EKESODO 39

₁Ka bobududu, le bohibidu jo bo mokgona, le bohibidu jo bo letlhololo, ba dira diaparo tse di dirilweng ka botswerere, tsa go direla mo felong ga boitshepo, ba direla Arone diaparo tse di itshepileng; jaaka Jehofa a laotse Moše.

₂A dira sekhutlana ka gouta le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta le le otlhilweng bosesane. ₃Ba papetla gouta ba e tlhofofatsa ya nna lotsatsa, ba e sega ditlhale go e loganya le bobududu, le bohibidu jo bo mokgona, le bohibidu jo bo letlhololo, le leloba le le boleta le le otlhilweng bosesane, e le tiro ya motsetseneki. ₄Ba direla sekhutla dibata tsa marudi tse di kopanngwang ka dintshi tsoo pedi. ₅Le moitlamo o o logilweng ka botswerere, o o ne o le mo go sone, go tla se gatlhwa ka one; o le tiro nngwe fela naso, o tshwana naso mo go dirweng; o le wa gouta, le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta, le le otlhilweng bosesane, jaaka Jehofa a laotse Moše. ₆Ba baakanya majana a šohama a a tsenngwang mo dingapareding tsa gouta, a gabilwe dikwalo tsa sekanela ka fa maineng a bana ba Iseraele. ₇Ba a baya mo dibateng tsa marudi a sekhutla, gore a nne majana a segopodiso mo baneng ba Iseraele; jaaka Jehofa a laotse Moše.

₈A dira letlatla la sehuba, e le tiro ya motsetseni, e tshwana le tiro ya sekhutla, e le ya gouta, le bobududu, le bohibidu jo bo mokgona, le bohibidu jo bo letlhololo, le letsela la leloba le le boleta le le otlhilweng bosesane. ₉Le ne le lekalekanye fela dintlha tsoo nne; letlatla la sehuba ba le dira le tlhatlaganye sebedi, le le boleele jwa disentimetara di le 22, boatlhamo e le selekanyo sa disentimetara di le 22, le tlhatlaganye sebedi. ₁₀Ba tlhoma mo go lone ditsela di le nne tsa majana; tsela ya ntlha e le majana a saradio le topase le karabunekela. ₁₁Tsela ya bobedi e le emeraleta le safira le teemane. ₁₂Tsela ya boraro e le jasinthe le agate le amethesete. ₁₃Tsela ya bone e le berula le šohama le jasapere; mo go beweng ga one a ne a ngapareditswe mo dingapareding tsa gouta. ₁₄Majana a ne a eme jaaka maina a bana ba Iseraele a le 12, jaaka maina a bone; jaaka digajo tsa sekanela, mongwe le mongwe jaaka leina la gagwe, a emela ditso tse 12. ₁₅Mo letlatleng la sehuba ba dira bompolokwane ba ba tshwanang le megala, e le tiro e e tshophilweng ya gouta e e sa pekwang. ₁₆Ba dira dingaparile di le pedi tsa gouta, le melepo e le mebedi ya gouta, ba baya melepo e mebedi fa dintlheng tse pedi tsa letlatla la sehuba. ₁₇Ba tsenya bompolokwane ba babedi ba ba tshophilweng ba gouta mo melepong e mebedi e e fa dintlheng tsa letlatla la sehuba. ₁₈Dintlha tse dingwe tse pedi tsa bompolokwane ba babedi ba ba tshophilweng, ba di baya mo dingapareding tse pedi, ba di baya mo maruding a sekhutla, ka fa pele ga sone. ₁₉Ba dira melepo e le mebedi ya gouta, ba e baya mo dintlheng tse pedi tsa letlatla la sehuba, fela fa losing lwa lone, ke gore, fa ntlheng ya sekhutla ka fa teng. ₂₀Ba dira melepo e le mebedi ya gouta, ba e baya mo dibateng tsa marudi a sekhutla, fa tlase, ka fa pele ga sone, gaufi le makgogetsanyo a sone, fa godimo ga moitlamo wa sekhutla o o logilweng ka botswerere. ₂₁Letlatla la sehuba ba le bofela ka melepo ya lone mo melepong ya sekhutla, ka kgole ya bobududu, gore e nne moitlamo wa sekhutla, o o logilweng ka botswerere fa godimo, le gore, letlatla la sehuba le se ka la hunologa mo sekhutleng; jaaka Jehofa a laotse Moše.

₂₂A dira kobo e telele ya sekhutla ka letsela le le logilweng, e le bobududu yotlhe fela; ₂₃le letshoba la kobo mo gare ga yone, go etsa letshoba la maitshomelo a motlhabani, e na le peeledi mo tikologong ya lone, gore e se ka ya gagoga. ₂₄Mo ditshetleng tsa kobo eo, kwa tlase, ba dira digaranata tsa bobududu, le bohibidu jo bo mokgona, le bohibidu jo bo letlhololo, le leloba le le otlhilweng. ₂₅Ba dira ditsidima tsa gouta e e sa pekwang, ba tsenya ditsidima fa gare ga digaranata mo kobong kwa tlase mo ditshetleng tsa yone, di le fa gare ga digaranata; ₂₆ke gore, tsidima e na le garanata, tsidima e na le garanata, mo kobong kwa tlase mo ditshetleng tsa yone, e le kobo ya tirelo; jaaka Jehofa a laotse Moše.

₂₇Ba direla Arone le bomorwawe bohempe ba leloba le le boleta, ba letsela le le logilweng; ₂₈le sefapatlhogo sa leloba le le boleta, le ditlhoro tse dintle tsa leloba le le boleta, le ditswalo tse di diputlela tsa letsela la leloba le le boleta, le le otlhilweng bosesane. ₂₉Le moitlamo wa letsela la leloba le le boleta le le otlhilweng bosesane, le bobududu, le bohibidu jo bo mokgona, le bohibidu jo bo letlhololo, e le tiro ya motsantsabetsi jaaka Jehofa a laotse Moše. ₃₀Sematla sa serwalo se se itshepileng ba se dira ka gouta e e sa pekwang, ba kwala mo go sone sekwalo jaaka digajo tsa sekanela ba re: “BOITSHEPELO JEHOFA.” ₃₁Ba hunela mo go sone thapo ya bobududu go tla ba se gokelela mo sefapatlhogong kwa godimo; jaaka Jehofa a laotse Moše.

₃₂Tiro yotlhe ya motlaagana wa mogope wa bophuthegelo ya wediwa jalo; mme bana ba Iseraele ba dira jaaka tsotlhe tse Jehofa a di laoletseng Moše, ba dira fela jalo. ₃₃Ba lere motlaagana kwa go Moše, le mogope, le dilwana tsa one, le merapalego ya one, le maotwana a one, le ditlhako tsa one; ₃₄le sekhurumetso sa matlalo a diphelefu a a tsentsweng mmala o mohibidu, le sekhurumetso sa matlalo a manyebi, le sesiro sa sebipo; ₃₅letlole la tshupo, le disikaro tsa lone, le senno sa boutlwelo botlhoko; ₃₆lomati lwa bojelo le dilwana tsotlhe tsa lone, le senkgwe sa tshupo; ₃₇setlhomo se se sa pekwang sa dipone le dilampa tsa sone, e bong dilampa go rulaganngwa, le dilwana tsotlhe tsa sone, le lookwane la lesedi.

₃₈Le sebeso sa gouta, le lookwane lo lo tlolwang, le maswalo a a nkgang monate, le sebipo sa mojako wa mogope; ₃₉le sebeso sa kgotlho, le leiso la sone le le setlatla la kgotlho, le disikaro tsa sone, le dilwana tsotlhe tsa sone, mogopo o o tlhapelang le setlhomo sa one; ₄₀matsela a a lepeletseng a lolwapa le maotwana a one, le ditlhako tsa one, le sebipo sa kgoro ya lolwapa, le megala ya lone, le dimapo tsa lone, le dilo tsotlhe tsa tirelo ya motlaagana, e le tsa mogope wa bophuthegelo; ₄₁le diaparo tse di dirilweng sentlentle tsa go direla mo felong ga boitshepo, le diaparo tse di itshepileng tsa ga Arone moperesiti, le diaparo tsa bomorwawe tsa go direla mo tirong ya boperesiti. ₄₂Jaaka tsotlhe tse Jehofa o di laoletseng Moše, bana ba Iseraele ba dira tiro yotlhe fela jalo. ₄₃Moše a bona tiro yotlhe, mme bonang, ba bo ba e dirile; jaaka Jehofa a laotse, ba e dirile fela jalo; mme Moše a ba segofatsa.