ESEKIELE 41

₁A nkisa kwa Tempeleng, a lekanya maotwana, boatlhamo bo le jwa mabogo a le marataro ntlheng nngwe, le mabogo a le marataro ntlheng e nngwe, e le jone boatlhamo jwa motlaagana. ₂Boatlhamo jwa botseno bo ne bo le mabogo a le some; ditlhakore tsa botseno di ne di le mabogo a le matlhano mo ntlheng nngwe le mabogo a le matlhano ntlheng e nngwe; mme a lekanya boleele jwa yone, mabogo a le 40, le boatlhamo mabogo a le 20.

₃Foo a tsenela kwa teng, a lekanya lekotwana lengwe le lengwe la botseno, mabogo a le mabedi; le botseno, mabogo a le marataro; le boatlhamo jwa botseno mabogo a supa. ₄A lekanya boleele jwa yone, mabogo a le 20, le boatlhamo mabogo a le 20, fa pele ga Tempele; mme a nthaya a re: “Fa ke felo ga boitshepo jo bo itshepileng.”

₅Foo a lekanya lomota lwa ntlo, mabogo a le marataro; le boatlhamo jwa ntlwana nngwe le nngwe ya ka fa ditlhakoreng, mabogo a le mane mo tikologong yotlhe ya ntlo. ₆Mantlwana a ka fa ditlhakoreng a ne a tlhatlaganye seraro, nngwe e tlhatlaganye le e nngwe, mme a na a tshwaraganye a le 30; a lomaganye le lomota lwa ntlo lo lo diretsweng matlwana a ka fa ditlhakoreng mo tikologong, gore di tle di lomagane le lona, mme di sa lomagane le lomota lo e leng lwa ntlo tota. ₇Matlwana a ka fa ditlhakoreng a ne a re a dikologa ntlo a nne a atlhame bogolo fa go iwa nao kwa godimo; gonne go dikologa ntlo ga nna ga tlhatlogela kwa godimo mo tikologong ya ntlo; ke gone ka moo boatlhamo jwa ntlo jwa nna jwa golela pele go ya kwa godimo; mme go palangwe go ntse jalo, go duwa mo ntlwaneng e e kwa tlase go iwe kwa go e e kwa godimo ka ntlwana e e fa gare. ₈Ka ba ka bona fa ntlo e na le serepodi se se tsholetsegileng mo tikologong; metheo ya matlwana a lotlhakore e ne e le selekanyo sa lotlhaka lo lo tletseng lwa mabogo a magolo a le marataro. ₉Bokima jwa lomota lo lo diretsweng matlwana a ka fa ditlhakoreng, ka fa ntle, e ne e le mabogo a le matlhano; mo go setseng e ne e le felo ga matlwana a ka fa ditlhakoreng a e leng a ntlo. ₁₀Fa gare ga mantlwana go ne go le sebaka se le katlhamo ya mabogo a le 20 mo tikologong yotlhe fela ya ntlo. ₁₁Mejako ya matlwana a ka fa ditlhakoreng e ne e lebile kwa felong fa go neng go setse, mojako o le mongwe fela o lebile kwa botsheka, o mongwe o lebile kwa borwa; boatlhamo jwa sebaka sa fa go neng go setse e le mabogo a le matlhano mo tikologong.

₁₂Kago e e neng e le fa pele ga felo fa go lomologileng ka fa lotlhakoreng lo lo lebileng kwa bophirimatsatsi e ne e le boatlhamo bo le mabogo a 70; mme lomota lwa kago lo no lo le bokima jwa mabogo a le matlhano mo tikologong, le boleele jwa lone bo ne bo le mabogo a 90.

₁₃Jalo a lekanya ntlo, boleele bo le mabogo a le lekgolo; le felo fa go lomologileng, le kago, e na le dimota tsa yone, boleele bo le mabogo a le lekgolo; ₁₄le gone boatlhamo jwa fa pele ga ntlo, le jwa felo fa go lomologileng mme go lebileng kwa botlhabatsatsi, bo ne bo le mabogo a le lekgolo.

₁₅A lekanya boleele jwa kago fa pele ga felo fa go lomologileng mo go leng kwa morago ga yone, le masepelo a yone a a lebileng kwa godimo mo ntlheng nngwe le mo go e nngwe, mabogo a le lekgolo; le Tempele ya kwa teng, le maribela a lolwapa; ₁₆direpudi, le dipone tse ditshesane, le masepelo a a godimo, mo tikologong mo go tlhatlaganyeng seraro ga one, bolebana le serepudi, tsa bo di khurumeditswe ka dimati kwa godimo, le go tswa fa fatshe go fitlha fa diponeng; mme jaana dipone di ne di khurumeditswe; ₁₇go fitlha mo sebakeng se se okameng mojako, e bong go fitlha kwa ntlong ya kwa teng le ka fa ntle, le fa lomoteng lotlhe mo tikologong ka fa teng le ka fa ntle ka selekanyo. ₁₈Go ne go kwalakwaditswe ditšheruba le makolane; mme go le mokolane fa gare ga tšheruba le tšheruba, mme tšheruba nngwe le nngwe e na le difatlhogo di le pedi; ₁₉ke go re, go ne go le sefatlhogo sa motho se lebile kwa mokolaneng ntlheng nngwe; le sefatlhogo sa ledumedi se lebile kwa mokolaneng ntlheng e nngwe; go ne go dirwa jalo ka ntlo yotlhe fela. ₂₀Go tswa fa fatshe go ya fa godimo ga mojako go ne go kwalakwaditswe ditšheruba le makolane; lomota lwa Tempele lo ne lo ntse jalo. ₂₁Ka ga tempele, mephakwana ya mojako e ne e dirilwe dintlha di le nne tse di lekalekanyeng fela; mme ka ga felo ga boitshepo ka fa pele, ponalo ya teng e ne e tshwana le ponalo ya Tempele.

₂₂Sebeso e ne e le sa logong, se le bogodimo jwa mabogo a le mararo, le boleele jwa sone bo le mabogo a le mabedi; le dinaka tsa sone, le boleele jwa sone, le ditlhakore tsa sone, e ne e le logong; mme a nthaya, a re: Ke lone lomati lwa bojelo lo lo fa pele ga Jehofa.

₂₃Tempele le felo ga boitshepo di ne di na le mejako e le mabedi. ₂₄Ditswalo di ne di na le mefama e e menaganang, mefama e le mebedi; mefama e le mebedi ya setswalo sengwe, le mefama e le mebedi ya setswalo se sengwe. ₂₅Ga bo go kwalakwaditswe mo go tsone, e bong mo ditswalong tsa Tempele ditšheruba le makolane, ga tshwana le mo go kwalakwaditsweng mo dimoteng; mme go le mesepuri e mekima ya logong fa pele ga maribela a kgoro ka fa ntle. ₂₆Go le dipone tse ditshesane le makolane mo ntlheng nngwe le e nngwe mo ditlhakoreng tsa maribela a kgoro; matlwana a ka fa ditlhakoreng a ne a ntse jalo, le mesepuri e mekima.