EKESODO 20

₁Modimo wa bua mafoko a otlhe, wa re: ₂“Ke nna Jehofa Modimo wa gago, yo ke go ntshitseng mo lefatsheng la Egepeto, mo ntlong ya botlhanka.

₃“O se ka wa nna le medimo epe e sele fa e se nna.

₄“O se ka wa itirela setshwantsho sepe se se setilweng, le fa e le setshwano sa sebopego sepe se se kwa legodimong kwa godimo, le fa e le sa se se mo lefatsheng kwa tlase, le fa e le sa se se mo metsing a a kwa tlase ga lefatshe. ₅O se ka wa di ikobela le fa e le go di direla; gonne Nna, Jehofa Modimo wa gago, ke Modimo o o lefufa, yo ke beletsang bana tshiamololo ya borraabo, go ya kokomaneng ya boraro le ya bone ya ba ba nkilang; ₆mme ba makgolokgolo ba bone ba ba nthatang, ba tshegetsa ditaolo tsa me, ke ba supetse boutlwelo botlhoko.

₇“O se ka wa umakela leina la ga Jehofa Modimo wa gago lefela; gonne ene yo o umakelang leina la gagwe lefela, Jehofa ga a ketla a mo kaya a se na molato.

₈“Gakologelwa letsatsi la Sabata go le itshepisa. ₉O dire o bo o swetse tiro yotlhe ya gago ka malatsi a le marataro; ₁₀mme letsatsi la bosupa ke Sabata wa ga Jehofa Modimo wa gago; o se ka wa dira tiro epe ka lone, wena, le fa e le morwao, le fa e le morwadio, le fa e le motlhanka wa gago, le fa e le lelata la gago, le fa e le dikgomo tsa gago, le fa e le moeng wa gago yo o mo teng ga dikgoro tsa gago. ₁₁Gonne Jehofa o dirile legodimo le lefatshe le lewatle le tsotlhe tse di mo go lone ka malatsi a le marataro, mme a ikhutsa ka letsatsi la bosupa; ke gone ka moo Jehofa o ne a segofatsa letsatsi la bosupa, a le itshepisa.

₁₂“Tlotla rraago le mmaago, gore malatsi a gago a nne maleele mo lefatsheng le Jehofa Modimo wa gago o le go nayang.

₁₃“O se ka wa bolaya motho.

₁₄“O se ka wa dira boaka.

₁₅“O se ka wa utswa.

₁₆“O se ka wa supa maaka ka ga mongwe ka wena.

₁₇“O se ka wa eletsa ntlo ya mongwe ka wena, o se ka wa eletsa mosadi wa mongwe ka wena, le fa e le motlhanka wa gagwe, le fa e le lelata la gagwe, le fa e le kgomo ya gagwe, le fa e le esela ya gagwe, le fa e le sepe se e leng sa mongwe ka wena.”

₁₈Batho botlhe ba bona ditumo tsa maru, le dikgadima, le lentswe la lonaka, le thaba e e kuang mosi; mme e rile batho ba go bona ba roroma, mme ba emela kgakala. ₁₉Ba raya Moše ba re: “A go bue wena le rona, re tlaa utlwa; a Modimo o se bue le rona, re ka tla ra a swa.”

₂₀Moše a raya batho a re: “Se boifeng; gonne Modimo o tsile go lo leka le gore poifiso ya one e nne fa pele ga lona, gore lo se leofe.” ₂₁Batho ba emela kgakala, mme Moše a atamela kwa lefifing le le kwenneng kwa Modimo o gone.

₂₂Jehofa a raya Moše a re: “Bua le bana ba Iseraele o re: ‘Lona ka losi lo bonye fa ke buile le lona ke le mo legodimong. ₂₃Lo se ka lwa dira medimo e sele lwa e pataganya le nna; medimo ya selefera le fa e le medimo ya gouta, lo se ka lwa e itirela. ₂₄Ntirela sebeso sa mmu, o ise mo go sone ditshupelo tsa gago tse di fisiwang, le ditshupelo tsa kagiso, dinku tsa gago, le dikgomo tsa gago. Gongwe le gongwe kwa ke tlaa go gopodisang leina la me gone, ke tlaa tla mo go wena gone, ke go segofatsa. ₂₅Fa o ntirela sebeso sa maje, o se ka wa se aga ka maje a a betlilweng; gonne fa o se ekela sedira sa gago, ke gore o se itshepolotse. ₂₆Le gone o se ka wa palamela kwa sebesong sa me ka direpodi, gore bosaikategang jwa gago bo se senolwe ke tsone.’ ”