DITIRO 13

₁Jaana ga bo go le baperofeti le baruti mo Antioke, mo phuthegong ya teng, e bong Barenabase, le Simone yo o bidiwang Nigere, le Lukio wa Kurene, le Manaene yo o otletsweng gongwe le Herote wa kgosana, le Saule. ₂E ne ya re ba ntse ba direla Morena, mme ba ikitsa go ja, Mowa o o Boitshepo wa re: “Ntomololelang Barenabase le Saule, gore ba ye tirong e ke e ba bileditseng.”

₃Foo e rile ba sena go dira go ithiba mo dijong, le go rapela, le go ba baya diatla, ba ba naya tsela.

₄Jalo bone, ka ba bolodiwa ke Mowa o o Boitshepo, ba fologela kwa Seleukia; mme ba tswa teng ba ya kwa Kupero ka sekepe. ₅Ya re ba le kwa Salamise, ba bolela lefoko la Modimo mo matlong a thuto a Bajuta. Ba bo ba bile ba patilwe ke Johane, e le mothusi.

₆E rile ba sena go ralala setlhake sotlhe ba se wetsa, ba fitlha mo Pafose, mme ba fitlhela moloi mongwe teng, moperofeti wa tsietso, a le Mojuta, a bidiwa Bare-Jesu. ₇Yo o ne a ntse le molaodisiwa Seregio Paulo, yo e leng motho wa tlhaloganyo. Mme yoo a bitsa Barenabase le Saule, mme a eletsa go utlwa lefoko la Modimo. ₈Elemase wa moloi – gonne leina la gagwe le kaya jalo fa le phuthololwa – a ganela nabo, a leka go faposa molaodisiwa mo tumelong. ₉Mme Saule, yo o bileng a bidiwa Paulo, a tletse Mowa o o Boitshepo, a tsepega matlho mo go ene, a re: ₁₀“Wena yo o tletseng boferefere jotlhe, le bolotsana jotlhe, wena ngwana wa diabolo, mmaba wa tshiamo yotlhe, a ga o nka a bakela go sokamisa ditsela tse di siameng tsa Morena? ₁₁Jaana bona, seatla sa Morena se mo go wena, o tlaa foufala, o sa bone letsatsi ka lobaka.” Mme ka bonako ga wela mo go ene looto le lefifi; mme a nna a dikologadikologa, a batla mongwe yo o ka mo gogang ka letsogo. ₁₂Foo, e rile molaodisiwa a bona se se dirilweng, a dumela, a gakgamaditswe ke thuto ya Morena.

₁₃Paulo le lesomo la gagwe ba tloga mo Pafose ka sekepe, ba fitlha mo Perega wa Pamfilia; Johane a kgaogana nabo a boela Jerusalema. ₁₄Bone ba ralala Perega, ba ya go fitlha mo Antioke wa Pisidia; ba tsena mo ntlong ya thuto ka letsatsi la Sabata, mme ba dula. ₁₅E rile go sena go balwa molao le baperofeti, balaodi ba ntlo ya thuto ba roma kwa go bone, ba re: “Bakaulengwe, e re fa lo tshotse lefoko lengwe la go laya batho, a ko lo le bueng fela.” ₁₆Paulo a ema, a ba gwetlha ka seatla, a re: “Banna ba Iseraele, le lona ba lo boifang Modimo, reetsang. ₁₇Modimo wa batho ba Baiseraele, o itshenketse borraetsho, wa godisa batho jale ka ba agile mo lefatsheng la Egepeto, wa ba goga, wa ba ntsha teng ka letsogo le le tsholetsegileng. ₁₈Wa iphapaanya le mekgwa ya bone mo nageng, e ka ne e le ka lobaka lwa dinyaga di le 40. ₁₉E rile o sena go senya merafe e supa mo lefatsheng le Kanana, wa ba naya lefatshe la one go nna boswa, e ka ne e le ka lobaka lwa dinyaga di le 450. ₂₀Morago ga dilo tse wa ba naya baatlhodi, go tla go fitlha mo lobakeng, lwa ga Samuele moperofeti. ₂₁Kwa morago ba lopa kgosi; mme Modimo wa ba naya Saule morwa Kiše, monna wa lotso lwa Benjamine, ka lobaka lwa dinyaga di le 40. ₂₂E rile o sena go mo tlosa, wa emisa Dafite, gore a nne kgosi ya bone; mme wa supa ka ga gagwe, wa re: ‘Ke bonye Dafite morwa Jese, monna yo o ka fa pelong ya me, yo o tla dirang go rata ga me gotlhe fela.’ ₂₃Modimo o lereditse Iseraele Mmoloki; e bong Jesu, a le losika lwa monna yo, ka fa lefokong la tsholofetso; ₂₄jale jaaka Johane a sena go rera kolobetso ya boikwatlhao mo bathong botlhe ba Iseraele, a ise a tle. ₂₅E ne ya re Johane a wetsa tiro ya gagwe, a re: ‘Ana lo a bo lo gopola go re, nna ke eng? Ga ke ene. Mme bonang, go tla mongwe morago ga me, yo ditlhako tsa gagwe ke sa tshwanelang go di hunolola.’

₂₆“Bakaulengwe, bana ba losika lwa ga Aberahame, le ba ba boifang Modimo mo go lona, lefoko la poloko e, le tliseditswe rona. ₂₇Gonne ba ba agileng mo Jerusalema, le balaodi ba bone, e re ka ba sa itse ene le fa e le mantswe a baperofeti a a balwang ka Sabata mongwe le mongwe, ba a dirafaditse ka go mo sekisa. ₂₈Mme le fa ba se ka ba fitlhela mo go ene molato ope o o tshwanetseng go o bolaelwa, le fa go ntse jalo ba lopa Pilato gore a bolawe fela. ₂₉E rile ba sena go dirafatsa tsotlhe tse di kwadilweng ka ga gagwe, ba mo pagolola mo setlhareng, ba mmaya mo phupung. ₃₀Modimo wa mo tsosa mo baswing; ₃₁a bonwa ka malatsi a le mantsi ke ba ba duleng nae kwa Galilea, ba tla mo Jerusalema, ba e leng bone basupi ba gagwe mo bathong gompieno. ₃₂Re lo lereditse mafoko a a molemo a tsholofetso e e sa leng e solofetswa borara gale, ₃₃jaaka Modimo o dirafaditse one ao mo baneng ba rona, ka o tsositse Jesu; jaaka go bile go kwadilwe mo Pesalemeng ya bobedi, ga twe: ‘O morwaake, ke go tsetse gompieno.’ ₃₄Mme ka ga go tsosa Jesu mo baswing ga one, mo go se nang go tlhola a boela mo go boleng, o buile jaana wa re: ‘Ke tlaa lo naya masego a ga Dafite a a itshepileng le a a tlhomameng.’ ₃₅Gonne o bile o bua mo pesalemeng e nngwe wa re: ‘Ga o ketla o lesa Moitshepi wa gago a bona go bola.’ ₃₆Gonne Dafite, e rile a sena go direla kgakololo ya Modimo mo motlheng wa gagwe, a robala, a bewa le borraagwe, mme a bona go bola. ₃₇Ene yo Modimo o mo tsositseng, ga a a ka a bona go bola gope. ₃₈Ke gone a go itsiwe ke lona, bakaulengwe, fa lo bolelelwa boitshwarelo jwa dibe ka monna yo. ₃₉Mongwe le mongwe yo o dumelang, o siamisiwa ka ene ka ga dilo tsotlhe, tse lo ne lo sa ka ke lwa siamisiwa ka ga tsone ka molao wa ga Moše. ₄₀Ke gone lo itise, e se re kgotsa se se builweng mo baperofeting sa tla mo go lona, jaaka go twe: ₄₁‘Bonang, banyatsi ke lona, mme lo gakgamale, lo nyelele, gonne ke dira tiro mo motlheng wa lona, e le tiro e lo se ketlang lo e dumela gope, fa mongwe a e lo bolelela.’ ”

₄₂Ya re ba tswa, ba rapela gore mafoko ao a buiwe le ka Sabata o mongwe. ₄₃E rile ba ntlo ya thuto ba phatlalala, ba le bantsi ba Bajuta le ba ba ineetseng mo Sejuteng, ba ba rapelang Modimo, ba sala Paulo le Barenabase morago; mme bao ba bua nabo, ba ba sosueletsa thata gore ba nnele ruri mo tshegofatsong ya Modimo.

₄₄Mme ya re ka Sabata o mongwe, motse otlhe wa batla go phuthega, ba tla go utlwa lefoko la Modimo. ₄₅Mme ya re Bajuta ba bona matshutitshuti a batho, ba tlala lefufa, ba ganetsa dilo tse di builweng ke Paulo, ba tlhapatsa. ₄₆Paulo le Barenabase ba bua ka pelokgale ba re: “Go ne go tshwanetse fa lefoko la Modimo le ka bolelelwa lona pele. Mme e re ka lo le kgorometsa mo go lona, lo ikatlhola fa lo sa tshwanela botshelo jo bo sa khutleng, bonang, re sokologela kwa go Baditšhaba. ₄₇Gonne Morena o re laotse jalo a re: ‘Ke go beile lesedi la Baditšhaba, gore o nne poloka le kwa sekhutlong sa lefatshe.’ ”

₄₈Ya re Baditšhaba ba utlwa mo, ba itumela, ba galaletsa lefoko la Modimo; botlhe ba ba laoletsweng botshelo jo bo sa khutleng ba dumela.

₄₉Lefoko la Morena la anamisediwa mo lefatsheng lotlhe leo. ₅₀Bajuta ba tlhotlheletsa bahumagadi ba ba rapelang Modimo, le magosana a motse, mme ba tsosetsa Paulo le Barenabase pogiso, ba ba leleka mo melelwaneng ya bone. ₅₁Mme bone, ba ba tlhotlhorela lorole lo lo mo dinaong tsa bone, ba fetela kwa Ikonio. ₅₂Barutwa ba tlala boitumelo le Mowa o o Boitshepo.