2 DIKGOSI 15

₁E rile ka ngwaga wa 27 wa ga Jeroboame kgosi ya Iseraele, Asaria morwa Amasia kgosi ya Juta a simolola go busa. ₂O rile a simolola go busa a bo a le dinyaga di le 16; mme a busa ka dinyaga di le 52 mo Jerusalema; leina la ga mmaagwe e ne e le Jekolia wa Jerusalema. ₃A dira se se siameng mo matlhong a ga Jehofa, jaaka tsotlhe tse Amasia rraagwe o ne a di dirile. ₄Mme le fa go ntse jalo mafelo a a tlotlometseng ga a ka a tlosiwa; batho ba ne ba sa ntse ba isa ditlhabelo, ba fisa maswalo mo mafelong a a tlotlometseng. ₅Mme Jehofa a itaya kgosi, a ba a tla a nna molepero go ya tsatsing la loso lwa gagwe, mme a nna mo ntlong e e kwa thoko. Jothame morwa kgosi ya nna ene molaodi wa ntlo, a atlhola batho ba lefatshe.

₆Jaana ditiro tse dingwe tsa ga Asaria le tsotlhe tse o ne a di dira, a ga di a kwalwa mo lokwalong lwa ditirafalo tsa dikgosi tsa Juta? ₇Asaria a robala le borraagwe; mme ba mo fitlha le borraagwe mo motseng wa ga Dafite; Jothame morwawe a busa mo boemong jwa gagwe.

₈E rile ka ngwaga wa 38 wa ga Asaria kgosi ya Juta, Sekaria morwa Jeroboame a busa Baiseraele mo Samaria ka dikgwedi di le thataro. ₉A dira se se bosula mo ponong ya ga Jehofa, jaaka borraagwe ba ne ba dirile; ga a ka a fapoga mo maleong a ga Jeroboame morwa Nebate, a o ne a leofisa Baiseraele ka one. ₁₀Mme Shalume morwa Jabeše a mo rera, mme a mo itaya fa pele ga batho, a mmolaya, mme a busa mo boemong jwa gagwe.

₁₁Jaana ditiro tse dingwe tsa ga Sekaria, bonang, di kwadilwe mo lokwalong lwa ditirafalo tsa dikgosi tsa Iseraele.

₁₂Le ke lone lefoko la ga Jehofa le o ne a le bua le Jehu a re: “Bomorwao ba tlaa dula mo setulong sa bogosi sa Iseraele go ya go fitlha mo kokomaneng ya bone.” Mme ga dirafala fela jalo.

₁₃Shalume morwa Jabeše a simolola go busa ka ngwaga wa 39 wa ga Usia kgosi ya Juta; a busa ka sebaka sa kgwedi e le nngwe fela mo Samaria.

₁₄Menaheme, morwa Gadi, a tswa kwa Tiresa, a tla mo Samaria, a itaya Shalume morwa Jabeše mo Samaria, a mmolaya, mme a busa mo boemong jwa gagwe. ₁₅Jaana ditiro tse dingwe tsa ga Shalume, le morero o o ne a o dira, bonang di kwadilwe mo lokwalong lwa ditirafalo tsa dikgosi tsa Iseraele. ₁₆Foo Menaheme a kgemetha Tifesa le botlhe ba ba gone, le melelwane ya gone, go tswa Tiresa; ka ba se ka ba mmulela, ke gone ka fa o ne a ba kgemetha ka gone; le basadi botlhe ba ba gone ba ba ithweleng a ba roposa.

₁₇E rile ka ngwaga wa 31 wa ga Asaria kgosi ya Juta, Menaheme morwa Gadi a simolola go busa Baiseraele, a busa ka dinyaga di le some mo Samaria. ₁₈A dira se se bosula mo ponong ya ga Jehofa; mme ka metlha yotlhe ya gagwe ga a ka a fapoga mo maleong a ga Jeroboame morwa Nebate a o ne a leofisa Baiseraele ka one. ₁₉Pule kgosi ya Asiria a bololela lefatshe; mme Menaheme a naya Pule ditalenta tsa selefera di le 1 000 gore letsogo la gagwe le nne nae go tlhomamisa bogosi mo seatleng sa gagwe. ₂₀Menaheme a tsaya madi ka patiko mo go Baiseraele, e bong mo digankeng tsotlhe tse di humileng, dipapetlana di le 50 tsa selefera mo go mongwe le mongwe, go tla a a naya kgosi ya Asiria. Kgosi ya Asiria ya boela kwa morago, ya se ka ya diega gone mo lefatsheng. ₂₁Jaana ditiro tse dingwe tsa ga Menaheme, le tsotlhe tse o ne a di dira, a ga di a kwalwa mo lokwalong lwa ditirafalo tsa dikgosi tsa Iseraele? ₂₂Menaheme a robala le borraagwe, mme Pekahia morwawe, a busa mo boemong jwa gagwe.

₂₃E rile ka ngwaga wa 50 wa ga Asaria kgosi ya Juta, Pekahia morwa Menaheme a simolola go busa Baiseraele mo Samaria, mme a busa ka dinyaga di le pedi. ₂₄A dira se se bosula mo ponong ya ga Jehofa; ga a ka a fapoga mo maleong a ga Jeroboame morwa Nebate a o ne a leofisa Baiseraele ka one. ₂₅Peka morwa Remalia, molaodi wa ntwa ya gagwe, a mo rera a mo itaya mo Samaria, mo kagong e e thata ya ntlo ya kgosi a na le Aregobe le Aria; a bile a na le banna ba le 50 ba Bagileate; mme a mmolaya, a busa mo boemong jwa gagwe.

₂₆Jaana ditiro tse dingwe tsa ga Pekahia le tsotlhe tse o ne a di dira, di kwadilwe mo lokwalong lwa ditirafalo tsa dikgosi tsa Iseraele.

₂₇E rile ka ngwaga wa 52 wa ga Asaria kgosi ya Juta, Peka morwa Remalia a simolola go busa Baiseraele mo Samaria, a busa ka dinyaga di le 20. ₂₈Mme a dira se se bosula mo ponong ya ga Jehofa; ga a ka a fapoga mo maleong a ga Jeroboame morwa Nebate, a o ne a leofisa Baiseraele ka one.

₂₉Ya re mo metlheng ya ga Peka kgosi ya Iseraele, Tigelathe-pilesere kgosi ya Asiria a tla a gapa Ijone, le Abele wa Bethemaaka, le Janoa, le Keteše, le Hasora, le Gileate, le Galilea, lefatshe lotlhe la Nafetali; mme batho a ba isa kwa Asiria ba golegilwe.

₃₀Hošea morwa Ela a rera Peka morwa Remalia, a mo itaya, a mmolaya, mme a busa mo boemong jwa gagwe, ka ngwaga wa 20 wa ga Jothame morwa Usia. ₃₁Jaana ditiro tse dingwe tsa ga Peka le tsotlhe tse o ne a di dira, bonang, di kwadilwe mo lokwalong lwa ditirafalo tsa dikgosi tsa Iseraele.

₃₂E rile ka ngwaga wa bobedi wa ga Peka morwa Remalia kgosi ya Iseraele, Jothame morwa Usia kgosi ya Juta a simolola go busa. ₃₃E rile a simolola go busa a bo a le dinyaga di le 25; a busa ka dinyaga di le 16 mo Jerusalema; leina la ga mmaagwe e ne e le Jeruše morwadia Satoke. ₃₄A dira se se siameng mo matlhong a ga Jehofa; a dira jaaka tsotlhe tse Usia rraagwe o ne a di dirile. ₃₅Mme le fa go ntse jalo mafelo a a tlotlometseng ga a ka a tlosiwa; batho ba ne ba sa ntse ba isa ditlhabelo, ba fisa maswalo mo mafelong a a tlotlometseng. Ke ene yo o ne a swafatsa kgoro e e ka fa godimo ya ntlo ya ga Jehofa.

₃₆Jaana ditiro tse dingwe tsa ga Jothame, le tsotlhe tse o ne a di dira, a ga di a kwalwa mo lokwalong lwa ditirafalo tsa dikgosi tsa Juta? ₃₇Ya re mo metlheng eo Jehofa a simolola go bololetsa Juta, Resine kgosi ya Siria le Peka morwa Remalia. ₃₈Jothame a robala le borraagwe, mme a fitlhwa le borraagwe mo motseng wa ga Dafite rraagwe; Ahase morwawe a busa mo boemong jwa gagwe.