2 BAKORINTHE 9

₁Gonne ka ga go direla baitshepi, fa ke lo kwalela e tlaa bo e le go golola puo fela; ₂gonne ke a go itse go iketleetsa ga lona, mo ke ipelafatsang ka gone ka lona mo go ba Maketonia, ka ke rile ba lefatshe la Akaia ba sa le ba ipaakanya ngogola; mme tlhoafalo ya lona e tlhotlheleditse bontsi jwa bone. ₃Ke romile bakaulengwe, gore go ipelafatsa ga rona ka ga lona mo tirong e, go se ka ga nna lefela; ka re, lo tle lo etleetsege fela jaaka ke buile; ₄gore e se re kgotsa motlha mongwe, fa ke tla le bangwe ba Maketonia, ka fitlhela lo sa etleetsega, rona re sa reye lona, ra tla ra tlhabisiwa ditlhong ke go lo ikanya jaana. ₅Ke gone ke itheileng ka re, ke tshwanetse go rapela bakaulengwe gore ba ye koo go lona pele ga me, ba baakanyetse ruri mpho e lo e re solofeditseng gale, gore e tle e baakanyesege, e le mpho fela, e seng se se ntshiwang ka patiko.

₆Ke bua jaana ka re: Yo o jalang ka bongoma, o tlaa roba ga bongoma, yo o jalang ka bogolo, o tlaa roba ga bogolo. ₇A motho mongwe le mongwe a dire ka fa o ikaeletseng mo pelong ya gagwe ka teng; e seng ka go ngongorega, le fa e le ka patelelo, gonne Modimo o rata yo o abang ka pelotshweu fela. ₈Modimo o nonofile go lo totafaletsa tshegofatso yotlhe; gore e tle e re lo ntse lo na le mo go lekanyeng ga dilo tsotlhe, lo bo lo totafalele tiro nngwe le nngwe e e molemo. ₉Jaaka go kwadilwe ga twe: “O gasitse, o abetse bahumanegi; tshiamo ya gagwe e eme ka bosakhutleng.” ₁₀Yo nayang mojadi peo le senkgwe sa go jewa, o tlaa lo naya a ba a ntsifatsa peo ya lona e e jalwang, a ba a totisa maungo a tshiamo ya lona; ₁₁ka lo humisitswe dilo tsotlhe, gore lo ntshe mpho e kgolo, e e tlaa tsosang tebogo e e lebogang Modimo ka rona. ₁₂Gonne go abiwa ga thuso e, ga se gore go tlaa tlatsa go tlhoka ga baitshepi go le gosi; mme le gone go tlaa totafalela Modimo ka malebogo a le mantsi; ₁₃ka e re ka ba bona lo lekilwe ka tirelo e, bo ba galaletsa Modimo ka ga kutlo ya boipolelo jwa lona mo Mafokong a a Molemo a ga Keresete, le ka ga mpho e kgolo e lo e ntshetsang bone le botlhe fela; ₁₄le mororo bone ka bosi, ka ba ntse ba lo rapelela, ba lo tlhologeletswe ka ntlha ya tshegofatso e kgolo ya Modimo e e mo go lona. ₁₅A Modimo o lebogelwe neo ya one e e sa ka keng ya swediwa go bolelwa.