2 SAMUELE 2

₁Ya re morago ga moo, Dafite a botsa mo go Jehofa a re: “A ke ke ye kwa metseng mengwe ya Juta?” Jehofa a mo raya a re: “Ya.” Dafite a re: “Ke tlaa ya kae?” Mme a re: “Kwa Heberone.” ₂Jalo Dafite a ya gone, le basadi ba gagwe ba babedi, Ahinoame wa Mojesereele, le Abigaile mosadi wa ga Nabale wa Mokaremele. ₃Le banna ba gagwe ba ba nang nae Dafite a ya nabo, mongwe le mongwe a na le ba ntlo ya gagwe; mme ba aga mo metseng ya Heberone. ₄Banna ba Juta ba tla ba tlotsa Dafite gone, gore a nne kgosi ya ba kgotla ya ga Juta. Ba bolelela Dafite ba re: “Banna ba Jabeše-gileate ke bone ba ba fitlhileng Saule.” ₅Dafite a roma batho kwa banneng ba Jabeše-gileate, a ba raya a re: “Lo segofadiwe ke Jehofa ka lo diretse morena wa lona, e bong Saule, bopelonomi jo, lwa mo fitlha. ₆Jaana a Jehofa a nne bopelonomi le boammaaruri mo go lona; le nna ke tlaa lo lefela bopelonomi jo, ka lo dirile selo se. ₇Jaana a mabogo a lona a nne thata, lo bo lo nne pelokgale; gonne Saule morena wa lona o sule, le gone ba kgotla ya ga Juta ba ntloditse, gore ke nne kgosi ya bone.”

₈Jaana Abenere morwa Nere, molaodi wa ntwa ya ga Saule, o ne a tshotse Išibošethe morwa Saule, a mo isitse kwa Mahanaime; ₉a mo dirile kgosi ya Gileate, le ya Baašure, le ya Jesereele, le ya Eferaime le ya Baiseraele botlhe. ₁₀Išibošethe morwa Saule a bo a le dinyaga di le 40 fa a simolola go busa Baiseraele, mme a busa ka dinyaga di le pedi. Ba kgotla ya ga Juta ba sala Dafite morago. ₁₁Lobaka lwa fa Dafite a le kgosi mo Heberone ya ba kgotla ya ga Juta, e ne e le dinyaga di supa le dikgwedi di le thataro.

₁₂Abenere morwa Nere, a bo a na le batlhanka ba ga Išibošethe morwa Saule, a tswa Mahanaime a ya Gibeone. ₁₃Joabe morwa Seruja a na le batlhanka ba ga Dafite, a tswa a kopana nabo fa lekadibeng la Gibeone; mme ba dula, mongwe ka fa ntlheng nngwe ya lekadiba, yo mongwe ka fa ntlheng e nngwe ya lekadiba. ₁₄Abenere a raya Joabe a re: “Ke a go rapela, a makau a nanoge, a tshameke fa pele ga rona.” Joabe a re: “A ba nanoge.”

₁₅Foo ba nanoga, ba kgabaganya ka go balwa; boora Benjamine, le boora Išibošethe morwa Saule, ba le 12, le batlhanka ba ga Dafite ba le 12. ₁₆Ba tshwaragana ka ditlhogo, mongwe le mongwe a tshwara yo o lebaganyeng nae, ba sotlhetsana ditšhaka mo ditlhakoreng; ba wa mmogo; ke gone ka moo felo foo ga bidiwa ga twe, Helekathe-hasurime, o mo Gibeone.

₁₇Tlhabano e ne e le botlhoko thata ka tsatsi leo; mme Abenere a fenngwa le banna ba Iseraele, fa pele ga batlhanka ba ga Dafite. ₁₈Bomorwa Seruja boo bararo ba bo ba le gone, e bong Joabe le Abisai le Asahele; Asahele a bo a le maoto a a bofefo jaaka phologolo ya naga. ₁₉Asahele a konatelela Abenere; ya re a tsamaya a se ka a fapogela ka fa go le legolo le fa e le ka fa go la molema a ntse a setse Abenere morago. ₂₀Foo Abenere a gadima a re: “A ke wena, Asahele?” Mme a araba a re: “Ke nna.”

₂₁Abenere a mo raya a re: “Fapogela ntlheng ya le legolo kgotsa ya la molema, o tshware mongwe wa makau o tseye dibolao tsa gagwe.” Asahele a gana go fapoga mo go saleng ene morago. ₂₂Abenere a fela a raya Asahele gape a re: “Fapoga tlhe mo go ntshaleng morago; ana nka bo ke go itaanyetsang mo mmung? Jalo ke ne ke tlaa iponatsa jang mo go Joabe mogoloo?” ₂₃Mme le fa go ntse jalo a gana go fapoga; mme ka ntlha ya gone moo Abenere a mo swatlha mo mogodung ka ntlha ya theku ya lerumo la gagwe, mme lerumo la ya go tswa ka fa motlhaneng wa gagwe; mme a wela foo, a swela gone felong foo; ga dirala ya re botlhe ba ba fitlhang gone fa Asahele o wetseng a swela gone, ba ema.

₂₄Joabe le Abisai ba konatelela Abenere; letsatsi la ba phirimela ba fitlha fa thabeng ya Ama, e e lebaganyeng le Gia mo tseleng ya naga ya Gibeone. ₂₅Bana ba Benjamine ba phuthegela go Abenere, ba nna lesomo le le lengwe fela, ba ya ba ema mo godimo ga thaba nngwe. ₂₆Foo Abenere a tlhaeletsa Joabe a re: “A tšhaka e tlaa ja ka bosakhutleng? A ga o itse fa go tlaa nna botlhoko kwa bokhutlong? E tlaa nna lobaka lo lo kae, o ntse o sa reye batho gore ba boe mo go lelekeng ba ga bone?”

₂₇Joabe a re: “Jaaka Modimo o tshedile, fa o ka bo o ne o se ka wa bua, ruri batho ba ka bo ba sa le ba tsamaya ka moso, mongwe le mongwe o ka bo a se ka a leleka ngwana a rraagwe.” ₂₈Joabe a letsa lonaka, batho botlhe ba ema, ba se ka ba tlhola ba konatelela Baiseraele, le gone ba se ka ba tlhola ba tlhabana.

₂₉Abenere le banna ba gagwe ba lala ba tsamaya bosigo joo jotlhe ba raletse Areba; ba kgabaganya Joretane, ba ralala lefatshe lotlhe la Bitherone, ba fitlha mo Mahanaime.

₃₀Joabe a boa kwa go lelekeng Abenere; e rile a sena go phutha batho botlhe ga tlhokafala batlhanka ba ga Dafite ba le 19, le Asahele. ₃₁Batlhanka ba ga Dafite ba ne ba kgemethile boora Benjamine, le banna ba ga Abenere, ga tsamaya ga a swa banna ba le 360. ₃₂Ba tsaya Asahele ba mo fitlha mo phupung ya ga rraagwe, e e neng e le mo Bethelehema. Joabe le banna ba gagwe ba lala ba tsamaya bosigo jotlhe, mme ba selwa kwa Heberone.