Ntwa ya Baiseraele le Bamoabe
1Jaana Jorame morwa Ahabe a simolola go busa Baiseraele mo Samaria ka ngwaga wa 18 wa ga Jehošafate kgosi ya Juta, a busa ka dinyaga di le 12. 2A dira se se bosula mo ponong ya ga Jehofa; e seng jaaka rraagwe le jaaka mmaagwe; gonne o ne a tlosa lentswe le le emeng motloutlo la ga Baale, le rraagwe o ne a le dirile. 3Le fa go ntse jalo a ngaparela maleo a ga Jeroboame morwa Nebate, a o ne a loefisa Baiseraele ka one; ga a ka a fapoga mo go one.
4Jaana Meša kgosi ya Moabe e ne e le modisa wa dinku; mme o ne a tle a neye kgosi ya Iseraele bobowa jwa dikwanyana di le 100 000, le jwa diphelefu di le 100 000. 5Ga dirala e rile Ahabe a sena go swa, kgosi ya Moabe a tsuololela kgosi ya Iseraele. 6Kgosi Jorame a tswa mo Samaria ka baka loo, a phutha Baiseraele botlhe. 7A roma kwa go Jehošafate kgosi ya Juta, a re: “Kgosi ya Moabe e ntsuololetse; a o tlaa ya le nna go tlhabana le Bamoabe?” A re: “Ke tlaa ya; nna ke ntse jaaka wena, batho ba me ba ntse jaaka ba gago, dipitse tsa me di ntse jaaka dipitse tsa gago.” 8A re: “Re tlaa tsaya tsela efe?” A mo fetola a re: “A re tseye tsela ya naga ya Etome.”
9Jalo kgosi ya Iseraele ya bolola, le kgosi ya Juta, le kgosi ya Etome; ba potologa ka loeto lwa malatsi a supa. Go ne go se na metsi a a nowang ke ntwa, le fa e le ke dilo tse ba belesitseng ka tsone. 10Jalo kgosi ya Iseraele ya re: “Ija; gonne Jehofa o phuthile dikgosi tse tharo tse go tla a di tsenya mo seatleng sa Moabe.”
11Jehošafate a re: “A ga go na moperofeti wa ga Jehofa fano, gore re tle re botse mo go Jehofa ka ene?” Mongwe wa batlhanka ba kgosi ya Iseraele, a re: “Eliša morwa Shafate yo o ne a tle a tlhapise Elija diatla, o fa.”
12Jehošafate a re: “Lefoko la ga Jehofa le na nae.” Mme kgosi ya Iseraele, le Jehošafate, le kgosi ya Etome ba ya kwa go ene.
13Eliša a raya kgosi ya Iseraele a re: “Ke dirang ka wena? Ya baperofeting ba ga rraago, le kwa baperofeting ba ga mmaago.” Kgosi ya Iseraele ya mo raya ya re: “Nnyaa; gonne Jehofa o phuthile dikgosi tse tharo tse go tlaa a di tsenya mo seatleng sa Moabe.”
14Eliša a re: “Jaaka Jehofa wa masomosomo a tshedile, yo ke emang fa pele ga gagwe, ruri, fa e ka bo e se go re ke tlhokometse Jehošafate, kgosi ya Juta jaaka a le fa, nka bo ke sa lebe kwa go wena, le fa e le go go bona. 15Jaana nteretseng moletsi.” Ga dirala ya re moletsi a letsa, seatla sa ga Jehofa sa tla mo go ene. 16Mme a re: “Jehofa o bua jaana, a re: ‘Epang mesele mo molapong o, e tlale ka one.’ 17Gonne Jehofa a re: ‘Ga lo ketla lo bona phefo, le gone ga lo ketla lo bona pula, le fa go ntse jalo molapo o o tlaa tlala metsi; lo tlaa nwa, lona le dikgomo tsa lona, le dipelesa tsa lona.’ 18Mme selo se ya bo e le se se motlohofo fela mo ponong ya ga Jehofa; le gone o tlaa tsenya Moabe mo seatleng sa lona. 19Lo kgemethe motse mongwe le mongwe o o thekeleditsweng, le motse mongwe le mongwe o o tlhophegileng, lo reme setlhare sengwe le sengwe se se molemo, lo katele metswedi yotlhe ya metsi, lo senyake sebata sengwe le sengwe se se molemo sa lefatshe ka maje.”
20Ga dirala ya re ka mošo, e ka ne e le ka lobaka lwa fa go isiwa seromololo, ga bo go tla metsi ka tsela ya Etome, mme lefatshe la tlala metsi.
21Jaana e rile Bamoabe botlhe ba utlwa fa dikgosi di tsile go tlhabana nabo, ba phuthega, botlhe ba e leng gone ba nonofang go tlhomela dibolao, le go ya kwa bagoding, mme ba ema fa molelwaneng. 22Ba tsoga ka maphakela, mme letsatsi la bo le phatsimela mo metsing, Bamoabe ba bona metsi bolebagana nabo a le mahibidu jaaka madi; 23ba re: “Seo se ke madi; ruri dikgosi di senyegile, di bile di bolaanye; mme jaana Moabe a re, yang thopong.”
24Mme e rile ba tla bothibelelong jwa Baiseraele, Baiseraele ba nanoga, ba kgemetha Bamoabe, ba ba ba tla ba tshaba fa pele ga bone; ba tswelela kwa lefatsheng ba eta ba kgemetha Bamoabe. 25Ba rutlolola metse; mme ya re mo sebateng sengwe le sengwe se se molemo sa lefatshe motho mongwe le mongwe a latlhele lentswe la gagwe, ba se tlatse; ba katela metswedi yotlhe ya metsi, ba rema ditlhare tsotlhe tse di molemo; ba ba ba tla mo Kireharesethe, ba tlogela maje a one go le gosi fela; le fa go ntse jalo ba metsekedi ba a potologa, ba o konopa.
26Ya re kgosi ya Moabe e bona fa tlhabano e le botlhoko bobe mo go ene, ya tsaya banna ba le 700 ba ba itseng go janja ka tšhaka, a re, o thobeselela kwa kgosing ya Etome; mme ba retelelwa. 27Foo a tsaya morwawe yo mogolo yo o tlaa busang mo boemong jwa gagwe, a mo isa tshupelo e e fisiwang godimo ga lorako. Ga nna kgakatsego e kgolo ka ga Iseraele; mme ba mo tlogela ba boela kwa lefatsheng la ga bone.
