Dikabelo tsa baperesiti le Balefi
1“Baperesiti, e bong Balefi, ke go re lotso lotlhe lwa ga Lefi, ga ba ketla ba bona kabelo epe le fa e le boswa le Iseraele; ba tlaa ja ditshupelo tsa ga Jehofa tse di dirwang ka molelo, le boswa jwa gagwe. 2Ga ba ketla ba bona boswa bope mo baneng ba ga rraabo; Jehofa ke ene boswa jwa bone, jaaka a buile nabo.
3“Se se tlaa nnang tshiamelo ya baperesiti go se tsaya mo bathong ke se, se tswa mo go ba ba isang tshupelo, kgotsa e le kgomo, kgotsa nku, a ba neye moperesiti letsogo le ditlhaa tsoo pedi, le mogodu. 4Mabutswapele a mabele a gago, le a bojalwa jwa gago jwa mofine, le a lookwane lwa gago, le bobowa jwa dinku tse di beolwang pele, dilo tse o di mo neye. 5Gonne Jehofa Modimo wa gago o mo itshenketse mo ditsong tsotlhe tsa gago, gore a eme a direle mo ineng la Jehofa, ene le bomorwawe ka bosakhutleng.
6“Fa Molefi mongwe a tswa kwa ntlheng nngwe ya gago mo go Baiseraele botlhe, kwa o jaketseng gone, a tla ka keletso yotlhe ya mowa wa gagwe mo felong fa Jehofa o tlaa go itshenkelang, 7foo a a direle mo ineng la ga Jehofa Modimo wa gagwe, jaaka bana botlhe ba ga rraagwe, e bong Balefi ba dira, ba ba emeng gone fa pele ga Jehofa. 8A ba bone dikabelo tse di tshwanang fela go di ja, kwa ntle ga se se tswang mo go rekisiweng ga boswa jwa gagwe.
Tlhagiso kgatlhanong le mekgwa ya seheitane
9“O re o sena go fitlha mo lefatsheng le Jehofa Modimo wa gago o le go nayang, o se ka wa ithuta go dira ka fa dilong tse di makgapha tsa merafe ele. 10Go se ka ga fitlhelwa mo go wena ope yo o ralatsang morwawe kgotsa morwadie molelo, le fa e le mongwe wa moitseanape, le fa e le mongwe yo o swabang ka eng le eng, le fa e le morai, kgotsa yo o loang, 11le fa e le mophekodi, kgotsa yo o buang le badimo, kgotsa ngaka ya bola, kgotsa y o botsang baswi. 12Gonne le fa e le mang yo o dirang dilo tse, o makgapha mo go Jehofa; Jehofa Modimo wa gago o e leleka fa pele ga gago ka ntlha ya tsone dilo tse di makgapha tse. 13Wena o nne boitekanelo o na le Jehofa, Modimo wa gago.
Tsholofetso ya go tla ga moperofeti yo mogolo
14“Gonne merafe e, e o tlaa e ruang, e reetsa ba ba swabang, le baitseanape, mme ka ga gago, Jehofa Modimo wa gago ga a go leseletsa go dira jalo. 15Jehofa Modimo wa gago o tlaa go tsosetsa moperofeti mo gare ga gago, wa bana ba ga rraeno, yo o tshwanang le nna; lo reetse ene; 16Jaaka tsotlhe tse o ne wa di eletsa mo go Jehofa Modimo wa gago kwa Horebe ka letsatsi la phuthego, wa re: ‘A ke se utlwe gape lentswe la ga Jehofa Modimo wa gago, le gone ke se tlhole ke bona molelo o mogolo o, gore ke se ka ka swa.’ 17Mme Jehofa a nthaya a re: ‘Ba buile sentle se ba se buileng. 18Ke tlaa ba tsosetsa moperofeti mo baneng ba ga rraabo, yo o tshwanang nao; ke tlaa tsenya mafoko a me mo molomong wa gagwe, mme o tlaa bua nabo tsotlhe tse ke tlaa di mo laolelang. 19Go tlaa dirala gore le fa e le mang yo o ganang go reetsa mafoko a me, a o tlaa a buang mo ineng la me, ke tlaa go lefetsa mo go ene. 20Moperofeti yo o tlaa italetsang go bua lefoko ka leina la me, le ke sa le mo laolelang go le bua, kgotsa yo o tlaa buang mo ineng la medimo e sele, moperofeti yoo a a swe.’
21“Fa o ithaya mo pelong ya gago o re: ‘Re tlaa itse jang lefoko le Jehofa o sa le buang?’ 22E re fa moperofeti a bua mo ineng la ga Jehofa, mme fa selo seo se sa tle, gongwe se sa dirale, ke sone selo se Jehofa o sa se buang; moperofeti yo o se buileng ka boitaletso, o se ka wa mmoifa.
