Kgolagano ya Modimo le Aberame
1Morago ga dilo tse, lefoko la Jehofa la tla kwa go Aberame ka ponatshegelo la re: “O se ka wa boifa, Aberame. Ke nna thebe ya gago, le tuelo ya gago e kgolo e e feteletseng.”
2Aberame a re: “Morena Modimo, ana o tlaa nnaya eng ka e le fano ke ntse fela ke se na ngwana, mme ene yo o tlaa nnang morui wa ntlo ya me e le Eliesere wa Modamaseko?” 3Aberame a re: “Bona, ga o a nnaya losika lope, mme bona, motho fela yo o tsaletsweng mo ntlong ya me o tlaa nna moja boswa jwa me.”
4Mme, bonang, lefoko la ga Jehofa la tla kwa go ene la re: “Motho yo, ga a ketla a nna moja boswa jwa gago; ene yo o tlaa tswang mo mmeleng wa gago o tlaa nna moja boswa jwa gago.” 5A mo gogela kwa ntle a re: “A ko o lebe jaana kwa legodimong, o bale dinaledi, fa o ka di bala.” A mo raya a re: “Losika lwa gago lo tlaa nna kalo.”
6A dumela Jehofa; a mo itumelela a kaya fa tumelo ya gagwe e le tshiamo.
7A mo raya a re: “Ke nna Jehofa yo ke go ntshitseng mo Ure wa Bakalatea, go go naya lefatshe le, go le rua.”
8A re: “Jehofa Modimo, ana ke tlaa itse ka eng fa ke tlaa le rua?”
9A mo raya a re: “Ntlisetsa kgomo ya moroba e e dinyaga tharo, le podi e namagadi e e dinyaga tharo, le phelefu e e dinyaga tharo, le lephoi, le leebana.” 10A tsaya tsotlhe tse, a di fatoganya ka bogare, a baya mofama, mongwe o lebaganye le o mongwe; dinonyane a se ka a di fatoganya. 11Manong a fologela mo ditotong, Aberame a a leleka.
12E rile letsatsi le phirima Aberame a welwa ke boroko jo botona; a tlelwa ke letshogo le poifo e kgolo. 13Mme a raya Aberame a re: “Itse ruri fa losika lwa gago lo tlaa nna baeng mo lefatsheng le e seng la bone, ba tlaa ba direla; ba tlaa ba bogisa ka dinyaga di le 400. 14Le one morafe oo, o ba tlaa o direlang, ke tlaa o sekisa; morago ba tlaa tswa ka dithoto tse dikgolo. 15Mme wena, o tlaa ya kwa go borraago ka kagiso; o tlaa fitlhwa o tsofetse sentle thata. 16E tlaa re mo losikeng lwa bone, ba tlaa boela kwano gape; gonne boikepo jwa Moamore ga bo ise bo tlale.”
17Ga dirala ya re letsatsi le phirimile go le lefifi, bonang, leiso la leubelo le le kubang mosi, le lobone lo lo tukang, tsa ralala fa gare ga mefama eo. 18Ka letsatsi leo Jehofa a dira kgolagano le Aberame a re: “Lefatshe le, ke le neile losika lwa gago, go tswa nokeng ya Egepeto go fitlha kwa nokeng e kgolo, noka ya Euferatese: 19Mokene, le Mokenise, le Mokatemone, 20le Mohite, le Moperise, le Morefaime, 21le Moamore, le Mokanana, le Mogiregaše, le Mojebuse.”
