2 DIKGOSI 21

₁E rile Manase a simolola go busa a bo a le dinyaga di le 12; mme a busa ka dinyaga di le 55 mo Jerusalema; leina la ga mmaagwe e ne ele Hefesiba. ₂A dira se se bosula mo ponong ya ga Jehofa, ka fa go tse di makgapha tsa ba ditšhaba ba Jehofa o ne a ba kgorometsa fa pele ga bana ba Iseraele. ₃Gonne o ne a ba a aga mafelo a a tlotlometseng a Hesekia rraagwe o ne a a sentse; a agela Baale dibeso, a ba a dira Modimako, jaaka Ahabe kgosi ya Iseraele a kile a dira, a obamela bontsi jotlhe jwa legodimo, a bo direla. ₄A aga dibeso mo ntlong ya ga Jehofa, e Jehofa o ne a bua ka ga yone, a re: “Ke tlaa baya leina la me mo Jerusalema.” ₅A agela bontsi jwa legodimo dibeso mo malwapeng a mabedi a ntlo ya ga Jehofa. ₆A ralatsa morwawe molelo, a swaba ka maru, a dira ka mereo, a dira le bone ba ba buang le badimo, le ba ba loang; a dira bosula bo le bogolo mo ponong ya ga Jehofa, go mo tlhotlheletsa mo bogaleng. ₇Setshwantsho se se setilweng sa Modimako se o ne a se dirile, a se tlhoma mo ntlong e Jehofa o kileng a bua ka ga yone le Dafite le Solomone morwawe a re: “Mo ntlong e, le mo Jerusalema, o ke o itshenketseng mo ditsong tsotlhe tsa Iseraele, ke tlaa baya leina la me gone ka bosakhutleng; ₈le gone ga nketla ke tlhola ke kgarakgatsha dinao tsa Iseraele ka go ba ntsha mo lefatsheng le ke le neileng borraabo; ke raya fa ba tlhokomela go dira jaaka tsotlhe tse ke di ba laoletseng, le jaaka molao otlhe o motlhanka wa me Moše o ne a o ba laolela.” ₉Mme ga ba a ka ba reetsa, Manase a ba oka, gore ba dire se se bosula go feta ditšhaba tse Jehofa o ne a di senya fa pele ga bana ba Iseraele.

₁₀Jehofa a bua ka baperofeti batlhanka ba gagwe, a re: ₁₁“E re ka Manase kgosi ya Juta a dirile dilo tse di makgapha, a dirile ka boikepo go feta tsotlhe tse Baamora ba kileng ba di dira, ba ba neng ba le pele ga gagwe, a leofisitse Bajuta le bone ka medimo ya gagwe ya disetwa; ₁₂ke gone ka moo Jehofa Modimo wa Iseraele o bua jaana a re: ‘Bona, ke tlaa tlisa bosula mo Jerusalema le Juta, jo e tlaa reng mongwe le fa e ka ne e le mang a bo utlwela, ditsebe tsa gagwe tsoo pedi di be di sume. ₁₃Thodi ya Samaria ke tlaa e namalatsa mo godimo ga Jerusalema, le selekanyo sa thokgamo sa ba ntlo ya ga Ahabe; ke tlaa phimola Jerusalema jaaka motho a tle a phimole sejana, a se phimole, a se pitikolole. ₁₄Ke tlaa latlha masalela a boswa jwa me, ke ba tsenya mo seatleng sa baba ba bone; ba tlaa nna kgapo le thopo mo babeng botlhe ba bone, ₁₅ka ba dirile bosula mo ponong ya me, mme ba ntlhotlheleditse bogaleng, go simolola ka tsatsi le borraabo ba duleng kwa Egepeto ka lone, nako e sa le eno.’ ”

₁₆Gape Manase a tsholola madi a batho a a se nang molato a le magolo thata, a ba a tla a tlatsa Jerusalema ka one, go tswa ntlheng nngwe le go ya e nngwe; kwa ntle ga boleo jo o ne a leofisa Bajuta ka jone, ka go dira se se bosula mo ponong ya ga Jehofa.

₁₇Ditiro tse dingwe tsa ga Manase, le tsotlhe tse o ne a di dira, le boleo jo o ne a bo leofa, a ga di a kwalwa mo lokwalong lwa ditirafalo tsa dikgosi tsa Juta? ₁₈Mme Manase a robala le borraagwe, a fitlhwa mo tshimong ya ntlo ya gagwe, mo tshimong ya ga Usa; mme Amone morwawe a busa mo boemong jwa gagwe.

₁₉E rile Amone a simolola go busa a bo a le dinyaga di le 20; mme a busa ka dinyaga di le pedi mo Jerusalema; leina la ga mmaagwe e ne e le Mešulemethe morwadia Haruse wa Joteba. ₂₀A dira se se bosula mo ponong ya ga Jehofa jaaka Manase rraagwe a ne a dira. ₂₁A sepela mo tseleng yotlhe e rraagwe o ne a sepela mo go yone, a ba a direla medimo ya disetwa e rraagwe o ne a e direla, a e obamela; ₂₂a latlha Jehofa Modimo wa borraagwe, a se ka a sepela mo tseleng ya ga Jehofa.

₂₃Batlhanka ba ga Amone ba mo rera, mme ba bolaela kgosi mo ntlong ya yone. ₂₄Mme batho ba lefatshe ba bolaya bone botlhe ba ba rerileng kgosi Amone; mme batho ba lefatshe ba dira Josia morwawe kgosi mo boemong jwa gagwe.

₂₅Jaana ditiro tse dingwe tsa ga Amone tse o ne a di dira, a ga di a kwalwa mo lokwalong lwa ditirafalo tsa dikgosi tsa Juta? ₂₆Mme a fitlhwa mo phupung ya gagwe mo tshimong ya ga Usa; mme Josia morwawe a busa mo boemong jwa gagwe.