DITIRO 11

₁Jaana baaposetole le bakaulengwe ba ba mo Jutea, ba utlwa fa Baditšhaba le bone ba amogetse lefoko la Modimo. ₂Mme e rile Petere a sena go tlhatlogela kwa Jerusalema, ba e leng ba bogwera ba ganela nae, ba re: ₃“O ile wa tsena mo banneng ba ba sa rupang, wa ja nabo.” ₄Mme Petere a simolola a ba phuthololela tiro e ka thulaganyo:

₅A re: “Ke ne ke le mo motseng wa Jopa ke rapela; mme ya re ke le mo tsitegong ya pelo ka bona ponatshegelo; setsholo sengwe sa fologa e kete letsela le legolo, le lepeleditswe mo legodimong ka dinaka tsoo nne; la tla fela fa go nna. ₆Le re rileng ke sena go le tsepega matlho, ka akanya, ka bona ditshedi tse di maoto mane tsa lefatshe, le ditshedi tsa naga, le tse di gagabang, le dinonyane tsa loapi. ₇Le gone ka utlwa lentswe le nthaya le re: ‘Tsoga Petere; tlhaba o je.’ ₈Ka re: ‘A go se nne jalo, Morena; gonne ga go ise go ke go tsene sepe se e leng selo fela, le se se sa itshekang mo ganong la me gope.’ ₉Mme lentswe la mphetola lwa bobedi le tswa legodimong, la re: ‘Se Modimo o se ntlafaditseng, o se ka wa se kaya selo fela.’ ₁₀Golo mo, ga dirwa gararo; mme gotlhe ga ba ga gogelwa kwa legodimong. ₁₁Bonang, ka bonako ga ema banna ba le bararo fa pele ga ntlo e re mo go yone, ba romilwe kwa go nna ba tswa kwa Kaesarea. ₁₂Mowa wa nthaya wa re, ke ye nabo, ke sa tlhaole ope. Le bakaulengwe ba barataro ba, ba mpata, mme ra ya ra tsena mo ntlong ya monna yo. ₁₃Mme a re bolelela ka fa o bonyeng moengele a eme mo ntlong ya gagwe ka teng, a mo raya a re: ‘Roma kwa Jopa, o ye go lere Simone, yo o bidiwang Petere; ₁₄yo o tlaa buang nao mafoko a o tlaa bolokwang ka one, wena le botlhe ba ntlo ya gago.’ ₁₅E rile ke simolola go bua fela, Mowa o o Boitshepo wa ba wela fela jaaka rona mo tshimologong. ₁₆Mme ka gakologelwa lefoko la Morena, jaaka a rile: ‘Le gale Johane o kolobeditse ka metsi; mme lona lo tlaa kolobediwa ka Mowa o o Boitshepo.’ ₁₇Ke gone e re fa Modimo o ba neile neo e e etsang e o e re neileng le rona, jale ka re dumela mo go Morena Jesu Keresete, ka bo ke le mang, fa nka ganela le Modimo?”

₁₈Ya re ba utlwa dilo tse, ba didimala fela, mme ba baka Modimo, ba re: “Jalo Baditšhaba le bone Modimo o ba neile boikwatlhao jwa go bona botshelo.”

₁₉Ba ba faladitsweng jale ka pitlagano e e tsogileng ka ga Setefane, ba ya ba fitlha kwa Fenikia, kwa Kupero, le kwa Antioke, ba sa bue le ope lefoko fa e se Bajuta ba le bosi fela. ₂₀Mme ga bo go le bangwe ba bone, e le banna ba Kupero le Kurene, ba e rileng ba tsile mo Antioke, ba bua le Bagerika le bone, ba ba rerela Morena Jesu. ₂₁Mme seatla sa Morena sa nna nabo, mme batho ba le bantsi thata ba ba dumetseng ba sokologela mo Moreneng.

₂₂Tumedi ya bone ya fitlha ya utlwala mo phuthegong e e kwa Jerusalema, mme ba ntsha Barenabase ba mo roma kwa Antioke, ₂₃yo e rileng a fitlha, mme a bona tshegofatso ya Modimo, a itumela; mme a ba gakolola botlhe, gore ba ngaparele Morena ka tlhomamo ya pelo; ₂₄gonne e ne e le monna yo o molemo, a tletse Mowa o o Boitshepo le tumelo. Mme batho ba le bantsi ba oketsegela Morena.

₂₅Mme a tswelela kwa Tareso, a ya go batla Saule; ₂₆ya re a sena go mmona, a tla nae mo Antioke. Ga dirala gore ga feta ngwaga o o tletseng ba ntse ba phuthegile le phuthego; mme ba ruta batho ba le bantsi; le gone barutwa ba simologile ba bidiwa Bakeresete lwa ntlha mo Antioke.

₂₇Ya re mo metlheng eo ga tswa baperofeti kwa Jerusalema ba tla mo Antioke. ₂₈Ga ema mongwe wa bone, go twe Agabuse, mme a kaya ka Mowa fa go tlaa nna leuba le legolo mo lefatsheng lotlhe; le le bileng la dirafala mo motlheng wa ga Kelaudio. ₂₉Barutwa, mongwe le mongwe ka fa nonofong ya gagwe, ba ikaelela gore go isiwe thuso kwa bakaulengweng ba ba agileng kwa Jutea; ₃₀mo ba bileng ba go dira, ba e isa kwa bagolwaneng ka diatla tsa ga Barenabase le Saule.