2 DIKGOSI 11

₁Jaana e rile Athalia, mmaagwe Ahasia a bona fa morwawe a sule, a nanoga a phimola losika lotlhe lwa segosi. ₂Mme Jehošebe, morwadia kgosi Jorame, kgaitsadia Ahasia, a tsaya Joaše morwa Ahasia, a mo utswa mo go bomorwa kgosi ba ba bolailweng, e bong ene le mmelegi wa gagwe, a ba tsenya mo ntlwaneng ya borobalo; ba mo subela Athalia, jalo a se ka a bolawa. ₃O ne a na nae a subilwe mo ntlong ya ga Jehofa ka dinyaga di le thataro; Athalia a bo a busa mo lefatsheng.

₄E rile ka ngwaga wa bosupa, Joiata a roma a ya go lere balaodi ba makgolo, ba Bakare le ba balebedi, a ba tlisa kwa go ene mo ntlong ya ga Jehofa; mme a dira kgolagano nabo, a ba ikanisa mo ntlong ya ga Jehofa, a ba supetsa morwa kgosi. ₅A ba laola a re: “Se lo tlaa se dirang ke se: bontlhanngwe jwa seraro jwa lona ba lo tlang ka Sabata, lo tlaa nna badisa ba tebelo ya ntlo ya kgosi; ₆bontlha jo bongwe jwa seraro lo tlaa nna fa kgorong ya Sure; le bontlhanngwe jo bongwe jwa seraro lo tlaa nna fa kgorong fa morago ga balebedi; jalo lo tlaa tshegetsa tebelo ya ntlo, lo nna sekganelo. ₇Masomo a mabedi a lona, e bong botlhe ba ba tswang ka Sabata ba tlaa tshegetsa tebelo ya ntlo ya ga Jehofa tikologong ya kgosi. ₈Lo tlaa dikanyeletsa kgosi, mongwe le mongwe a tshotse dibolao tsa gagwe; mme yo o tsenang ka fa teng ga mephato e e rulaganyeng, a a bolawe; e ne e re kgosi e tswa, le fa e tsena lo bo lo na nayo.”

₉Balaodi ba makgolo ba dira ka fa go tsotlhe tse Joiata moperesiti o di laotseng; mongwe le mongwe a tsaya banna ba gagwe ba ba laotsweng go tsena ka Sabata, le bone ba ba laotsweng go tswa ka Sabata, ba tla kwa go Joiata moperesiti. ₁₀Moperesiti a neela balaodi ba makgolo marumo le dithebe tse e kileng ya ne e le tsa kgosi Dafite, tse di mo ntlong ya ga Jehofa. ₁₁Balebedi ba ema, mongwe le mongwe a tshotse dibolao tsa gagwe, go tswa lotlhakoreng lwa ntlo lwa ka fa go le legolo go ya lotlhakoreng lwa ntlo lwa ka fa go la molema, ba tla ka sebeso le ntlo ba dikanyeditse kgosi. ₁₂Foo a ntsha morwa kgosi a mo rwesa serwalo sa bogosi, a mo naya tshupo, mme ba mo dira kgosi, ba mo tlotsa; ba opa diatla ba re: “A kgosi a tshele!”

₁₃E rile Athalia a utlwa modumo wa balebedi, le wa batho, a ya kwa bathong kwa ntlong ya ga Jehofa; ₁₄a leba, mme bonang, kgosi ya bo e eme fa lekotwaneng jaaka mokgwa, le balaodi ba le fa kgosing le dinaka; mme batho botlhe ba lefatshe ba itumela, ba letsa dinaka tse di lediwang. Foo Athalia a ikgagola diaparo, a goa a re: “Selo se mooko! Selo se mook se!”

₁₅Joiata moperesiti a laola balaodi ba makgolo ba ba laolang ntwa, a ba raya a re: “A a ntshediwe kwa ntle ga mephato e e rulaganyeng, mme ene yo o mo salang morago, a a mmolaye ka tšhaka;” gonne moperesiti a re: “A se bolaelwe mo ntlong ya ga Jehofa.” ₁₆Mme ba mo ntshetsa phatlha; mme a tsamaya ka tsela ya bogorogelo jwa dipitse kwa ntlong ya kgosi; mme a bolaelwa gone.

₁₇Joiata a dira kgolagano gare ga Jehofa le kgosi le batho, go re ba tlaa nna batho ba ga Jehofa; le gone gare ga kgosi le batho. ₁₈Batho botlhe ba lefatshe ba ya kwa ntlong ya ga Baale, ba e rutlolola; dibeso tsa gagwe le ditshwantsho tsa gagwe ba di thubaganyetsa ruri, mme ba bolaela Matane moperesiti wa ga Baale fa pele ga dibeso. Moperesiti a tlhomela ntlo ya ga Jehofa balaodisiwa. ₁₉A tsaya balaodi ba makgolo, le Bakara, le balebedi, le batho botlhe ba lefatshe; ba folosa kgosi kwa ntlong ya ga Jehofa, ba tla mo ntlong ya kgosi ka tsela ya kgoro ya balebedi. Mme a dula mo setulong sa bogosi sa dikgosi. ₂₀Jalo batho botlhe ba lefatshe ba itumela, motse wa iketla fela; mme Athalia ba mmolaela fa ntlong ya kgosi ka tšhaka.

₂₁E rile Joaše a simolola go busa, a bo a le dinyaga di supa.