HABAKUKE 3

₂Jehofa, ke utlwile tumedi ya gago,

mme ka boifa;

Jehofa rudisa tiro ya gago

mo gare ga dinyaga,

mo gare ga dinyaga

o dire gore e itsiwe;

o re o le bogale

o gakologelwe boutlwelobotlhoko.

₃Modimo o ne wa tswa kwa

Temane,

le Moitshepi kwa thabeng ya

Parane. Sela.

Kgalalelo ya gagwe

ya apesa magodimo,

le lefatshe la tlala pako ya gagwe.

₄Le phatsimo ya gagwe

e ne e ntse jaaka lesedi;

go ne go tswa marang

mo seatleng sa gagwe;

le go sujwa ga nonofo ya gagwe

go ne go le teng.

₅Kgogodi ya mo etelela pele,

le melelo ya tladi ya tlapana

ya tswa fa dinaong tsa gagwe.

₆A ema, a lekanya lefatshe;

a leba, mme a phatlalatsa merafe;

le dithaba tsa bosakhutleng

tsa faladiwa,

le makhubu a a sa yeng kae

a ikoba;

ditsamao tsa gagwe

di ne di ntse jaaka bogologolo.

₇Ka bona megope ya Kušane

e le mo pitlaganong;

dilepelelo tsa lefatshe la Midiane

tsa tetesela.

₈A Jehofa o ne a itumologela dinoka?

A o ne o le bogale le dinoka,

kgotsa a o ne o gakaletse lewatle,

fa e bo ne ne o ne o palame

dipitse tsa gago,

o palame dikara tsa gago

tsa poloka?

₉Bora jwa gago

bo ne bo senoletswe ruri,

maikanelo a ditso

e le lefoko la tlhomamo. Sela.

O ne wa tsetsereganya

lefatshe ka dinoka.

₁₀Dithaba tsa go bona,

mme tsa boifa;

morwalela o o makhubukhubu

wa feta;

boteng jwa ntsha kodu,

jwa tsholeletsa mabogo godimo.

₁₁Letsatsi la ema

mo bonnong jwa lone,

le yone kgwedi;

ka lesedi la metswi ya gago

ka e hulega,

ka phatsimo ya lerumo la gago

le le galalelang.

₁₂O ne wa ralala lefatshe ka kgakalo,

wa photha merafe, o le bogale.

₁₃Wa tswela poloko ya batho ba gago,

poloko ya ba gago

ba ba tloditsweng,

wa ntsha tlhogo ya ntlo ya baikepi

ntho, wa senola motheo

go ya fela kwa thamong. Sela.

₁₄O ne wa phunya yo o leng tlhogo

ya batlhabani ba gagwe

ka marumo a gagwe fela;

ba ne ba tsile

jaaka setsuatsue go mphalatsa;

go duduetsa ga bone go ne go ntse

jaaka e kete ga go jela ruri

bahumanegi ka bosaitsiweng.

₁₅O ne wa gata lewatle

ka dipitse tsa gago,

e bong mokoa wa metsi a a thata.

₁₆Ka utlwa, mme mpa ya me

ya roroma, dipounama tsa me

tsa tlakaselela lentswe;

go nyera ga ntsena mo marapong,

ka roroma mo felong ga me;

ka go lebelela motlha wa tlalelo,

mogang o bololelang batho,

e bong ene yo o mo tlhaselang

a le ditlhophatlhopha.

₁₇Gonne le fa mofeige

o se ketla o thunya,

le fa go tlaa bo go se na loungo

mo mafineng; tiro ya motlhware

e ka tla ya tlhaela,

le matlhagare a se ka a ntsha dijo;

letsomane le ka tla la kgaolwa

mo lesakaneng,

mme go se ka ga dirana

le matlhape mo marakeng.

₁₈Le fa go ntse jalo

ke tlaa itumela mo go Jehofa,

ke tlaa ipela

mo Modimong wa poloko ya me.

₁₉Jehofa, Morena, ke thata ya me,

o dira dinao tsa me

di nna jaaka maoto a tshephe,

o tlaa ntsamaisa

mo mafelong a me a a godimo.