Tlhagiso ka go se obamele ditaolo
1“A ko o utlwe wena Iseraele; o na le go kgabaganya Joretane gompieno, o tsena o ya go rua merafe e megolo e e nonofileng bogolo go wena, metse e megolo le e e thekeleditsweng ka dithako tse di fitlhang marung. 2Lošaba lwa ba bakima ba ba godileng, bomorwa Baanake, ba o ba itseng, o utlwile ba bolelwa, go twe: ‘E mang yo o ka emang fa pele ga bomorwa Anake?’ 3Ke gone itse gompieno, gore Jehofa Modimo wa gago, ke ene yo o kgabaganyang fa pele ga gago jaaka molelo o o lailang; o tlaa ba senya, o tlaa ba diga fa pele ga gago; jalo o tlaa ba lelekela koo, o itse go ba nyeletsa ka bonako, jaaka Jehofa a buile nao.
4“E tlaa re Jehofa Modimo wa gago a sena go ba leleka fa pele ga gago, o se ka wa bua mo pelong ya gago, wa re: ‘Jehofa o nterile ka tla go rua lefatshe le, ka ntlha ya tshiamo ya me’; e tswa Jehofa o leleka merafe e fa pele ga gago ka ntlha ya boikepo jwa yone. 5Ga o tsene o ya go rua lefatshe la one ka ntlha ya tshiamo ya gago, kgotsa ka ntlha ya thokgamo ya pelo ya gago; mme Jehofa Modimo wa gago o leleka merafe e fa pele ga gago ka ntlha ya boikepo jwa yone, le gore a tlhomamise lefoko le Jehofa Modimo wa gago o le ikanetseng borraeno, Aberahame, le Isake le Jakobe. 6Ke gone itse fa Jehofa Modimo wa gago a sa go neye lefatshe le le molemo le, go le rua ka ntlha ya tshiamo ya gago; kaitse o tšhaba e e thamo e thata.
7“Gakologelwa, o se ka wa lebala, jaaka o ne wa gakatsa Jehofa mo nageng, go simolola ka letsatsi le o duleng ka lone mo lefatsheng la Egepeto, wa tsamaya wa fitlha mo felong fano, lo ntse lo tsuololela Jehofa fela. 8Le kwa Horebe lo no lwa gakatsa Jehofa, mme Jehofa a nna bogale le lona a rata go lo senya. 9E rile ke tlhatlogetse mo thabeng ke ya go amogela matlapa, e bong matlapa a kgolagano e Jehofa o ne a e dira le lona, foo ka nna mo thabeng malatsi a le 40 le masigo a le 40; ga ke a ka ka ja dijo le fa e le go nwa metsi. 10Jehofa a nneela matlapa a le mabedi a maje a kwadilwe ke monwana wa Modimo; mo go one ga bo go kwadilwe ka fa mafokong otlhe a Jehofa o ne a a bua le lona mo thabeng, a le mo gare ga molelo, ka letsatsi la phuthego. 11Ya re morago ga malatsi a a 40 le masigo a a 40 Jehofa a nneela matlapa a mabedi a maje, e bong matlapa a kgolagano.
12“Jehofa a nthaya a re: ‘Nanoga o fologe o tswe fano ka bonako; gonne batho ba gago ba o ba ntshitseng kwa Egepeto ba ipodisitse; ba akofile ba fapoga tsela e ke e ba laoletseng; ba itiretse setshwantsho se se thetsweng.’
13“Gape Jehofa a bua le nna a re: ‘Ke e bonye tšhaba e, ke fitlhela e le tšhaba e e thamo e thata. 14Ntesa, ke ba senye, le leina la bone ke le phimolele ruri fa tlase ga legodimo; mme ke tlaa dira ka wena morafe o o nonofileng, le o mogolo bogolo go bone.’
15“Jalo ka retolga ka fologa mo thabeng, thaba ya bo e tuka molelo; matlapa a mabedi a kgolagano ka bo ke a tshotse ka diatla tsa me tsoo pedi. 16Ka leba, ka fitlhela lo leofetse Jehofa Modimo wa lona; lo itiretse namane e e thetsweng; lo akofile lwa fapoga tsela e Jehofa o ne e lo laoletse. 17Ka tsaya matlapa a mabedi, ka a latlha mo diatleng tsa me tsoo pedi, ka a thubela fa pele ga matlho a lona. 18Ka wela fa pele ga Jehofa jaaka ga ntlha, ka malatsi a le 40 le masigo a le 40; ga ke a ka ka ja dijo le fa e le go nwa metsi; ka ntlha ya boleo jotlhe jwa lona jo lo ne lo bo leofile, ka go dira se se bosula mo ponong ya ga Jehofa, go mo gakatsa. 19Gonne ke ne ke boifa bogale le boitumologo jo bo tukang jo Jehofa o ne a lo galefetse ka jone, a ba a tla a rata go lo senya. Mme Jehofa a ntheetsa le ka lone lobaka loo. 20Jehofa o ne a le bogale thata le Arone go rata go mo senya; mme ka rapelela le ene Arone ka lone lobaka loo. 21Ka tsaya boleo ba lona, namane e lo ne lo e dirile, ka e fisa ka molelo ka e thuga, ka e sila bosesane thata ya ba ya nna jaaka lorole lo losesane; ka latlhela lorole lwa yone mo nokaneng e e elang e tswa mo thabeng.
22“Le kwa Tabera, le kwa Masa, le kwa Kiberothe-taafa, lo no lwa gakatsa Jehofa. 23Le gone e rile Jehofa a lo roma lo tswa Kateše-barenea, a re: ‘Tlhatlogang lo ye go rua lefatshe le ke le lo neileng’; foo lwa tsuololela taolo ya ga Jehofa Modimo wa lona, lwa se ka lwa mo dumela le fa e le go reetsa lentswe la gagwe. 24E sa le ka letsatsi le ke lo itsileng ka lone, loa bo lo ntse lo tsuololela Jehofa fela.
25“Jalo ka wela fa pele ga Jehofa ka malatsi ao a a 40 le masigo a a 40 a ke wetseng fa fatshe ka one; gonne Jehofa o na a rile o tlaa lo senya. 26Ka rapela Jehofa, ka re: ‘Ao! Jehofa Modimo, o se ka wa senya tšhaba ya gago le boswa jwa gago, ba o ba rekolotseng ka bogolo jwa gago, ba o ba ntshitseng kwa Egepeto ka letsogo le le nonofileng. 27Gakologelwa batlhanka ba gago, Aberahame, le Isake le Jakobe; o se ka wa leba bokaka jwa batho ba, le fa e le boikepo jwa bone, le fa e le boleo jwa bone. 28Lefatshe le o re ntshitseng kwa go lone le ka tla la re: Jehofa o ba ntsheditse go tla a ba bolaela mo nageng, ka gonne o na a sa nonofa go ba isa mo lefatsheng le o ne a le ba tlhomamiseditse, le ka gonne o na a ba ila. 29Le fa go ntse jalo, ke tšhaba ya gago, le boswa jwa gago, ba o ba ntshitseng ka thata e kgolo ya gago le ka letsogo la gago le le otlologileng.’
