₃₄“E re fa batho ba gago ba bololela baba ba bone ba ya go tlhabana nabo, le fa e ka ne e le tsela efe e o ba romang ka yone, mme fa ba go rapela ba lebile motse o, o o o itshenketseng, le ntlo e ke e agetseng leina la gago, ₃₅foo o utlwe o le kwa legodimong, o utlwe morapelo wa bone le mokokotlelo wa bone, mme o emele tshiamelo ya bone.

₃₆“Fa ba go leofela (gonne ga go na motho ope yo o sa leofeng) fa o nna bogale nabo, o ba neela baba ba bone, mme ba ba isa ba golegilwe kwa lefatsheng le le kgakala, kgotsa le le gaufi; ₃₇le fa go ntse jalo fa ba ikgopodisa ba le kwa lefatsheng le ba isitsweng kwa go lone ba golegilwe, mme fa ba sokologa ba go kokotlelela kwa lefatsheng la kgolego ya bone, ba re: ‘Re leofile, re dirile ka bokgopo, re dirile ka boikepo;’ ₃₈fa ba boela mo go wena ka pelo yotlhe ya bone le ka mowa otlhe wa bone, ba le kwa lefatsheng la kgolego ya bone, kwa ba ba isitseng gone ba golegilwe, mme fa ba rapela ba lebile lefatshe la ga bone, le o ne wa le naya borraabo, le motse o o ne wa o itshenkela, le ntlo e ke e agetseng leina la gago, ₃₉foo o utlwe o le kwa legodimong, e bong bonnong jwa gago, o utlwe morapelo wa bone le mekokotlelo ya bone, mme o emele tshiamelo ya bone; o itshwarele batho ba gago ba ba go leofetseng.

₄₀“Ka moo, Modimo wa me, ke a go rapela, a matlho a gago a buduloge, a ditsebe tsa gago di sekegele morapelo o o dirwang mo felong fa. ₄₁Ke gone jaana a ko o nanoge Jehofa Modimo, o tsene mo felong ga gago ga boikhutso, wena le letlole la nonotsho ya gago. A baperesiti ba gago Jehofa Modimo, ba apare poloko, mme a baitshepi ba gago ba itumele mo molemong.

₄₂“Jehofa Modimo, o se ka wa busa sefatlhogo sa motlodiwa wa gago; o gakologelwe mapelonomi a ga Dafite motlhanka wa gago.”