ESEKIELE 47

₁Mme a mpusetsa kwa mojakong wa ntlo; mme bonang metsi a bo a tswa fa tlase ga serepodi sa ntlo, a tswela ntlheng ya botlhabatsatsi, gonne kgoro ya ntlo e ne e lebile botlhabatsatsi; mme metsi a fologa a tswa fa tlase, a tswa ka fa lotlhakoreng lwa ntlo lwa ka fa tsogong le legolo, go pota sebeso ka fa borwa. ₂Foo a nkgogela kwa ntle ka tsela ya kgoro ntlheng ya botsheka, a mpotolosa ka tsela ya ka fa ntle go ya kwa kgorong ya ka fa ntle, ka tsela ya kgoro e e lebileng ntlheng ya botlhabatsatsi; mme bonang, ga bo go tsitla metsi ka fa ntlheng ya letsogo le legolo. ₃E rile monna yoo a tswela ntlheng ya botlhabatsatsi a tshotse thodi, a lekanya mabogo a le 1 000, mme a nthalatsa metsi, e le metsi a a fitlhang fa magwejaneng. ₄Gape a lekanya a le 1 000, mme a nthalatsa metsi, e le metsi a a fitlhang mo mangoleng. Gape a lekanya a le 1 000, mme a nthalatsa metsi, e le metsi a a tshwarang dinoka. ₅Morago ga moo a lekanya a le 1 000; mme ya bo e le noka e ke sa kakeng ka e tshela; gonne metsi a ne a gogomogile, e le metsi a go ka sapiwang mo go one, e le noka e e sa kakeng ya tshelwa. ₆Mme a nthaya a re: “Morwa motho, a o bonye selo se?”

Foo a nkgoga, a mpusetsa kwa losing lwa noka. ₇Jaana e rile ke sena go boa, bonang, fa losing lwa noka ga bo go le ditlhare di le dintsi thata ka fa ntlheng nngwe le nngwe. ₈Foo a nthaya a re: “Metsi ao a tswela kwa ntlheng ya lefatshe la botlhabatsatsi, mme a tlaa fologela kwa Araba; mme a tlaa tswelela kwa lewatleng; metsi a a tswedisitsweng a tlaa tsena mo lewatleng; mme metsi a tlaa fodisiwa. ₉Go tlaa dirala go re ditshedi tsotlhe tse di nyeulang, gongwe le gongwe kwa dinoka di fitlhang teng, di tlaa tshela; mme go tlaa nna bontsintsi jo bogolo jwa ditlhapi; gonne metsi ao a fitlhile teng, mme metsi a lewatle a tlaa fodisiwa, dilo tsotlhe di tlaa tshela gongwe le gongwe kwa noka e fitlhang teng. ₁₀Go tlaa dirala go re batshwara ditlhapi ba tlaa ema fa go yone; go tswa mo Enegedi go ya fela kwa Enegelaime e tlaa nna felo ga go anega ditloa; ditlhapi tsa tsone di tlaa nna ka fa mehuteng ya tsone, jaaka ditlhapi tsa lewatle le legolo di le dintsi thata. ₁₁Mafelo a lone a a maraga, le dinwedi tsa lone, ga di ketla di fodisiwa; di tlaa neelwa go nna letswai fela. ₁₂Fa nokeng, ka fa losing lwa yone, ka fa ntlheng nngwe le nngwe, go tlaa gola ditlhare dingwe le dingwe tse di jewang, tse lekakaba la tsone le se ketlang le swaba, le tse maungo a tsone a sa tlhaeleng; se tlaa ungwa maungo a maša ka kgwedi nngwe le nngwe, ka metsi a lone a tswa mo felong ga boitshepo; maungo a tsone a tlaa nna dijo, le lekakaba la tsone e tlaa nna la kalafo.”

₁₃Morena Modimo o bua jaana, a re: “O, e tlaa nna molelwane o lo tlaa kgaoganyang ka one lefatshe go nna boswa ka fa ditsong tse di some le metso mebedi tsa Iseraele; Josefe o tlaa bona dikabelo di le pedi. ₁₄Lo tlaa rua lefatshe, mongwe jaaka yo mongwe; le ke le tsholeleditseng seatla ka re: Ke tlaa le naya borraeno, mme lefatshe leo le tlaa newa lona go nna boswa.

₁₅“O, e tlaa nna molelwane wa lefatshe, ntlheng ya botsheka, go tswa lewatleng le legolo, ka tsela ya Hethelone, go ya go fitlha kwa botsenong jwa Setate; ₁₆Hamathe, Berotha, le Siberaime, o o fa gare ga molelwane wa Damaseko le molelwane wa Hamathe; Hasere-hatikone, o o fa molelwaneng wa Haurane. ₁₇Molelwane go tswa kwa lewatleng e tlaa nna Hasere-enone fa molelwaneng wa Damaseko, mme ka fa ntlheng ya botsheka go ya kwa botsheka go molelwane wa Hamathe. Eo ke ntlha ya botsheka.

₁₈“Ntlha ya botlhabatsatsi, fa gare ga Haurane le Damaseko le Gileate le lefatshe la Iseraele, e tlaa nna Joretane; go tswa molelwaneng wa botsheka go ya lewatleng la botlhabatsatsi lo tlaa lekanya. E ke ntlha ya botlhabatsatsi.

₁₉“Ntlha ya borwa go ya kwa borwa go tlaa tswa mo Tamare go ya go fitlha kwa metsing a Meribathekateše, go ya go fitlha kwa molatswaneng wa Egepeto, go ya go fitlha kwa lewatleng le legolo. E ke yone ntlha ya borwa go ya kwa borwa.

₂₀“Ntlha ya bophirimatsatsi e tlaa nna lewatle le legolo, go tswa molelwaneng wa borwa go ya go fitlha bolebana le botseno jwa Hamathe. E ke yone ntlha ya bophirimatsatsi.

₂₁“Lo tlaa ikgaoganyetsa lefatshe leo jalo ka fa ditsong tsa Iseraele. ₂₂Go tlaa dirala go re lo tlaa le kgaoganya ka bola go nna boswa jwa lona le jwa baeng ba ba jakileng mo go lona, ba ba tlaa tsalang bana mo go lona; mme ba tlaa nna mo go lona jaaka ba ba tsaletsweng mo gae mo baneng ba Iseraele; ba tlaa nna le boswa le lona mo ditsong tsa Iseraele. ₂₃Go tlaa dirala go re lotso lo moeng o jakileng mo go lone, lo tlaa mo naya boswa jwa gagwe teng.” Go bua Morena Modimo.