EKESODO 36

₁“Besalele le Oholiabe a ba dire, le motho mongwe le mongwe yo o pelo e tlhalefileng, yo Jehofa o mo neileng botlhale le tlhaloganyo go itse go dira tiro yotlhe ya tirelo ya felo ga boitshepo, jaaka tsotlhe tse Jehofa o di laotseng.”

₂Moše a bitsa Besalele le Oholiabe, le motho mongwe le mongwe yo o pelo e tlhalefileng, yo Jehofa o tsentseng botlhale mo pelong ya gagwe, e bong mongwe le mongwe yo pelo ya gagwe e mo tlhotlheleditseng go tla mo tirong go e dira; ₃ba amogela mo go Moše ditshupelo tsotlhe tse bana ba Iseraele ba di lereditseng tiro ya tirelo ya felo ga boitshepo, go e dira ka tsone. Ba fela ba mo leretse ditshupelo tsa peleego ka meso yotlhe. ₄Batho ba ba botlhale botlhe, ba ba dirang mo tirong ya felo ga boitshepo, ba tswa mongwe le mongwe mo tirong e o e dirang. ₅Ba bua le Moše ba re: “Batho ba lerile thata go fetisa selekanyo sa tiro e Jehofa o laotseng gore e dirwe.”

₆Moše a ntsha taolo, mme ba e utlwatsa mo bothibelelong jotlhe, ba re: “A go se nne ope monna le fa e le mosadi, yo o tlholang a baakanya tiro epe ya tshupelo ya felo ga boitshepo.” Jalo ba kganelwa mo go lereng ditshupelo. ₇Ka gonne dilwana tse ba di bonyeng di ne di lekanye tiro go e dira, di ba di sala.

₈Motho mongwe le mongwe mo go bone yo o pelo e tlhalefileng, yo o dirang, a dira motlaagana ka matsela a a lepeletseng a le some; e le a leloba le le boleta le le otlhilweng bosesane, le bobududu, le bohibidu jo bo mokgona, le bohibidu jo bo letlhololo, a a dira ditshwano tsa ditšheruba, e le tiro ya motsetseni. ₉Boleele jwa letsela lengwe le lengwe le le lepeletseng e le boleele jwa dimetara di le 12, boatlhamo jwa letsela lengwele lengwe e le dimetara di le pedi; matsela otlhe a nna selekanyo se le sengwe fela. ₁₀Matsela a le matlhano, a a gokaganya mmogo, le matsela a mangwe a matlhano, a a gokaganya mmogo. ₁₁A dira digwe tsa bobududu mo losing lwa letsela le lengwe, e bong fa le tshwaraganngwang gone; a dira jalo mo losing lwa letsela le le kwa thoko mo botlhanong jwa bobedi. ₁₂A dira digwe di le 50 mo letseleng le lengwe, le digwe di le 50 mo losing lwa letsela le le mo tshwaraganong ya bobedi; digwe di lebanye. ₁₃A dira dikgoge tsa gouta di le 50, a kgogetsanya matsela ka tsone; jalo motlaagana wa nna mmogo fela.

₁₄A dira matsela a a lepelelang ka maodi a dipodi go nna mogope o o emang motlaagana godimo; a dira matsela a le some le motso. ₁₅Boleele jwa letsela lengwe le lengwe e le jwa dimetara di le 13; boatlhamo jwa letsela lengwe le lengwe e nne dimetara di le pedi; matsela ao a a some le motso a bo a le selekanyo se le sengwe fela. ₁₆A kgogetsanya matsela a le matlhano ka osi, le matsela a le marataro ka osi. ₁₇A dira digwe di le 50 mo losing lwa letsela le le ka fa thoko ga diphatsa tse tlhano, le digwe di le 50 mo losing lwa letsela le le ka fa thoko ga diphatsa tse thataro. ₁₈A dira dikgoge di le 50 tsa kgotlho go gokaganya mogope ka tsone, gore o nne mmogo fela. ₁₉A dira sekhurumetso sa mogope ka matlalo a diphelefu a a tsentsweng mmala o mohibidu, a ba a dira sekhurumetso ka matlalo a manyebi, sa kwa godimo.

₂₀Dimati tsa motlaagana tse di emang di thokgame, a di dira ka mokala. ₂₁Boleele jwa lomati e le jwa dimetara di le nne, boatlhamo bo le disentimetara di le 66, jwa lomati longwe le longwe. ₂₂Lomati longwe le longwe lo ne lo na le malomelo a le mabedi a a kopanngwang mmogo; a dira jalo mo dimating tsa motlaagana. ₂₃A dira dimati tsa motlaagana; dimati di le 20 tsa lotlhakore lwa ka fa ntlheng ya borwa; ₂₄a direla dimati tse di 20 ditlhako tsa selefera di le 40; ditlhako di le pedi tsa lomati lo le longwe fa malomelong a lone oo mabedi, le ditlhako di le pedi tsa lomati lo longwe fa malomelong a lone oo mabedi. ₂₅Lotlhakore lwa bobedi lwa motlaagana, ka fa ntlheng ya botsheka, a lo direla dimati di le 20. ₂₆Le ditlhako tsa tsone tsa selefera tse di 40, ditlhako di le pedi fa tlase ga lomati longwe, le ditlhako di le pedi fa tlase ga lomati lo longwe. ₂₇Ka kwa morago ga motlaagana ntlheng ya bophirimatsatsi, a go direla dimati di le thataro. ₂₈Dikgono tsa motlaagana ka kwa morago a di direla dimati di le pedi. ₂₉Tsa bo di pataganye sebedi kwa tlase, mme tsa ya go fitlha kwa godimo mo molepong wa ntlha, di ntse di le mmogo; a di dira jalo tsoo pedi mo dikgonong tsoo pedi. ₃₀Go ne go le dimati di le 8, le ditlhako tsa tsone tsa selefera, ditlhako di le 16; ditlhako di le pedi fa tlase ga lomati longwe le longwe.

₃₁A dira merapalego ya mokala; e le metlhano ya dimati tsa lotlhakore lo longwe lwa motlaagana. ₃₂Le merapalego e le metlhano ya lotlhakore lo longwe lwa motlaagana, le merapalego e le metlhano ya dimati tsa motlaagana tsa ka kwa morago, ntlheng ya bophirimatsatsi. ₃₃Morapalego wa gare a o direla go ralala bogare jwa dimati go tswa ntlheng nngwe go ya kwa go e nngwe. ₃₄Dimati a di manega gouta le melepo ya tsone a e dira ka gouta, go nna masomelo a merapalego, le merapalego a e manega gouta.

₃₅Sesiro a se dira ka bobududu, le bohibidu jo bo mokgona, le bohibidu jo bo letlhololo, le letsela la leloba le le boleta le le otlhilweng bosesane; a se dira ditshwano tsa ditšheruba e le tiro ya motsetseni. ₃₆A se direla maotwana a le mane a mokala, a a manega gouta; dikgoge tsa one e ne e le tsa gouta; mme a a tshelela ditlhako di le nne ka selefera. ₃₇A direla mojako wa mogope sebipo sa bobududu, le bohibidu jo bo mokgona, le bohibidu jo bo letlhololo, le leloba le le boleta le le otlhilweng bosesane, e le tiro ya motsantsabetsi. ₃₈Le maotwana a le matlhano a sone le dikgoge tsa one; ditlhogwana tsa one le dipalelo tsa one a di manega gouta; ditlhako tsa one tsoo tlhano e le tsa kgotlho.