2 SAMUELE 21

₁E rile mo metlheng ya ga Dafite ga nna leuba ka dinyaga di le tharo, ka ngwaga le ngwaga; Dafite a batla sefatlhogo sa ga Jehofa. Mme Jehofa a re: “Ke ka ntlha ya ga Saule, le ka ntlha ya ba ntlo ya gagwe ba ba diatla di madi, ka a ne a bolaya Bagibeone.” ₂Kgosi ya bitsa Bagibeone, ya ba raya ya re, (le gale Bagibeone e ne e se ba bana ba Iseraele, ya bo e le ba masalela a Baamore; bana ba Iseraele ba ne ba ba ikanetse; e rile Saule a tlhoafaletse bana ba Iseraele le ba Juta, a batla go bolaya Bagibeone.) ₃Dafite a raya Bagibeone a re: “Ke tlaa lo direlang? Ke tlaa lefa kang, gore lo tle lo segofatse boswa jwa Jehofa.”

₄Bagibeone ba mo raya ba re: “Ga go kgang epe e e ka lefwang ka selefere le fa e le ka gouta gare ga rona le Saule, kgotsa ba ntlo ya gagwe; le gone ga se ga rona go bolaya monna ope mo Iseraele.” A re: “Se lo tlaa se buang ke tlaa se lo direla fela.” ₅Ba raya kgosi ba re: “Monna yo o re nyeleditseng, le yo o ne a re logela maano gore re senngwe re se ka ra sala mo melelwaneng epe ya Iseraele, ra re: ₆A re neelwe banna basupa ba bomorwawe, mme re tlaa ba pegela Jehofa mo Gibea wa ga Saule, moitshenkedwi wa ga Jehofa.” Kgosi ya re: “Ke tlaa ba ntsha.” ₇Mme kgosi ya rekegela Mefibošethe morwa Jonathane morwa Saule, ka ntlha ya ikano ya ga Jehofa e e neng e le gare ga bone, gare ga Difite le Jonathane morwa Saule. ₈Kgosi ya tsaya bomorwa boo babedi ba ga Risepa morwadia Aia, ba o ne a ba bona le Saule, e bong Aremoni le Mefibošethe; le morwa Mikale morwadia Saule, ba batlhano, ba o ne a ba bona le Ateriele morwa Baresilai wa Meholathe; ₉a ba tsenya mo diatleng tsa Bagibeone, mme ba ba pega mo thabeng fa pele ga Jehofa, ba wa mmogo boo basupa; ba bolawa mo motlheng wa thobo, mo malatsing a ntlha mo tshimologong ya thobo ya barele.

₁₀Risepa morwadia Aia a tsaya letsela la kgetse, a le ikalela mo letlapeng, go tswa tshimologong ya thobo metsi a ba a tla a ba thelegela a tswa legodimong; mme a se ka a leseletsa dinonyane tsa loapi go nna mo go bone motshegare, le fa e le dibatana tsa nago bosigo.

₁₁Ga bolelelwa Dafite se Risepa morwadia Aia, mogadingwana wa ga Saule o se dirileng. ₁₂Dafite a ya a tsaya marapo a ga Saule le marapo a ga Jonathane morwawe mo bathong ba Jabeše-gileate, ba ba kileng ba a utswa mo mmileng wa Bethešeane, kwa Bafilisitia ba ne ba a pegile gone, ka tsatsi le Bafilisitia ba bolaileng Saule ka lone mo Gileboa. ₁₃A tlhatlosa marapo a ga Saule le marapo a ga Jonathane morwawe; ba ba ba phutha marapo a bone ba ba pegilweng. ₁₄Ba fitlha marapo a ga Saule le Jonathane morwawe mo lefatsheng la Benjamine mo Sela, mo phupung ya ga Kiše rraagwe; ba dira gotlhe mo kgosi e go laotseng. Morago ga moo Modimo wa rapelesega ka ga lefatshe.

₁₅Bafilisitia ba ba ba tlhabana le Baiseraele; Dafite a fologa, a na le batlhanka ba gagwe, a tlhabana le Bafilisitia; mme Dafite a lapa. ₁₆Išibibenobe, yo e ne e le wa bomorwa monna wa morobana, yo bokete jwa lerumo la gagwe e ne e le dišekela di le makgolo mararo tsa kgotlho ka bokete, ka a ne a ikgatlheletse ka tšhaka e ntšha, a gopola go bolaya Dafite. ₁₇Abišai morwa Seruja a mo thusa, a itaya Mofilisitia, a mmolaya. Foo banna ba ga Dafite ba mo ikanela ba re: “Ga o ketla o tlhola o bolola ntwa le rona, gore o se ka wa tima lobone lwa Iseraele.”

₁₈Ga dirala ya re morago ga moo ga tlhabanwa gape le Bafilisitia kwa Gobe; foo Sibekai wa Mohušathe a bolaya Safe, yo e ne e le wa bomorwa monna wa morobana.

₁₉Ga tlhabanwa gape le Bafilisitia kwa Gobe; mme Elehanane morwa Jaare-oregime wa Mobethelehema a bolaya Goliathe wa Mogite, yo lore lwa lerumo la gagwe lo ne lo tshwana le mosipuri wa monyedi.

₂₀Gape ga nna tlhabano kwa Gathe, kwa go ne go na le monna yo o godileng thata gone, yo o ne a na le menwana e le merataro mo seatleng sengwe le sengwe, le menwana e le merataro mo lonaong longwe le longwe, ke go re, e le 24 go le mmogo; le ene e le morwa monna wa morobana. ₂₁Ya re a kgoba Iseraele, Jonathane morwa Shimei mogolo wa Dafite a mmolaya.

₂₂Ba bane bao e ne e le bomorwa monna wa morobana mo Gathe; mme ba wa ka seatla sa ga Dafite le ka seatla sa batlhanka ba gagwe.