GENESISE 21

₁Jehofa a lekola Sara jaaka a dikile a buile, Jehofa a direla Sara jaaka buile. ₂Sara a nna moimana a bona ngwana wa mosimane le Aberahame, mo botsofeng jwa gagwe, ka lobaka lo lo laotsweng, lo Modimo o kileng wa bua nae ka ga lone. ₃Aberahame a raya morwawe yo o mo tsetseng, yo Sara o mmonyeng nae leina, a re, Isake. ₄Mme Aberahame a rupisa morwawe Isake a le malatsi a 8 jaaka Modimo o ne o mo laotse. ₅E rile Aberahame a tshola Isake morwawe, a bo a le dinyaga di le 100. ₆Mme Sara a re: “Modimo o mpolaisitse ditshego; mongwe le mongwe yo o utlwang o tlaa tshega le nna.” ₇A re: “Go ne go ka bua mang a raya Aberahame a re: ‘Sara o tlaa amusa bana’? Gonne ke bonye nae ngwana wa mosimane mo botsofeng jwa gagwe.”

₈Ngwana a tutuga, a kgwisiwa. Aberahame a dira modiro o mogolo ka letsatsi le Isake o kgwisiwang ka lone.

₉Sara a bona morwa Hagare wa Moegepeto, yo o mmonyeng le Aberahame, a sotla. ₁₀Ka ntlha ya moo a raya Aberahame a re: “Leleka mosadi wa lelata le morwawe, gonne morwa mosadi yo wa lelata ga a ketla a nna moja boswa le morwaake, e bong Isake.” ₁₁Selo se, sa nna botlhoko thata mo matlhong a ga Aberahame ka ntlha ya ga morwawe. ₁₂Modimo wa raya Aberahame wa re: “A go se nne botlhoko mo matlhong a gago ka ntlha ya mosimane, le ka ntlha ya mosadi wa gago wa lelata. O nne o reetse lentswe la ga Sara mo go tsotlhe tse o di go rayang; gonne losika lwa gago lo tlaa bidiwa ka Isake. ₁₃Le gone ke tlaa dira morafe ka ene morwa mosadi wa lelata, ka e le losika lwa gago.”

₁₄Aberahame a phakela ka moso, a tsaya senkgwe le sepako sa metsi, a di naya Hagare, a di baya mo maruding a gagwe, le ngwana, a mo tsamaisa; a tsamaya, a kgarakgatshega mo nageng ya Beerešeba. ₁₅Metsi a fela mo sepakong, mme a latlhela ngwana fa tlase ga setlhatshana sengwe. ₁₆A ya a dula a lebaganye nae kwa kgakalanyana, go le jaaka kwa motho o ka hulelang motswi gone, gonne a re: “A ke se ka ka bona go swa ga ngwana.” A dula a lebaganye nae, a tsholetsa lentswe la gagwe, a lela.

₁₇Modimo wa utlwa lentswe la mosimane; moengele wa Modimo a bitsa Hagare a le kwa legodimong, a mo raya a re: “Go a reng, Hagare? O se ka wa boifa, gonne Modimo o utlwile lentswe la mosimane kwa o gone. ₁₈Nanoga, o kakatlolole ngwana, o mo tshegetse ka letsogo; gonne ke tlaa mo dira morafe o mogolo.” ₁₉Modimo wa budulola matlho a gagwe, a bona sediba sa metsi, a ya a gelela sepako, a nosa mosimane. ₂₀Modimo wa nna le mosimane, a gola; a aga mo nageng, a tswa mohula-ka-bora. ₂₁A aga mo nageng ya Parane. Mmaagwe a mo tseisa mosadi kwa lefatsheng la Egepeto.

₂₂Ga dirala ya re ka lobaka loo, Abimeleke a na le Pikole, molaodi wa ntwa ya gagwe, a bua le Aberahame a re: “Modimo o na nao mo go tsotlhe tse o di dirang. ₂₃Ke gone jaana, inkanele fano ka Modimo, fa o se ketla o mpherekanela le fa e le morwaake, le fa e le morwa ngwanake. Fela ka fa pelonoming e ke e go diretseng, o tlaa e ntirela o bo o direla lefatshe le o jakileng mo go lone.”

₂₄Aberahame a re: “Ke tlaa ikana.”

₂₅Aberahame a omanya Abimeleke ka ntlha ya sediba sa metsi se batlhanka ba ga Abimeleke ba se tsereng ka dikgoka. ₂₆Abimeleke a re: “Ga ke itse yo o dirileng selo se; le gone ga o a ka wa mpolelela, le gone ga ke ise ke utlwe, ke utlwa gompieno fela.” ₂₇Aberahame a tsaya dinku le dikgomo, a di naya Abimeleke; mme bobedi jwa bone ba dira kgolagano. ₂₈Aberahame a beela dikwanyana tse di namagatsana di supa fa thoko. ₂₉Abimeleke a raya Aberahame a re: “Kana dikwanyana tse di namagatsana tse di supang, tse o di beileng di le tsosi, di kaya eng?”

₃₀A re: “Dikwanyana tse di namagatsana tse di supang tse, o di tseye mo seatleng sa me, gore e nne sesupo sa me fa ke epile sediba se.” ₃₁Ke gone ka moo felo foo a go raya leina a re, Beerešeba, ka gobo ba ikanalanye boo babedi.

₃₂Jalo ba dira kgolagano mo Beerešeba; Abimeleke a nanoga le Pikole molaodi wa ntwa ya gagwe, ba boela kwa lefatsheng la Bafilisitia. ₃₃Aberahame a tlhoma setlhare sa motamariseka mo Beerešeba; le gone leina la ga Jehofa, “Modimo o o sa khutleng”, a le bitsa gone. ₃₄Aberahame a nna a jaka mo lefatsheng la Bafilisitia ka malatsi a le mantsi.