Goge o a fenngwa
1“Wena, morwa motho, perofesa o nyatse Goge, o re: Morena Modimo o bua jaana, a re: Bona, ke tlhabana nao wena Goge, kgosana ya Rosa, le Mešeke, le Tubale. 2Ke tlaa go retolola, ke tlaa go gogela kwa pele, ke go tlhatlosa kwa dikhutlong tsa ntlha ya botsheka; ke tlaa go lere mo dithabeng tsa Iseraele. 3Ke tlaa phaila bora jwa gago mo seatleng sa gago sa molema, ke tlaa usa metswi ya gago mo seatleng sa gago se segolo. 4O tlaa wela mo dithabeng tsa Iseraele, wena le masomosomo a gago otlhe a sekamerwalo ya tsie, le ditšhaba tsotlhe tse o nang natso; ke tlaa go neela dinonyane tse di gagolang tsa mehuta yotlhe, le dibatana tsa naga go go suputsa. 5O tlaa wela mo nageng e e lobala fela; gonne ke buile, go bua Morena Modimo. 6Ke tlaa tsenya molelo mo Magoge, le mo go ba ba agileng ka thagamo mo ditlhakeng; mme ba tlaa itse fa ke le Jehofa.
7“Leina la me le le boitshepo ke tlaa le itsise mo gare ga batho ba me ba Iseraele; ga nketla ke tlhola ke leseletsa leina la me le le boitshepo go tlhapadiwa; mme merafe e tlaa itse fa ke le Jehofa Moitshepi mo Iseraele.
8“Bonang, go etla, mme go tlaa dirwa,” go bua Morena Modimo; “ke lone letsatsi le ke buileng ka ga lone. 9Ba ba agileng mo metseng ya Iseraele ba tlaa bolola, ba tlaa ora dibolao, ba tlaa di fisa, dithebe le dithejane, mara le metswi, le melamu, le marumo, ba tlaa di ora ka dinyaga di supa. 10Jalo ga ba ketla ba ya go rwalela dikgong kwa nageng, le fa e le go di rema mo dikgweng; gonne ba tlaa ora dibolao; mme ba tlaa thopa bone ba ba kileng ba ba thopa, ba thukhutha bone ba ba kileng ba ba thukhutha.” Go bua Morena Modimo.
Phitlho ya ga Goge
11“Go tlaa dirala mo motlheng oo, go re: Ke tlaa naya Goge felo ga phitlhelo mo Iseraele, mogogoro wa ba ba kgabaganyang ka fa ntlheng ya botlhabatsatsi ga lewatle; mme go tlaa kganela bone ba ba kgabaganyang; ba tlaa fitlha Goge teng, le bontsi jotlhe jwa gagwe; ba tlaa o raya leina ba re: Mogogoro wa Hamone-goge. 12Ba ntlo ya Iseraele ba tlaa nna ba ba fitlha ka dikgwedi di supa, gore ba tle ba tlhapise lefatshe. 13Ee, batho botlhe ba lefatshe ba tlaa ba fitlha; mme e tlaa nna tumedi mo go bone mo motlheng o ke tlaa galalediwang ka one, go bua Morena Modimo. 14Ba tlaa tlhaola banna ba ba tlaa nnang mo tirong e ka metlha yotlhe, ba tlaa farafara lefatshe ba fitlha ba ba raletseng, ba ba setseng fela fa godimo ga mmu wa lefatshe, gore ba le tlhapise; e tlaa re go fetile dikgwedi di supa ba tlaa fokotsa. 15Ba ba farafarang lefatshe ba tlaa ralala; mme e tlaa re fa mongwe fela a bona lesapo la motho, foo o tlaa tlhoma sesupo fa go lone, go tsamaye bafitlhi ba le fitlhe mo mogogorong wa Hamone-goge. 16E bile Hamone e tlaa nna leina la motse mongwe. Ba tlaa tlhapisa lefatshe jalo.
17“Wena, morwa motho,” Morena Modimo o bua jaana, a re: “Bua le dinonyane tsa mehuta yotlhe, le tse di tshedileng tsotlhe tsa naga, o re: Phuthegang, lo tle; lo ikokoanyetseng mo ntlheng tsotlhe lo phuthegele setlhabelo sa me, se ke se lo isetsang, e bong setlhabelo se segolo mo dithabeng tsa Iseraele, gore lo je nama lo nwe madi. 18Lo tlaa ja nama ya bathata, loo nwa madi a dikgosana tsa lefatshe, a diphelefu, le a dikwanyana, le a dipodi, le a dipholo, tsotlhe e le tse di nonneng tsa Bašane. 19Lo tlaa jela mahura lo kgora, lo nwela madi go tagwa, e le a setlhabelo sa me se ke se lo isetsang. 20Fa lomating lwa me lwa bojelo lo tlaa kgora dipitse, le dikara, le bathata, le batho botlhe ba ntwa, go bua Morena Modimo.
Iseraele o agiwa seša
21“Ke tlaa tlhoma kgalalelo ya me mo merafeng, merafe yotlhe e tlaa bona tshekiso ya me, e ke e dirafaditseng, le seatla sa me se ke se beileng mo go yone. 22Jalo ba ntlo ya Iseraele ba tlaa itse fa ke le Morena Modimo wa bone, go simolola ka tsatsi leo le go ya kwa pele. 23Merafe e tlaa itse fa ba ntlo ya Iseraele ba ne ba ile botshwarong ka ntlha ya boikepo jwa bone; ka ba ne ba ntlolela, mme ka ba itshubela sefatlhogo sa me; ka ba tsenya mo seatleng sa baba ba bone, mme ba wa botlhe ka tšhaka. 24Ka ba direla ka fa boitshekologong jwa bone, le ka fa ditlolong tsa bone; ka ba ka ba itshubela sefatlhogo sa me.
25“Ke gone ka moo Morena Modimo o bua jaana, a re: Jaanong ke tlaa busa botshwaro jwa ga Jakobe, ke tlaa utlwela ntlo yotlhe ya Iseraele botlhoko; mme ke tlaa fufagela leina la me le le boitshepo. 26Mme ba tlaa bo ba belege botlhabisa ditlhong jwa bone, le ditlolo tsotlhe tsa bone tse ba ntloletseng ka tsone, mogang ba agang ka thagamo mo lefatsheng la gabone, go se na ope yo o ba boifisang; 27mogang ke ba busitseng gape kwa ditšhabeng, ke ba phuthile kwa mafatsheng a baba ba bone, mme ke itshepisiwa mo go bone mo ponong ya merafe e le mentsi. 28Ba tlaa itse fa ke le Morena Modimo wa bone, ka go bo ke ne ka laola gore ba isiwe botshwarong mo merafeng, ke bile ke ba phuthetse mo lefatsheng la ga bone; ke bile ke se ketla ke tlhola ke tlogela ope wa bone teng; 29le gone ga nketla ke tlhola ke ba itshubela sefatlhogo sa me, gonne ke goromeditse mowa wa me mo go ba ntlo ya Iseraele, go bua Morena Modimo.”
