Petso ya tsie
1Jehofa a raya Moše a re: “Tsena kwa go Faro, gonne ke thatafaditse pelo ya gagwe le pelo tsa batlhanka ba gagwe gore ke tle ke bonatse ditshupo tse tsa me mo gare ga bone, 2le gore wena o tle o bolele mo ditsebeng tsa ga morwao, le tsa ga morwa morwao dilo tse ke di diretseng Egepeto, le ditshupo tsa me tse ke di dirileng mo gare ga bone, gore lo itse fa ke le Jehofa.”
3Moše le Arone ba tsena kwa go Faro ba mo raya ba re: “Jehofa o bua jaana, e bong Modimo wa Bahebere a re: ‘O tlaa gana ka boleele bo le kae go ikisa kwa tlase fa pele ga me? Lesa batho ba me ba tsamaye gore ba ntirele. 4Fa go ntse jalo, fa o gana go lesa batho ba me ba tsamaya, bona, ke tlaa re ka moso ke lere tsie mo lefatsheng la gago. 5E tlaa khurumetsa sefatlhogo sa lefatshe, motho a ba a tle a retelelwe ke go bona lefatshe: e tlaa ja se se setseng sa mo go falotseng, se se lo saletseng mo sefakong, e tlaa ja ditlhare tsotlhe tse di lo golelang mo nageng. 6E tlaa tlala mo matlong a gago le mo matlong a batlhanka botlhe ba gago, le mo matlong a Baegepeto botlhe; jaaka go ise go ko go bonwe ke borraago le fa e le ke borraagomogolo, go simologa ka motlha o ba ne ba le mo lefatsheng ka one le go tla mo motlheng wa gompieno.’ ” Mme a retologa, a tswa mo go Faro.
7Batlhanka ba ga Faro ba mo raya ba re: “Ao! Ana motho yo o tlaa nna seru mo go rona ka boleele bo le kae? Lesa batho ba tsamaye gore ba direle Jehofa Modimo wa bone; a o a bo o ise o itse fa lefatshe la Egepeto le senyegile?”
8Moše le Arone ba isiwa gape kwa go Faro; mme a ba raya a re: “Yang ga direla Jehofa Modimo wa lona; ba ba tlaa tsamayang e tlaa bo e le bomang?”
9Moše a re: “Re tlaa tsamaya re na le banyana ba rona, le batsofe ba rona, le bana ba rona ba basimane, le bana ba rona ba basetsana, le matsomane a rona, le matlhape a rona, re tlaa tsamaya nao fela; gonne re na le go direla Jehofa modiro.”
10A ba raya a re: “A bo Jehofa a ka nna le lona jalo, fa ke ka lo lesa lwa tsamaya le banyana ba lona! Lo bo lo ipone; gonne bosula bo fa pele ga lona. 11E seng jalo, a go tsamaye lona ba lo leng banna, lo direle Jehofa; gonne ke sone se lo se eleditseng.” Mme ba lelekwa ba ntshiwa fa pele ga Faro. 12Jehofa a raya Moše a re: “Otlololela lefatshe la Egepeto letsogo la gago gore tsie e tle, gore e tlhatlogele mo lefatsheng la Egepeto, e je merogo yotlhe ya lefatshe, e bong gotlhe mo go siilweng ke sefako.” 13Moše a otlololela lefatshe la Egepeto thobane ya gagwe, mme Jehofa a tsosetsa lefatshe phefo ya botlhabatsatsi ka letsatsi leo lotlhe le bosigo jotlhe; e rile bosigo bo o sa phefo ya botlhabatsatsi ya fitlhisa tsie. 14Tsie ya tlhatloga le lefatshe lotlhe la Egepeto ya ririana mo ntlheng tsotlhe tsa Egepeto; e ne e le poitshego e kgolo thata; pele ga tsone go ne go ise go ko go nne tsie epe e e ntseng jaaka eo, le morago ga go nka go nna epe e e ntseng jalo. 15Gonne ya khurumetsa sefatlhogo sa lefatshe lotlhe fela, lefatshe la ba la fifala; ya a ja merogo yotlhe ya lefatshe, le loungo lwa ditlhare lo sefako se lo siileng; ga se ka ga sala sepe se setala mo nageng, le fa e le setlhare, le fa e le morogo mo lefatsheng lotlhe la Egepeto.
16Foo Faro a bitsa Moše le Arone ka potlako; a re: “Ke leofetse Jehofa Modimo wa lona, le lona. 17Jaana ke a lo rapela ka re, a ko lo itshwarele boleo jwa me ka motlha ono osi fela, lo rapele Jehofa Modimo wa lona gore a ntlosetse loso lo, lo le losi fela.” 18Mme a tswa mo go Faro, a rapela Jehofa. 19Jehofa a sokolola phefo e kgolo thata ya tswa bophirimatsatsi, ya tsaya tsie ya e kgarameletsa mo Lewatleng le Lehibidu; ga se ka ga sala tsie epe mo molelwaneng otlhe wa lefatshe la Egepeto. 20Jehofa a thatafatsa pelo ya ga Faro, a se ka a lesa bana ba Iseraele ba tsamaya.
Petso ya lefifi
21Jehofa a raya Moše a re: “Otlololela letsogo la gago legodimong gore go nne lefifi mo lefatsheng la Egepeto, e nne lefifi le le ka apaapiwang.” 22Moše a otlololela letsogo la gagwe legodimong; mme ga nna lefifi le le kwenneng mo lefatsheng lotlhe la Egepeto ka malatsi a le mararo; 23batho ga ba a ka ba bonana, ga go a ka ga dira le ope yo o tlogang fa o gone ka malatsi a le mararo; bana ba Iseraele bone botlhe ba bo ba na le lesedi mo maagong a bone.
24Faro a tlhaeletsa Moše a re: “Tsamayang lona lo ye go direla Jehofa, a go kganelwe matsomane le matlhape a lona, ke gone gotlhe; a banyana ba lona le bone ba tsamaye le lona.”
25Moše a re: “Le wena o na le go re naya ditlhabelo le ditshupelo tse di fisiwang gore re isetse Jehofa Modimo wa rona tlhabelo. 26Dikgomo tsa rona le tsone re tlaa ya natso; ga go ketla go tlogelwa le fa e le tlhako ya tsone; gonne re tlaa bo re na le go tlhaola mo go tsone go direla Jehofa Modimo wa rona; ga re itse gore re tlaa direla Jehofa ka eng re ise re fitlhe gone.”
27Jehofa a thatafatsa pelo ya ga Faro, a gana go ba lesa ba tsamaya. 28Faro a mo raya a re: “Tloga fa go nna; o itise; o se ka wa tlhola o leba sefatlhogo sa me; gonne motlhang o bonang sefatlhgo sa me o tlaa swa.”
29Moše a re: “O buile sentle; ga nketla ke ba ke tlhola ke bona sefatlhogo sa gago.”
