ESERA 5

₁Jaana baperofeti, e bong moperofeti Hagai, le Sekaria morwa Ito, ba perofesetsa Bajuta ba ba mo Juta le Jerusalema; ba ba ruta mo ineng la Modimo wa Iseraele. ₂Foo ga nanoga Serubabele morwa Shealetiele, le Ješua morwa Josatake, mme ba simolola go aga ntlo ya Modimo e e mo Jerusalema; le baperofeti ba Modimo ba bo ba nna nabo ba ba thusa.

₃Ya re ka lone lobaka loo ga tla kwa go bone Tatenai molaodi wa kwa moseja ga noka, le Shethare-bosenai, le bankana ba bone, ba ba raya jaana ba re: “E mang yo o lo neileng taolo ya go aga ntlo e, le go wetsa lorako lo?” ₄Foo ra bua nabo jaana ra re: “Maina a banna ba ba dirang kago e ke bomang?” ₅Mme leitlho la Modimo wa bone le ne le le mo bagolwaneng ba Bajuta, mme ba se ka ba ba khutlisa, ga tla ga tsamaya mafoko ao a isiwa kwa go Dario, mme phetolo ya busiwa ka lokwalo ka ga one.

₆Malebela a lokwalo lo Tatenai molaodi wa kwa moseja ga noka, le Shethare-bosenai, le bankana ba gagwe Baafaresake, ba ba kwa moseja ga noka, ba lo rometseng kwa go Dario kgosi, ke a: ₇Ba romela lokwalo kwa go ene, go kwadilwe mo go lona jaana, ga twe: “Go Dario kgosi, kagiso gotlhe. ₈A go itsiwe ke kgosi fa re ne re ile lefatsheng la Juta, kwa ntlong ya Modimo o mogolo, e e agiwang ka maje a magolo, e bile dikgong di beilwe mo dithakong, e bile tiro eo e tswelela pele ka tlhoafalo, ya segofala mo seatleng sa bone.

₉“Foo ra botsa bagolwane bao, ra ba raya jaana ra re: ‘E mang yo o lo neileng taolo ya go aga ntlo e, le go wetsa lorako lo?’ ₁₀Ra ba botsa le maina a bone, go tla re go itsise, gore re tle re kwale maina a banna ba e leng ditlhogo tsa bone.

₁₁“Mme ba re busetsa phetolo, ba bua jaana, ba re: ‘Re batlhanka ba Modimo wa legodimo le lefatshe, re aga ntlo e e sa leng e agiwa bogologolo, go fetile dinyaga di le dintsi, e kgosi nngwe e kgolo ya Iseraele e kileng ya e aga, ya e wetsa. ₁₂Mme e rile ka borraetsho ba ne ba tlhotlheletsa Modimo wa legodimo bogaleng, wa ba tsenya mo seatleng sa ga Nebukatenesare kgosi ya Babilone wa Mokalatea, ene a senya ntlo e, a tlosa batho a ba isa Babilone. ₁₃E rile ka ngwaga wa ntlha wa ga Kurose kgosi ya Babilone, Kurose kgosi a ntsha taolo ya go re ntlo e ya Modimo e agiwe. ₁₄Le dilwana tsa gouta le tsa selefera tsa ntlo ya Modimo, tse Nebukatenesare o ne a di ntshitse mo tempeleng e e neng e le mo Jerusalema, a di isa mo tempeleng ya Babilone, tseo kgosi Kurose a di ntsha mo tempeleng ya Babilone, tsa neelwa mongwe, ga twe Shešabasare, yo o ne a mmeile molaodi. ₁₅Mme a mo raya a re: Tsaya dilwana tse, o ye o di tsenye mo tempeleng e e kwa Jerusalema, mme ntlo ya Modimo e agiwe mo felong ga yone. ₁₆Foo ga tla Shešebasare yoo, a thaya metheo ya ntlo ya Modimo e e mo Jerusalema; e sa le go tswa mo lobakeng loo go tla fela mo lobakeng lwa gompieno e ne e ntse e agiwa, le fa go ntse jalo ga e ise e fele.’

₁₇“Jaana ra re, fa go le molemo mo matlhong a kgosi, a go senkwe mo ntlong ya kgosi, ya dikhumo, e e koo Babilone, gore a go ntse jalo gore ruri taolo e kile ya ntshiwa ke kgosi Kurose ya go aga ntlo ya Modimo mo Jerusalema? Jaanong kgosi e re itsise go rata ga yone ka ga tiro e.”