Diaparo tsa baperesiti
1“O atametse Arone mogoloo le bomorwawe kwa go wena, o ba ntshe mo baneng ba Iseraele, gore a ntirele mo tirong ya boperesiti, e bong Arone, le Natabe, le Abihu, Eleasare, le Ithamare, bomorwa Arone. 2O direle Arone mogoloo diaparo tse di boitshepo, go nna kgalalelo le bontlhe. 3O bue le botlhe ba ba pelo e tlhalefileng, ba ke ba tladitseng mowa wa botlhale, gore ba direle Arone diaparo go mo itshepisa gore a ntirele mo tirong ya boperesiti. 4Tse ke tsone diaparo tse ba tlaa di dirang; e bong letlatla la sehuba, le sekhutlana, le kobo e telele, le hempe e dirilweng mebala e e tshekaganyeng, sefapatlhogo, le moitlamo; mme ba direle Arone mogoloo, le bomorwawe, diaparo tse di boitshepo, gore a ntirele mo tirong ya boperesiti.
5“Ba tseye gouta le bobududu, le bohibidu jo bo mokgona, le bohibidu jo bo letlhololo, le letsela le le boleta la leloba, 6a ba dire sekhutlana ka gouta, le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta, le le otlhilweng bosesane, mo go tsetsennwang ke setswerere. 7Sekhutlana a se dire le dibata di le pedi tsa marudi, di kopanngwe le dintlha tsa sone tsoo pedi; gore se nne mmogo. 8Le moitlamo o o logilweng ka matsetseleko, o o mo go sone sekhutlana, go tla se ikgatlhwa ka one, o nne tshwano nngwe fela ya tiro ya sone, e be e nne sebata sengwe fela naso; e nne wa gouta, le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta, le le otlhilweng bosesane. 9O tseye majana a le mabedi a šohama, o kwale maina a bana ba Iseraele mo go one; 10maina a bone a le marataro a nne mo lentswaneng lengwe, le maina a ba barataro ba ba setseng mo lentswaneng le lengwe, ka fa go tsalweng ga bone. 11O gabe majana a mabedi jaaka go tle go gajwe lentswana la sekanela, e le ka tiro ya mogabi wa lentswe, ka fa maineng a bana ba Iseraele, o a direle go tla a tsenngwa mo dingapareding tse gouta. 12O beye majana a mabedi ao mo dibateng tsa marudi a sekhutlana, go nna majana a segopodiso mo baneng ba Iseraele; mme Arone a ye a tshotse maina a bone fa pele ga Jehofa, a a beile mo maruding a gagwe a mabedi, go nna segopodiso. 13O dire dingaparedi tsa gouta; 14le bompolokwane ba le babedi ba gouta e e sa pekwang; o ba dire jaaka megala, e le tiro ya tshopho; o beye bompolokwane ba ba tshophilweng mo dingapareding.
Letsela la sehuba
15“O dire letlatla la sehuba la katlholo, e le tiro ya motsetseneki; o le dire le tshwane le tiro ya sekhutlana; o le dire ka gouta, le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta le otlhilwe bosesane. 16Le nne dintlha tse di lekalekanang tsoo nne, mme le patagane sebedi; boleele jwa lone bo nne kana ka paralatso ya menwana, le boatlhamo jwa lone bo nne kana ka paralatso ya menwana. 17O tsenye mo go lone majana mo dikhuparelong, a nne ditsela di le nne; tsela ya ntlha e nne majana a saradio, le topase, le karabanekela; 18tsela ya bobedi e nne majana a emeraleta, le safira, le taemane; 19tsela ya boraro e nne majana a jasinthe, le agate le amethuseta; 20tsela ya bone e nne majana a berula, le šohama, le jasepere. A tsenngwe mo dikhuparelong tsa one tsa gouta. 21Majana ao a nne jaaka maina a bana ba Iseraele, a le 12, ka fa maineng a bone; a nne jaaka mogabo wa lentswana la sekanela, mongwe le mongwe ka fa leineng la gagwe, e nne a ditso tse 12. 22O dire bompolokwane mo letlatleng la sehuba, ba nne jaaka megala, tiro ya tshopho ya gouta e e sa pekwang. 23Mo letlatleng la sehuba o dire melepo e le mebedi ya gouta, mme o tsenye melepo eo mo dintlheng tse pedi tsa letlatla la sehuba. 24Bompolokwane ba babedi ba ba tshophilweng ba gouta, o ba gokelele mo melepong e e mo dintlheng tsa letlatla la sehuba. 25Dintlha tse dingwe tse pedi tsa bompolokwane ba ba tshophilweng o di beye mo dingapareding tse pedi, mme o di beye mo dibateng tsa marudi a sekhutlana ka fa pele ga sone. 26O dire melepo e le mebedi ya gouta, o e beye mo dintlheng tse pedi tsa letlatla la sehuba, fela fa losing lwa yone lo lo lebileng kwa sekhutlaneng ka fa teng. 27O dire melepo e le mebedi ya gouta, o e beye mo dibateng tse pedi tsa marudi a letlatla, ka fa pele fa tlase, gaufi le makopanelo a yone, fa godimo ga moitlamo wa letlatla o o logilweng ka matsetseleko. 28Letlatla la sehuba ba le gokele ka melepo ya lone mo sekhutlaneng, e bong mo melepong ya sone ka mogala wa bobududu, gore o nne mo moitlamong wa sekhutlana o o logilweng ka matsetseleko, le gore letlatla la sehuba le se ka la hunologa mo sekhutlaneng.
29“Arone o tlaa re a tsena kwa teng, a ya mo felong ga boitshepo, a ye a tshotse maina a bana ba Iseraele a le mo letlatleng la sehuba, la katlholo, fa pelong ya gagwe, gore e nne segopodiso fa pele ga Jehofa ka gale le ka gale. 30Mo letlatleng la sehuba, la katlholo, o tsenye Urime le Thumime; mme dilo tseo di nne fa pelong ya ga Arone, fa a tsena a ya go ema fa pele ga Jehofa; Arone o tlaa ya a tshotse katlholo ya bana ba Iseraele fa pelong ya gagwe fa pele ga Jehofa ka metlha yotlhe.
Diaparo tse dingwe tsa baperesiti
31“Kobo e telele ya sekhutlana, o e dire yotlhe fela ka bobududu. 32E dire le letshofa la tlhogo mo gare ga yone; letshofa a le beelelwe mo tikologong ya yone, ka peelela e e logilweng, go etsa letshofa la moitshomelo wa motlhabani, gore e tle e se ka ya gagoga. 33Ditsetla tsa yone o di gabole ka digaranata tsa bobududu, le tsa bohibidu jo bo mokgona, le tsa bohibidu jo bo lethololo mo tikologong ya ditsetla tsa yone; o bo o beye ditsidima tsa gouta fa gare ga yone mo tikologong. 34Setsidima sa gouta se nne le garanata, setsidima sa gouta se nne le garanata, mo ditshetleng, tikologong ya kobo. 35Go tlaa aparwa ke Arone fa a ya go direla; mme go tsidimana ga tsone go tlaa utlwala fa a tsena mo felong ga boitshepo fa pele ga Jehofa, le a tswa, gore a tle a se ka a swa.
36“O dire sematla sa gouta e e sa pekwang, o gabe mo go sone jaaka megabo ya sekanela o re: ‘BOITSHEPELO JEHOFA.’ 37O se tsenye mogala wa bobududu, se nne mo sefapatlhogong; se nne mo sefapeng sa tlhogo fa phatleng. 38Se nne fa phatleng ya ga Arone, mme Arone a rwale tshiamololo ya dilo tse di itshepileng, tse bana ba Iseraele ba tlaa di itshepisang mo dineong tsotlhe tsa bone tse di itshepileng; se nne fa phatleng ya gagwe ka metlha yotlhe, gore di amogelwe fa pele ga Jehofa.
39“O loge hempe ka mebala e e tshekaganyeng ka letsela la leloba le le boleta; mme o dire sefapatlhogo ka letsela la leloba le le boleta, o bo o dire moitlamo, e le tiro ya motsantsabetsi.
40“O direle bomorwa Arone bohempe; o ba direle meitlamo, o ba direle ditlhoro, go nna kgalalelo le bontle mo go bone. 41Dilo tse o di apese Arone, mogoloo, le bomorwawe; o ba tlotse, o ba tshwaele Modimo, o ba itshepise, gore ba ntirele mo tirong ya boperesiti. 42O ba direle ditswalo tse di diputlela ka letsela la leloba, go bipa nama ya bone e e sa ikategang; ditswalo tseo tse di diputlela, o di ba tswese go tloga mo lothekeng go ya mo diropeng; 43di nne mo go Arone le mo go bomorwawe, fa ba tsena mo mogopeng wa bophuthegelo, kgotsa fa ba atamela sebeso ba ya go direla mo felong ga boitshepo; gore ba se ka ba rwala tshiamololo ba tloga ba a swa: e nne molao ka bosakhutleng, mo go ene, le mo losikeng lwa gagwe morago ga gagwe.
