Kotlhao ya Modimo mo go Etome
1Gape lefoko la ga Jehofa la tla mo go nna, la re: 2“Morwa motho, lebisa sefatlhogo sa gago kwa thabeng ya Seire, mme o perofese o e nyatse.
3“O e reye o re: Morena Modimo o bua jaana, a re:
“Bona, ke tlhabana nao,
Wena thaba ya Seire,
ke tlaa go otlololela seatla sa me,
ke tlaa go dira tshwafalo
le kgakgamatso.
4Ke tlaa ropefatsa metse ya gago,
mme o tlaa swafala;
mme o tlaa itse fa ke le Jehofa.
5“E re ka o ne o ntse o na le bobaba jo bo emeng fela, mme o tsentse bana ba Iseraele mo thateng ya tšhaka mo motlheng wa tatlhego ya bone, mo motlheng wa boikepo jwa bokhutlo; 6ke gone, jaaka ke tshedile,” go bua Morena Modimo, “ke tlaa go baakanyetsa go ya mading, madi a tlaa go konatelela; e re ka o se ka wa ila madi, ke gone madi a tlaa go konatelela. 7Jalo ke tlaa dira thaba ya Seire go nna kgakgamatso le tshwafalo; ke tlaa kgaola mo go yone ene yo o fetang ka teng, le ene yo o boang. 8Ke tlaa tlatsa dithaba tsa gagwe ka babolaiwi; mo makhubung a gago, le mo megogorong ya gago, le mo meeding yotlhe ya gago, ba ba bolailweng ka tšhaka ba tlaa wela teng. 9Ke tlaa go dira ditshwafalo tse di sa khutleng, le metse ya gago ga e ketla e nnwa; mme lo tlaa itse fa ke le Jehofa.
10“E re ka o rile: ‘Merafe e mebedi e, le mafatshe a mabedi a, a tlaa nna a me, mme re tlaa a rua;’ le mororo Jehofa a le teng; 11ke gone, jaaka ke tshedile,” go bua Morena Modimo, “ke tlaa dira ka fa bogaleng jwa gago, le ka fa bopelotshetlheng jwa gago jo o bo bonaditseng ka ntlha ya go ba ila ga gago; ke tlaa ikitsise mo go bone, mogang o ke go sekisang. 12O tlaa itse fa nna Jehofa ke utlwile ditlhapatso tsotlhe tsa gago tse o tlhapaditseng dithaba tsa Iseraele ka tsone, wa re: ‘Di swafaditswe, re di neetswe go di ja.’ 13Lo inkgodiseditse ka molomo, lo intsifaleditse mafoko a lona, ke go utlwile.”
14Morena Modimo o bua jaana, a re: “E tlaa re mogang lefatshe lotlhe le itumelang, wena ke go swafatse. 15Jaaka o kile wa jela boswa jwa ntlo ya Iseraele koma, ka bo ne bo swafetse, le nna ke tlaa go direla jalo; o tlaa swafala; wena thaba ya Seire, le lefatshe lotlhe la Etome e bong lotlhe fela; mme ba tlaa itse fa ke le Jehofa.
