HOSEA 6

₁“Ntlong, re boeleng kwa go Jehofa; gonne o gagotse, mme o tlaa fodisa; o iteile, mme o tlaa re fapa. ₂E tlaa re malatsi a le mabedi a sena go feta a re rudise; mo tsatsing la boraro a re kakatlolole, mme re tlaa tshela fa pele ga gagwe. ₃A re itseng, re lateleleng go itse Jehofa; go tswa ga gagwe go tlhomame jaaka moso; mme o tlaa tla mo go rona jaaka pula, jaaka pula ya kgogolammoko e e nosang lefatshe.”

₄“Wena Eferaime, ke tlaa go dirang? Wena Juta, ke tlaa go dira eng? Gonne molemo wa lona o ntse jaaka leru la ka moso, le jaaka monyo o o tleng o phakele o tloge. ₅Ke gone ka moo ke ba remileng ka baperofeti; ke ba bolaile ka mafoko a molomo wa me; mme ditshekiso tsa gago di ntse jaaka lesedi le le tlhakalalang. ₆Gonne ke eletsa boutlwelobotlhoko, e seng setlhabelo; le go itse Modimo bogolo go ditshupelo tse di fisiwang.

₇“Mme bone ba editse Atame, ba tlodile kgolagano, ba ntiretse ka bonongwane gone. ₈Gileate ke motse wa ba ba dirang boikepo, o mathegetsweng ke madi. ₉Le jaaka ditlhopha tsa dinokwane di tle di lalele motho, lesomo la baperesiti le bolaya batho jalo mo tseleng e e yang Shekeme; ee, ba dirile mo go botlhodi. ₁₀Mo ntlong ya Baiseraele ke bonye sengwe se se tsitlisang marapo; boaka bo fitlhetswe teng mo go ba Eferaime, ba Iseraele ba leswefetse.

₁₁“Gape, wena Juta o laoletswe thobo, mogang ke busang botshwaro jwa batho ba me.